出聲明了事，係PR 大忌

設計比賽入面有參賽作品，入面有貶低其他人（組織、團體、國籍、種族、宗教等等）令部份人覺得冒犯，可以點做呢？解決問題嘅方法好多，處理得體嘅，可以係好好嘅PR嚟。

作為設計比賽嘅舉辦者，一般都有最終決定權，所以有好多嘢可以控制。考慮以下情況：

① 如果參賽作品可能犯法嘅（例如包含三合會用語，教唆犯罪等等），你會唔會用設計自由，冒住自己都犯法嘅風險，去保護參賽作品，甚至落埋單訂埋貨？好明顯你可以自行判斷退回參賽作品。

② 如果參賽作品煽動國籍、種族、宗教仇恨呢？例如有侮辱南亞人成份呢？侮辱基督教呢？當然未必犯法（香港冇咗褻瀆罪喇），但係你未必想呢啲元素影響作品本身，所以同上，你可以自行判斷，退回參賽作品。

③ 如果只係貶低某啲組織、團體、規條，而呢啲行為並唔超出大部份人嘅道德底線，好似話恥笑／貶低對等嘅組織，可以點做？如果你整個比賽出嚟加強成員嘅認同，但係自己友笑吓對家都唔俾，你搞比賽嚟做乜呢？不過你仲有好多嘢可以做㗎。例如喺見到類似作品嘅時候，＊事先＊戴定一堆頭盔。例如講明自己會盡量尊重參賽者嘅言論發表自由，俾啲心理準備大家，甚至係開定post呃吓嬲，或者戴吓高帽，讚吓對方心胸廣闊之類。再好啲嘅做法，係事先同可能會感到冒犯嘅團體報定案，夾定稿，幫件事打圓場。你可能問點解要噉做，喂呢個世界冇一世嘅敵人㗎，做咩無啦啦開拖唧？

好，如果你係俾人冒犯嗰便嘞，可以點做？

人哋搞比賽，啲作品唔係搞手，你當面叫人撤回，對方真係唔使理你㗎。但係你仲有好多嘢可以做。

① 你可以＊私底下＊同搞手提出不滿，再傾一啲補救方法。例如請對方做一做上面提過嘅嘢。出吓聲明、搞吓gag、呃吓嬲，然後自己再扮吓大方寫兩句：「雖然友好組織設計比賽有幾件參賽作品我哋唔係咁鍾意，不過我哋相信投票嘅人眼晴係雪亮嘅。」之類。

② 再唔係可以事先傾掂數，如果某樣參賽作品贏嘅，就盡量低調處理，唔好整咁多，唔好太張揚。呢啲嘢傾嘅啫。

③ 如果你條氣又唔順，你玩嘢用返同樣做法，複製一次對家嘅參賽品，用「提供多個選擇」俾同學，令到成件事膠化又好，公平返都好，再同樣扮吓大方，講返句：「我哋明白大家都係搞吓笑，大家一齊印，打返個和」，咁咪化解咗個危機囉。

無論兩便揀邊個行動，互出聲明，懶係據理力爭，睇落最文明，其實都係最小學雞，最冇效嘅方法嚟。

出聲明，好易出事。萬一寫錯兩隻字，拋書包拋得樣衰咗，咁就大家都唔好睇啦。前車可鑑呀。

作者：擇言

每個禮拜有15分鐘嘅話歡迎你加入粵典編輯組。 words.hk計劃: http://words.hk ｜ Facebook專頁

閱讀後覺得好，請多多讚好及分享～：）