依家仲會follow 嘅兩個女團——Twice & Red Velvet

 

 

唔知有冇人同我嘅癥狀差唔多——會留意韓國娛樂,又會聽Kpop,但係聽親都係十幾歲時接觸個啲歌手同團體,而如果個班人唔comeback或者散band(即係好似少女時代或者kara咁),就只能夠聽返啲舊歌。至於新人或者新歌,除非真係好紅,如果唔係我只能夠間唔中上youtube或者Spotify開隨機playlist先會聽到有咩好聽,更甚者係到年尾mama見到佢地上台拎獎或者睇歌謠大戰先恍然大悟佢地係咁紅。無錯,BTS係講緊你地,作為一個男人,唔留意男團都好正常啫。不過,你地依家紅嘅程度真係我無想像過,失覺哂。

好喇,黎到今時今日,我可以講有能力令我主動搵黎聽嘅新女團,就只有兩個-Twice同Red Velvet,而咁啱呢排佢地都出新歌。點解?第一,Twice真係好紅,紅到我無得扮睇唔到。第二,Red Velvet啲歌真係好聽。以下我會透過資深女子組合分析家史兄係文章《少女時代的終結》當中使用google trend分析少女時代已經係高峰滑落嘅方法,借用黎證明Twice到底幾紅。點解係google trend?因為佢地係屬於個網,係屬於youtube時代,基本上九成人第一次接觸Twice嘅途徑都係youtube。

 

(google trend圖)

 

老實講,今時今日搵咩女團去同Twice比都係做炮灰(就算依家嘅少女時代都係咁話)。人家plug嘅三首歌,youtube點擊都破億,而《knock knock》相信都只係時間問題。點解?你睇到Twice條線係不斷向上增長,每次突然飆上去都係因為有新歌出,而最後飆到直指100(100係滿分),個時間點就正正係《knock knock》mv出左之後,又加埋演唱會效應,只能夠講佢地已經進化到怪獸級。

 

 

正如我上段講,搵咩女團去同Twice比都係做炮灰。我試過將唔同嘅新一代女團擺落去同Twice比,結果都係大炒。Red Velvet都唔例外,但已經係叫做好睇啲,平均值已經無差咁遠。2007年,SM推少女時代係9人女子組合,JYP推嘅Wonder Girls就五個人,而依家就好似命運咁兩間大廠交換。從歌路黎講,我係鍾意Red Velvet多啲嘅,快慢都得。但數據無得呃人,Red Velvet家下係youtube最高hit rate嘅歌係《Dumb Dumb》,但講緊都係6千5百萬咋陰公。有人垢病,話SM拎哂啲資源去捧EXO,搞到Red Velvet今時今日唔上唔落咁。但係,每個時代都有呢啲問題,當年夠唔少elf話少時搶哂Super Junior嘅資源。呢啲問題,係睇下你企係咩位睇啫。

 

 

又根據資深女子組合分析家史兄係文章《Mr. Taxi 是如何煉成的?》所講,一隊成功女子組合,一定要有又hit又洗腦嘅歌,之但係點樣先係一首又hit又洗腦嘅歌?佢俾左四個條件。

第一,不能是慢歌。因為快歌歌詞可以鳩填(信我,kpop好多快歌啲詞都係好鳩,你去搵中文字幕睇就知),又有舞跳,好易就吸引到人。Twice由出道到依家,4首first plug都係如假包換嘅快歌。而Red Velvet呢,咁多首first plug,得《one of these nights》係慢歌,亦係點擊率最少嘅。

第二,歌名要夠短。Twice 4首first plug,得《like ooh-ahh》同《knock knock》係長啲,但基本上聽左歌都唔會唔記得。相反,Red Velvet有唔少歌名同佢地隊名一樣咁難讀,所以,點解《Dumb Dumb》係Red Velvet最hit嘅歌唔係無原因。

第三,英文。唔使我多講喇,基本上兩隊所有first plug歌詞都滿佈英文,亦係用英文做歌名。點講都好,英文仍然係全世界最多人用嘅語言。

第四,重覆。之前韓國有新聞叫啲高考學生唔好係溫書個陣聽某啲歌,因為你溫完都只會記得啲歌詞。不停重覆嘅詞同旋律會令到你係個腦係咁loop,係咁想再聽。唔講之前個啲,剩係新呢兩首,當你以為Red Velvet嘅《Rookie》有53個「rookie」已經好誇張個陣,Twice嘅《knock knock》居然有111個「knock」,都未講個幾下「咚咚」,真係洗腦到痴線。

 

最後,每次打呢啲文都一定有人非議話咩仲好,咩咩又唔講。首先,我新嘅準則係13年之後出道。Gfriend係紅,我亦有聽,但唔係我杯茶;Blackpink我都有聽,我都好睇好佢地,但2ne1影子太重,咁樣我就不如聽2ne1喇;i.o.i我都有聽,都幾like金世正,但因為我冇睇《produce101》,所以冇太大感覺,希望之後各奔前程有更大發展。

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 153725
Date: 2017-02-26 03:10:33
Generated at: 2022-07-07 04:28:32
Permalink: https://www.vjmedia.com.hk/articles/2017/02/26/153725/依家仲會follow-嘅兩個女團-twice-red-velvet