40年前的警廉衝突

 

 

1977年,即係岩岩好40年前,香港曾經發生大型既警廉衝突。

根據記載,香港六七十年代一片烏煙瘴氣。多次反貪,但成效不彰。賄風盛行,亦禁之不絕。私相授受為常態,作奸犯科可當正牌。麥理浩接手管治後六七暴動時期既香港,面對滿途荊棘,要為英國同中國談判爭取籌碼,必先著力令香港係國際經濟局勢成為不可輕易抹殺既一枚棋。政令不通,則所謂改善民生,只會成為滿紙空談(依家都無人明呢個簡單道理)。於是,佢決心開波,清理門戶。

1974年,廉政公署成立。姬達為首任既廉政專員。佢係軍人出身,有情報工作經驗,後來轉任文職,處理英殖民地事務。姬達接手廉署既工作,既然得到總督首肯,自然對警隊內既貪邪歪風絕不姑息,採取既係強硬鐵腕手段,雷厲風行。當時報道,廉署係會叫警察做 “SCUM”,應該仲差過依家香港人叫警犬既。結果,幾位大老虎被查辦,警隊上下開始人心惶惶,最終,爆發大型示威,甚至到廉署總部搗亂。

當時國際形勢比依家更為波譎雲詭,緊急關頭,麥理浩要即時作出研判。佢認為如果事件繼續升級,會令到警察同犯罪分子連成一線,最終會令香港進入無政府狀態,加上當時英軍無意介入平亂,麥理浩決定特赦一次,既往不究,下不為例。當時,呢個完全係政治決定,並無所謂民意基礎可言,亦都犧牲左姬達(果然最親密戰友都用黎出賣)。雖然事後前者被擢升為布政司,而且加官進爵,但亦都令到廉署幾乎一鋪清袋,完全喪失當初成立講求絕對肅貪倡廉既目標。

事後咁多年,警權同埋廉署既調查權,一直都維持係一個極度微妙既關係,當中只靠最高級既官員去平衡同埋維持。呢個就係所謂一直所講究既check and balance。邊個去查,邊個去放生,邊D鬆,邊D緊,旁人無辦法得知。你以為英政府就無所謂黑箱作業?但不論如何,經過二三十年既努力,廉署成功重建到一個「好打得」既形象,香港係回歸前成為世界數一數二既廉潔城市。香港勝在有ICAC成為人人皆知既口號。而與此同時,警隊既形象係回歸前,亦都相比六七十年代(所謂有牌爛仔,兵即係賊),正派番好多。

今日係2017年。1997年岩岩好係20年既分水嶺。警隊依家係過去20年,點樣進步左;而香港既廉潔程度,又進化到咩一地步。大家有目共睹。無用多說。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 153002
Date: 2017-02-15 14:52:41
Generated at: 2021-10-21 01:31:21
Permalink: https://www.vjmedia.com.hk/articles/2017/02/15/153002/40年前的警廉衝突