最後一碗蕃茄麵

 

我見到健吾同呢度有D朋友講話某間拉麵店最後一日做生意。覺得可惜,於是臨尾都去支持多最後一次。

之前都係朋友介紹,覺得好所以有時,OT完無乜好食,或者同D舊友聚舊大家咁岩都夜夜地收工,可以去食下坐下吹下,食過幾次。你話裝修就無乜,而且你講係咪好食到超絕,都並未去到果個級數,而且價錢黎講都唔算平宜,但個分別係,食得出碗拉麵既湯底既心機,而且難以話係劣食。所以先覺得應該常幫襯。

最後一日食當然多人,但都唔駛點排隊。我聽到食緊果陣有人講話:唉點解對面大__食都做得住,但呢個麵店就做唔住。我當然只能夠表示沉默。

呢個話題我都講到口臭啦係咪,呢D CASE,只係滄海一栗。係香港,良幣俾劣幣驅逐,而劣幣又俾假幣擊潰,想用心做好飲食,唔理其他野,唔做宣傳,無市場策略,俾最好既野奉客然後收貴D再有麝自然香?我只能夠講,難度未免太高了吧(做到你米芝蓮咪又係WINNER'S CURSE)。就係為左減省成本俾次檔野先做得住,最好又平又好又快。你係小店?無錢燒?只能認命。

當然我地講黎講去都係地產霸權,點解要係咁加租,點解唔可以行番租管等等。於是又係返到去老問題,可唔可以唔賺盡呀。同業主講,梗係唔得。第二,政府靠晒地價收入(今年賺左成千億?),樓價升租金升就係咁樣維持成個機器運作,就當然要有犧牲,剩番最有實力既大賈先有得留低。想整個經濟結構一齊轉,得,先加稅先。幾多人又會願意?咁不如小店死好過。

如其他網上既人成日講:呃LIKE容易,真係願意俾錢既難。連想賣個廣告都會俾人口誅筆伐喎,仲講真金白銀。講錢往往就傷感情。我唔係想係度批評邊個,只係覺得,依家係香港,用心做呢三個字,真係超唔值錢哩。你話我用字涼薄,但真係反映事實哩。

我本來都想同老闆講聲叫佢為左夢想,可以堅持落去就堅持呀。但後尾都真係忍住無講,太偽善。我自己又算乜?都係返OT做港豬既可憐蟲渣,叫埋全部人一齊唱埋There is a life about to start when tomorrow comes(再和平散去)好未?去拉麵咪去日本食咪最好囉,係咪?

 

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 153846
Date: 2017-02-27 17:40:02
Generated at: 2021-09-23 05:19:03
Permalink: https://www.vjmedia.com.hk/articles/2017/02/27/153846/最後一碗蕃茄麵