【真・離地觀點】「你都無埋站,點落?」

 

兩個錯唔會令到一件事啱。

話說尋晚失眠碌咗成晚面書,就喺度講緊Sogo門口有巴士唔埋站中線落客俾警察抄牌,而令巴士司機決定按章工作,唔泊到埋站唔開門上落客。就咁聽到呢度,我呢個香港人其實真係好感動:試過無數次因為巴士唔泊好站上唔到車同落唔到車,你終於跟返規矩,何止感動,直情可以話係開心。

之前啦,之前喺蘇格蘭住過三年,喺倫敦住過半年,又住過幾個星期東京,幾個星期大津之類咁樣,甚至早排去福岡同京都旅行,都覺得喺海外搭巴士好,好在咩?唔止會泊啱站先上落客,仲會等你坐定企定先開車,同埋可以埋站之後先慢慢起身落車。呢件事喺香港係想像不能的。試過有幾次喺巴士上面仆低,就係因為未坐好架車就開:明明已經捉咗扶手;又試過幾次落唔到車,只係因為我到站先起身落車。吖,仲有,同落唔到車情況相若嘅有上唔到車。是咁的,明明未埋到站,巴士司機唔知做咩咁樣就開咗門俾乘客上車,唔講會唔會俾人打尖先啦,有啲站都無排隊可言,呢個都算喇,但個司機就會當自己停咗站咁樣,唔停站咁樣走咗去,因為呢個問題,我都試過幾次上唔到車,又或者,俾架巴士飛站。係唔係我唔得貼合香港嘅國情?我唔知,但我講緊嘅仆同落唔到車,係當我未返英國讀書之前,仲喺香港讀緊中學嘅年代。

記得中四嗰年投訴過唯一一次巴士司機,佢連站都未埋就開門落客,我就梗係唔知啦,未埋站吖嘛。跟住好啦,落唔到車喎,喺紅燈嗰時落咗樓下,鼓起咗莫大嘅勇氣同個司機講,「其實我要喺上個站落車。」

「咁你又唔落?」司機大佬問返我轉頭。

「你都無埋站,點落?」

跟住嘈咗兩句,終於我喺下個站先落到車。

 

好想急死你

 

講返正題,嗯,的士違法泊埋巴士站等客係原因,但係唔係等於巴士就可以喺中線落客呢?我覺得係兩件事嚟。警察只係抄巴士牌,而唔趕的士,甚至唔抄的士牌,唔著就梗嫁啦。上面都話啦,的士違法泊巴士站吖嘛,的士一定有唔啱,呢個都係一定無錯嫁喎。問題依家係講緊你巴士:你走盞、偷雞,俾你係人情,但捉你明顯係道理。即係點呢?試下用人話講,隻眼開隻眼閉咁樣俾你無話唔得,但捉到埋嚟無得唔硬食。

又講返轉頭,即係以香港嘅情況,就算無的士佔站呢個問題,就算只計巴士要泊好站先可上落客呢個factor,塞爆係好正常合理嘅一個狀況,好想急死你先至係應該嘅狀態,只係一直有太多嘅心急人,令到件事唔應該咁有效率咁樣有效率咗。到底係唔係真係要咁有效率先好呢?我唔知,呢個係個人價值判斷。正如尋晚見到賴叔個post,佢話乘客落唔到車會鼓噪,俾佢都會;我就會話呢個係你呢班香港乘客嘅問題,都未到站急啲咩啫。當然尊貴嘅香港人唔會覺得自己有錯,唔會覺得自己有問題:嗯,在情我明白,但真係無理吖嘛。

而講到最後,都係嗰幾味啦,人口太多呀、土地問題呀,呢啲大家都耳熟能詳,我諗都無咩需要解釋。

不過又咁講啦,我絕對支持巴士司機按章工作嫁:我唔想上唔到車、唔想落唔到車,更唔想喺架車上仆。

 

作者:砂糖雪(☆しゅがぁ雪♡)

砂糖雪(☆しゅがぁ雪♡)
汀瀅冰中結,砂糖雪裏埋。單純愛美愛腐愛幻想,自知殘存在凡塵俗世,沉溺虛構神話裏、迷途弱蟲迷宮中,困於弱水三千內顛倒夢想 - 神無月的凝視下,葬下零落的白色花瓣、綻放璀璨的戀色花火 - 明知是夢想,依然惜夢。FB :佐藤 栞

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 153323
Date: 2017-02-20 14:16:16
Generated at: 2022-09-28 14:10:14
Permalink: https://www.vjmedia.com.hk/articles/2017/02/20/153323/【真・離地觀點】「你都無埋站,點落?」