日本卡通片就算俾細路睇,有時都唔係亂黎

 

提起五更,諗起為食龍少爺呢套舊到阿媽都唔認得既動畫。日本人就算俾細路睇既野,有時都唔係亂黎,真係落足心思。

諗下其實係有一套公式係入面。例如,叮噹其實係機械貓同人既互動,入面唔單止有友情,仲有一份親情係入面。同樣道理,為食龍少爺,五更係史前既一隻恐龍仔,但係就反過黎係主角初葉一家度孵化,而且照顧住,雖然佢就成日搞亂檔,爆出唔少笑料,但感覺就好似一家人,大家睇左都會會心微笑。

入面既概念唔係一字咁簡單咩。動物唔單止只係寵物,大家如果可以一齊和平共處,呢個世界就會更美好,呢個點止係日常生活吵吵鬧鬧咁簡單,簡直就係講緊待人接物,甚至係環境保護,生態保育啦。

如果為食龍少爺對你黎講比較冷門,你都應該記得飛天少女豬事丁掛。主角亦都係女仔(叫國分果林好似係),可以變身英雄去幫人,但係就會變成一隻豬(又係動物)。每行好事幫人一次,得到珍珠作為獎賞,只要儲夠一百零八粒,就可以達成成為任何形態英雄既願望。不過故事後段,為左救人,不惜係朋友面前變身,所以就只能夠一直維持豬樣,直到儲齊珍珠,變番自己,先係最重要。呢種「超級英雄找回自我」既套路,荷里活近年先識用呀。但係你睇寶妮,已經可以搵到(咪又係:愛就係選擇,犧牲就係意義!!)。

樣貌唔緊要,內心行善先最重要。連以前既兒歌都填到曉飛咁滯,又識扣題又流麗,依家點搵得番。「珍珠珍貴像信心,使我極動人異常吸引」/「應該加點真摯和誠意,愛心不止一百次」。係咪好有教育意義?寫到呢度,搞到我都想去搵番呢D舊片黎懷緬下。

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 150984
Date: 2017-02-21 05:36:12
Generated at: 2021-09-23 05:27:22
Permalink: https://www.vjmedia.com.hk/articles/2017/02/21/150984/日本卡通片就算俾細路睇,有時都唔係亂黎