道家者流與同性戀

 

利用古代流傳至今嘅宗教去說明一啲現代嘅尋常概念,其實點都會出問題。一係,就失於斷章取義,乖離古意;一係,就失於以今非古,苛求古人。

例如話,同性戀人士一直係唔少基督教團體針對嘅對象,尤其是當佢哋提及到同性戀婚姻呢個議題,佢哋會努力咁由佢哋嘅經典入面索求反同性戀嘅觀點。但佢哋似乎唔記得咗,以佢哋經書嘅觀點去睇婚姻,其實得兩種:一夫多妻或者終身不娶,而且對近親結婚同收繼婚亦都唔排拒。一夫一妻一男一女結合,以及同性戀呢啲希臘羅馬風俗,其實都唔係《聖經》支持嘅。所以,佢哋亦只不過係斷章取義,拎有用嘅《聖經》章節嚟支持自己嘅觀點;不過佢哋係醒目嘅,因為至少冇去苛求希伯來先祖,指摘佢哋一夫多妻同亂倫,因為呢啲章節喺佢哋斷章取義嘅時候已經略過晒唔提(唓)。

眾多古已流傳嘅宗教之間,對同性戀最少批評嘅,似乎係道教。不過都唔係冇。最近亦聞說有啲道教中人,以同性戀不合「陰陽」之道而反對同性戀,因為唔係一夫一婦一陰一陽結合而成云云。然而,事實上道教係點睇嘅呢?

有人會反駁呢種道教中人,話咩「有無相生」,因此係「陰中藏陽、陽裡藏陰」,人人心底都有座斷背山,而斷背山前往往都對異性唔係冇興趣咁講。雖然唔係講唔通,但係咁講,只不過係玩下文字遊戲,唔止好難說服人,仲會犯返你要反駁嘅人同樣嘅錯誤:斷章取義,乖離古意,附會經典去胡言亂語,何苦呢?

若然真係要以道教嘅道理去反駁呢啲修為唔到家嘅道教中人,其實又真係唔係咁難,亦唔需要去玩文字遊戲。因為你只需要記得,道家者流嘅核心概念,就足名收呢啲人皮。咁道家者流嘅核心概念係咩呢?冇錯,「順其自然」。

所謂「順其自然」,就係自然而生者,就唔應該以人力去限制佢、阻礙佢。男人愛女人、女人愛男人係自然;男人愛男人、女人愛女人亦都係自然,因為呢啲愛同性嘅人,天生就係咁架嘛;既然係自然,使人力去「糾正」,要一個同性戀者變成異性戀,同要一個異性戀者變成同性戀一樣,都係無謂、冇必要,當然亦都偏離咗道教嘅教義啦。反而,既然佢係中意同性別嘅人,咁佢就應該好好哋去搵到佢嘅同性戀人添。佢應該做乜嘢、愛咩人、去邊度,由佢啦。

講到尾,以古代流傳至今嘅宗教而言,道教無論喺教義,以及所植根嘅傳統中國社會,對於同性戀者都係相對友善嘅。因為本身道教對同性戀嘅態度就係「冇所謂」,認為都係自然嘅一部分。要夾硬喺道教入面搵到反對同性戀嘅教義,其實真係唔容易;反而要由道教教義推出認同同性戀者嘅說法,就實在係太容易。咁你話,道教中人仲去反對同性戀,話佢修為未到家,其實都不為過啦。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 154228
Date: 2017-03-07 05:47:15
Generated at: 2021-06-24 21:04:49
Permalink: https://www.vjmedia.com.hk/articles/2017/03/07/154228/道家者流與同性戀