【飲JS 飲醉】年少無酒?

 

我衷心覺得依家政府既宣傳廣告唔單止失敗,劣質,而係上面做果班人已經離地到痴乸左線。

最近有個叫「年少無酒」既運動。先唔好講個條宣傳片有幾膠喇。我地單從個中文口號去講:

酒精傷害要認清,青少年咪掂酒精。

首先,單從語言角度出發,我係唔知呢句野真心想講乜。酒精即係講到係毒一樣啦?(掂都唔得)咁如果係咁,你係咪想話,代表一切有酒精成份既用品,包括:消毒酒精,濕紙巾,酒精溫度計,甚至係酒釀丸子呢種甜品,果D全部掂都唔得,青少年都要敬而遠之呢?哦,你話唔係,其實只係唔想佢地未成年飲酒唶。嘩,呢D咪叫語障囉。

但再數落去,其實淺嘗,飲酒,同酗酒係完全唔同既事,同吸煙吸毒一般一定對身體有害係唔可以就咁類推。至於好單純話酒精有傷害就更加莫名其妙,依家電視甚麼仲不斷講紅酒白酒推廣,然後仲有醫生話飲一杯紅酒每日對心臟健康係有益既。咁依家呢個口號究竟係想點??會唔會令部份唔識諗既青少年更confused?如果真係話未夠十八歲飲酒會壞腦變白痴影響發育既,做呢D宣傳都唔夠啦,直頭立法啦要。以後Jolly Sandy 0.5% 都唔好飲啦(好懷疑仲有無人飲。我地果陣有人飲JS已經覺得好威威)。

跟住更正既係,仲有句細字話叫「成年人應該避免令未成年青少年有接觸到酒精的機會」,就更加無稽。咁係咪大人都唔應該買唔應該飲?倒不如全面禁酒啦,第一步就應該將應課稅品既酒精飲品全面加稅,唔係叫人「避免」,點避?開雪櫃又見到,睇電視又見到,上網都見到手工啤酒試飲啦?避?掟晒D細路入密室吖笨。最正係,成年後,係咪代表可以解禁?到時放心狂劈,唔識自制,咪又係照樣成為社會問題。

永遠都係果種唔俾佢地知,唔俾佢地掂,就以為會無事既家長式教育,將好事變成壞事。究竟幾時先肯改?佢地有無認清依家咩年代?

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 153758
Date: 2017-02-26 17:23:25
Generated at: 2021-09-23 05:19:38
Permalink: https://www.vjmedia.com.hk/articles/2017/02/26/153758/【飲js-飲醉】年少無酒?