你以為麥當勞叔叔永遠都咁好人?傻啦~

 

當你放低啲無謂情感,睇返可以觀察到嘅現象,其實老麥換包,一啲都唔出奇;我反而仲會有啲慶幸佢咁換包法添!

首先,講下冇咗嘅三個包。至尊漢堡冇記錯嘅話,係堡加敬棄用中文名再重返香港冇幾耐之後出嘅。如果有印象,Burger King主打包種「華堡」入面夾嘅嘢,其實就係至尊漢堡嘅嘢。只不過至尊漢堡啲用料冇華堡咁好,順理成章價錢亦都平過華堡。老麥推出至尊漢堡本身就係用嚟打Burger King嘅,咁既然Burger King已經兩度敗走香港,呢個包本身就冇咩繼續存在嘅必要。

再嚟就係足三両,咁呢個包點嚟我都唔多記得,好似本身係有一輪晚市時段推出啲大份裝嘅漢堡包咁嚟嘅;當時用咗至尊漢堡用嘅厚牛肉,但隨住時日過去,塊厚牛肉已經越嚟越薄。到咗《商品說明條例》生效嗰時,老麥亦都鬼拍後尾枕咁加咗「烹調前」喺足三両後面。我個人估計,呢個包就係因為至尊漢堡材料同其他包唔可以共用(除咗個嘉頓包),於是就整咗呢個包出嚟等佢可以用下至尊漢堡啲牛肉。至尊漢堡唔做,足三両自然都會唔做。咁我冇喺老麥做過,係真唔係我唔知吖,呢度係推測多。板雞呢?睇埋其他包先。

睇下留返落嚟嘅包,除咗魚柳包之外,材料都同其他包有一定共通點。魚柳包唔死嘅原因,可能係早餐佢都有份;豬柳強亦係同理,早餐有同佢共用料嘅餐,所以可以唔死住。脆雞塊辣雞,應該係同新嘅懶豪華辣雞包同一塊嚟(冇食過唔知),不過由於自此以後我唔會喺老麥叫雞,所以我以後都未必有機會確認囉~至於板雞嘅消失,睇返個新嘅懶豪華燒雞包個樣,估計係因為同個新包定位相近(甚至連塊雞都可能係板雞塊雞嚟),為免平包同貴包爭客,自然取消埋。

又睇下三個新包,有人話三個懶豪華新包賣成四十幾蚊個餐係大陸人唔識做生意,呢點我都同意架。因為睇得出老麥嘅新媽劇婷應該係跟咗大陸老麥咁行:將老麥定位成中產享受而唔係社畜快餐。

其實唔止麥當勞,大家樂同美心返咗大陸之後都唔再將自己包裝成快餐,而係將自己包裝成城市中產生活享受嘅一種。麥當勞本身就早大家樂佢哋好多入去,當年喺大陸未真係起飛嘅時候,老麥食嘢已經係貴價嘢。我哋喺香港見慣世面就知老麥呀大家樂呀美心呀都係劣食快餐啫,啲大陸人見到佢哋貴價,又係境外品牌,就以為呢啲係高級嘢,起碼係有啲身家先消費得起;所以呢啲香港劣食上到大陸唔止冇平咗,有時仲會貴咗添(但仲劣食過香港);做市場策劃嘅,亦都自然會將佢包裝得高貴啲,亦唔會介意佢賣得貴啲添啦!

呀係喇點解我話有啲慶幸佢咁換包呢?因為佢提醒咗我香港老麥已經變成麥當勞(中國香港),啲雞肉可能會唔知邊日會變晒做中國靚雞,隨雞會附送啲咩大家心照啦~所以我唔會再去老麥叫雞食架喇~

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【遊戲新聞】一年一度 E3 遊戲展 講完無影嘅作品年年都有 by 森麻
    又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總 […]…
  • 國安法下的香港電影 by Terence Yun
    倘若國安法成為指引下,創作人又再多一重限制,這條紅線之無形壓力便走進創作人的腦海之中,無形刀壓在創作人頸上。香港沒有審批劇本制度,不同大陸,批左就可以開拍(當然亦有批左,拍左都不能上畫),而香港沒有審批,意味著創作人在創作時要估計和預計在什…
  • 八仙嶺縱火案翻案問題 by 蕭少滔
    我以下按刑事偵緝的「排除法」,讓大家客觀地重組案情。大家如有指正及補充,可以有助澄清事實的話,無任歡迎。…
  • 八仙嶺之殤——災難回顧報告 by 無妄齋
    以下為我們翻查當年事故資料所得,目的並非要指控當年誰是誰非,也無意勾起當事者的傷痛。相反,是旨在透過重溫事件經過及法庭紀錄,為讀者提供較為完整的說法及根據,並寄望從此杜絕坊間的主觀臆測,以正視聽,還世間一個公道。…
  • 2020TVB份業績——間公司由內爛到外 by 庵念慈
    去年都仲有10億廣告收入(點解仲有人會去TVB落廣告),雖然跌左一半,不過以今年TVB個情況,可能更惡劣,VIU TV搶廣告真係屌打,個個爭住落《調教你MIRROR》。…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
歡迎讚好我們的facebook page,免費資訊源源送上。

文章資訊

ID: 154589
Date: 2017-03-11 04:32:14
Generated at: 2021-06-13 12:41:02
Permalink: https://www.vjmedia.com.hk/articles/2017/03/11/154589/你以為麥當勞叔叔永遠都咁好人?傻啦~