咩係概率?

 

尋日有一堆痴線佬突然係FB呢D應該係消閒娛樂既地方,討論究竟咩為之叫機會率。。。

呢個問題係普通人既口講口賠層面,本來好容易解釋(一般人講『可能』啦都『可能有機會』每日都講幾十次),但係係一堆痴線佬(有D仲要有哲學底)既情況下,變得極度複雜。抱歉我呢D市井流氓,盲字都唔識多個,學術根底又唔好,用字都會比較粗俗,但係要好好咁定義概率,即使係最基本既學術研究層面去睇,的確要有一班離很晒地而且食飽飯無__既數學家黎搞,先會搞得到手。一般旁人係唔會知佢地做緊乜。

最簡單講,如果機會率,作為一個Function,係要Well-defined,就係要永遠有Set theory Measure theory 係底墊住,果度有一大堆既Definition 同Axiom,當中(我認為係)無辦法遭受挑戰。首先所謂既Measure space,就已經係一個建構出黎既空間,大家都看不見摸不著,有D類似涼宮春日唔開心果陣既所謂幽閉空間,你真係信則有不信則無。正如你要擲骰子然後宣告點解係各點數既機率係1/6,如果有人唔認同你,甚至去挑戰你,點解無其他可能?你就要由定義出發。

所以,玩法是咁的:首先要自己Define 一個Measure space,去做你想做既野,於是,想玩既遊戲,就會變成龍門任你劃(但劃左就唔郁得,同依家果D龍門任意般既人略為嚴謹一D,要留意)。

咁由於FB係唔Suppport LaTex Syntax 所以再講落去用唔到Notation,會變得麻煩。總之,你有你既空間,然後你開始劃你既Sample space,唔好問點解,總之係要Non-empty,之後你就有Sigma algebra,係一個Set 裝住堆來自你個Omega space 既subset,就係果堆events。然後仲要講到明佢地係closed under complement同countable union,即係無彎可轉架。咁最後係Sigma algebra上面就可以定義P:F–> [0,1]喇,但當然要數得到而且加得埋而且P(sigma) 係等於1啦。

sigma algebra 入面都應該有個event 叫做null,又或者有一個叫做一定發生,咁P(null)=0,然後P(一定發生)=1。有無其他可能呀?呢個係要大眾一齊坐低傾去討論取得既主觀共識,又或者正如方大大所講要根據理性去判斷。如果有一個「我唔相信一定唔會發生」既概念,或者信仰,理論上既機會率根本上係唔可以講到出黎架。呢D 就係Probability Axiom 既精義:

你我都唔可以驗證到對與錯,但係大家都係彼此覺得舒服下既情況下接受,咁樣就即係不證自明喇。如果突然有一千萬人(或以上)都認為擲公字係會同時擲出公同字,又或者好似「你地無做錯到」都得到大眾接納,到時所謂既知識,同埋其他一切既定義,就會有人識得去改寫喇~~

 

(PS>講呢D野真係好很離地呀~)

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 153520
Date: 2017-02-23 12:42:51
Generated at: 2021-09-20 16:52:15
Permalink: https://www.vjmedia.com.hk/articles/2017/02/23/153520/咩係概率?