靚就係做咩都着數啲,講完。

 

婦女基金會搵歐鎧淳做「我真正的事業線」campaign就即刻俾人鬧,我覺得啲婦團真係要再研究下啲立場同埋用字,如果唔係下次出campaign都係會挑起人條筋。

歐小姐係無辜嘅,你要佢係鏡頭面前話因為自己嘅外表令到人忽略佢嘅成就,對於一啲(即大部份)唔靚嘅人(即小弟)只係會聽到佢話:我太靚,慘豬豬。

等於李嘉誠如果話自己太有錢好可憐,可能係真,但好難有人同情佢,因為如果可以俾你揀,你都會揀靚同埋有錢,揀多一千次都一樣,邊有人會希望自己醜樣?

靚嘅人係永遠唔會明白醜嘅人嘅痛苦。

我識得一個美女sales head,六呎高model身材,以前做主播,出席event從來唔需要主動approach人,一生人飲野無俾過錢,約啲客開會從來無失敗過。當佢下屬同佢講有啲客約唔到會嘅時候,佢會覺得好奇怪:吓?點解?我從未試過有人對我say no。

做marketing/PR或者headhunt嘅更加會清楚呢樣野,點解咁多sales同PR同recruiter都咁靚?唔係意外嚟㗎。

講明先,我唔係話你嘅外表define你嘅成就,我係話靚一定係做咩都有幫助,同人講句野都方便啲啦,你知唔知Fortune 500嘅CEO嘅平均高度俾一般人係高好多?(詳見Blink)人類就係下意識比較信任外表討好嘅人,學子華話齋,你喺CV度寫隆了胸都比較容易有interview啦。

個世界就係咁,我唔係自卑,亦唔覺得做人要靠樣搵食,我只係覺得如果社會係忽視咗女性工作嘅成就,唔係因為詹瑞文N年前搞咗隻事業線gag,係因為事實上:呢個世界係好多人靠樣上位。

如果你可以令到以後啲老闆請人無論係空姐定PR都唔睇樣,如果以後啲富豪係娶豬扒唔係娶港姐,如果報紙唔係日日話我知甘比係十大富豪,香港咪無呢個問題囉,無論你咩樣係男係女都唔會有人懷疑你唔係靠自己。

「事業線」只係一個gag,講嘅人目的唔係undermine你嘅努力同成就,何必咁計較?任何笑話都有個主題,唔通「人魚線」係取笑緊啲人魚?

有得靚,係福氣,做人醜同矮同肥係辛苦啲㗎。靚到俾人覺得你係靠個樣,都總好過樣又無錢又無吖,經濟學有樣野叫poverty trap,即係隔代貧窮,樣衰同矮都係一個trap,嗰啲叫遺傳,無得醫㗎。

所以下次唔好咁講喇,Stephanie,況且你咁講,下次Swarovski同Physiogel仲點好意思搵你代言呢?

 

((明明條題寫住講完但又講咗咁多))

 

 

作者:齋老味

齋老味
廣告業瘀血,世界首席鄭敬基替身。https://www.facebook.com/jerlame

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 154460
Date: 2017-03-09 19:34:30
Generated at: 2021-05-16 02:13:50
Permalink: https://www.vjmedia.com.hk/articles/2017/03/09/154460/靚就係做咩都着數啲,講完。