古代也有9upper——金聖歎

 

近年香港9up蔚然成風,9upper繁星滿天,但其實古代都有9upper——金聖歎。金聖歎,姓金,字聖歎,處於明末清初(1608-1661 ),以評點書卷顯世,當中對《西廂記》、《水滸傳》的獨創編排,更是名聞遐邇。

金聖歎捲入江南的「哭廟案」被斬。人之將死,寫遺書是常識吧,只剩孤兒寡母,無不見憐,點都要有啲交帶。所以臨死前,佢將自己嘅遺言寫晒落張紙度,交畀大仔睇,到底寫咩嘢呢?叫佢好好生活?錯;叫佢照顧好家人?唔係;講下遺產同身後事?都唔係。作為一代文學批評大師,佢只係寫一句:「鹽菜與黃豆同吃,大有胡桃滋味,此法一傳,吾無遺憾矣。」即係點解?簡單講,遺書係話:「呀仔啊,呀爹就快要死喇,等我話你知一樣好重要嘅嘢啦!如果呢,將鹽菜、黃豆一齊食,原來會好有核桃味!呢個方法流傳到,我人生都冇遺憾喇……」之後就受刑被斬死L咗。

okok,Thx for sharing,好實用,我可以拎條秘方上都市閒情教煮餸了。如果我係個仔,會心諗老豆你係咪痴q咗線,9up都有個譜啦,好玩唔玩拎遺言嚟玩。不過金聖歎本身都係率性、狂放不羈,一直有典型9upper傾向,例如相傳佢寫過三十三則「不亦快哉」,記錄低有啲咩事令到佢覺得好爽。有啲都正正常常,例如「還債畢,不亦快哉!」,即係還晒錢,好爽!睇落都好正常冇咩嘢,只係唔知點解要寫出嚟。再睇下有幾句:「推紙窗放蜂出去,不亦快哉!」(第28則)、「看人風箏斷,不亦快哉!」(第30則) Huh?睇人斷風箏好開心?我明,即係睇人仆街最開心啲fd,但點解推紙窗放蜂出去又覺得爽呢?又睇下「存得三四癩瘡於私處,時呼熱湯關門澡之,不亦快哉!」(第20則),即係話:收埋三四粒瘡生喺陰部,耐唔耐拎熱水淋下佢,唔係好爽咩?明清之際,堂堂一個江南才子,寫到啲咁嘅嘢出嚟,真係好鳩,係超越時代嘅鳩,係9up界陳巧文,因為佢嘅鳩走前咗我地400年。

更有傳指,金聖歎死之前,特登將兩張紙條捲埋,收喺耳仔,當手起刀落人頭落地嗰陣,兩張紙團就碌咗出嚟。執起打開一睇,原來一張寫住「好」字,另一張寫住「疼」字,加埋一齊,即係想話畀人聽自己斬頭好疼啊。呢種行為,可謂古代鳩人之最,臨死都要玩膠,古今冇乜幾個。

講番「鹽菜、黃豆一齊食有胡桃味」呢個遺言,仲有另一個版本,汪曾祺話其實係「豆腐乾與花生米同嚼,有火腿味」,不過兩者一樣咁鳩,都係無鳩聊聊。臨死仲要9up,有正經嘢唔講,喺度教大家點樣食到火腿味道,方太煮餸咁款,可算係9upper之中嘅濫觴。縱觀種種資料,或者會質疑只係後人古史層累,但都表明住佢鳩嘅形象,係何其深入民心。一個人喺大刀之下,臨死喇,都仲可以玩膠、大無畏地分享無關痛癢嘅飲食配方,呢種精神好值得欽敬。

睇返轉頭,金聖歎算係死於政治事件,清政府為咗打擊江南士人,因而捕殺抗命者,佢呢種9up行為,可能係明亡之後對現實不滿嘅表現,似係看透世事,其實夾雜住一up泯恩仇嘅政治無力感。睇返香港,近幾年fb 9upper風起雲湧、人才輩出,大有清初漢士之影子,看似風流自賞、出世放蕩,up盡天下之鳩而罕談政治,其實骨子裡始終關心世情,不過要做到金聖歎「生前寫鳩嘢,死後玩膠事,家書遺言都9up」呢種大無畏精神,恐怕言之尚早。

刀斧相加,雖死亦鳩,佢先係真正貫徹「9upper never die」嘅先驅。

 

 

作者:潮文社

潮文社
潮文社,實錄生活百態、個人小品,以流行通俗形式表達,由社長親筆原創,亦歡迎投稿。專頁:https://www.facebook.com/9.Literature

閱讀後覺得好,請多多讚好及分享~:)

其他熱門文章

  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 大埔浸信會借 Nick Vujicic 籌款事件補充 by Do Chan
    聚會的定位是「佈道暨擴堂籌款」聚會,這一點是令很多人勃然大怒的。我猜想,其實主辦方並不是想非信徒買票聽福音,他們的目標其實是教會內的富貴會友,他們買票捐錢給教會,教會還以阿 Nick 親身講見證,本意是想雙贏,但結果卻釀成公關大災難。敝教有…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 154092
Date: 2017-03-04 05:08:45
Generated at: 2022-08-09 07:29:07
Permalink: https://www.vjmedia.com.hk/articles/2017/03/04/154092/古代也有9upper-金聖歎