特首選戰——八項阿媽係女人嘅道理

 

RTHK 截圖

 

隨住特首選戰臨近,坊間既評論愈黎愈多,亦都變得愈黎愈另類同光怪陸離,如同武俠小說連載,無法唔教人為之嘖嘖稱奇。在下咁岩今日無返工,不如再同大家再一次重覆幾個阿媽係女人既道理。然後你就發覺果堆百分之九十五既政論,都係馬報預測,大可置之不理。

 

1。大多數香港人無票。

無票唔單止代表呢個係一個小圈子選舉,亦代表佢係現有框架底下無辦法洗脫係唔係欽點既問題。我一早都講過,咁即係同選港姐一樣,你無權話事,只可以係梳化一邊用牙籤撩牙,一邊對佳麗評頭品足,喧嘩指點,但其實並不會影響結果。

誠然,係十分無謂,但係好多人香港人(或者動物本質)都會鍾意做無意義既野(而反而唔做正經野)。俗稱茶餘飯後話題。

 

2。"bad cop good cop"

呢種質素,同大公文匯講鬍鬚係美國大漢奸一樣,或者話林鄭係CY2.0一樣。其實一刀切入去,我既睇法係,林鄭同鬍鬚兩個都係空洞人,大家都唔知道佢地做左特首之後會做乜,除非香港人仲咁天真係度信政綱我無辦法。點樣避免type1 error?

sorry,無data,驗唔到。依家都係好似睇大戲咁,奶媽身邊多奸佞小人,佢奸D。鬍鬚睇落易D話為,似好人。係咪同五年既既豬同狼,似層相識?

更何況你亦無票,就算俾你知道佢地真實為人係點,又點?

 

3。林鄭民望低,鬍鬚民望高。但往後會點,無人知曉。

依家無政治真實討論,又係講「推測性情好唔好」,好廢。如果林鄭當選,會唔會即每日派一萬,確保人人有屋住,以狂風掃落葉姿態推埋標準工時,全民退保,然後又成為史上最偉大特首,我亦不能預料,係咪一定唔會發生。依家泛民話依照民望,隊晒俾鬍鬚,俾人批評係民主戰鬥至此一鋪清袋。就此說法,我一定唔會認同。

因為泛民係更早已經變成模糊曖昧難分一派。佢黐中聯辦好,黐埋民建聯又好,其實並不出奇。仲講咩民主鬥士呀?中二病咩。做永遠反對派先係最好。佢地心底裡面想CL贏至真呀~

 

4。香港並無民主精神。

香港精神行到依家,最多講既係「拚搏」,「打不死」。但水能載舟亦能覆舟,最慘係大多都係行功利主義,所謂pragmatic,於是最後佢地都係向錢看,賺到盡,向樓價股價看。再問一問香港人,如果民調改成:願唔願意換一個要犧牲自己財產,改善經濟結構,肯團結一心既好人好特首?梗係唔願意。

因為呢個人歷史上已經赫赫有名。就係董建華。係咪笑左?再講,胡國興點解最貼近泛民理想但都無民望?一來唔熟書,二來洗脫唔到陪跑影子,三,係因為佢話要正道。。。

但香港人大部分人係崇尚邪道,走精面,即係撈偏。生不入官門,死不入地獄。法官正氣凜然,好多人香港人邊頂得順?梗係薯片易入口好多啦。

 

5。加埋中央唔放心,要插手,係死結。

想從政制改起,就要從香港人改起。有無人肯為改變而奮鬥甚至犧牲自己前途?有。不過佢地依家已經坐緊監。而甚至俾主流社會認為:應有此報。原因,都係阻住香港人發達唶。點解黃傘多人buy,魚蛋無人buy?因為目的唔同。其實大部份人出黎都係想換特首。

換完,一切如常。中央其實肯換,香港人大多覺得中央回應左,好應該收貨。。。

 

6。係咪真係咁多人談民主、談公義、談理想?

I highly doubt。係依家既局面,就算無篩選一人一票,係人都知曾俊華贏。正如五年都係梁振英,係一樣。當然曾俊華未做,佢係咪會同689一樣咁衰係一個問號(好多人又會講左所以林鄭好D,又係好好笑)。但如果你話民意唔係現今民主制度既一部分黎,我都唔知所謂既理想民主制度係邊處地方有實現左。民粹主義係點樣發生既呢?香港面對民粹,又有幾大力量去對抗?

 

7。回到基本。我成日都講。任何形式既抗爭之前,香港要有啟蒙運動。

但啟蒙運動既然無發生。有一大班人甘於受到各樣外力愚弄,又有一大班人都係承接番香港不過係個可以賺錢既地方,賺完就可以走,咁同大陸對香港既諗法一樣。香港同大陸咪可以融合囉。大家係愛香港,認自己係香港人既本質上,就有好大分別。香港搞成咁,日日有年青人跳樓,真係人人有責任哩。俾票你,你要識得承受果一票既重量。

 

8。香港人真係識得投票?

你不如去問問香港第一大黨主席,李慧琼子吧。香港人識得叫碰,識得雞七平八。投票既野。WFC。

 

利申:我都無票。完。我會去懺悔架啦。
用三個字寫左篇無意義既野。對唔住。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 155642
Date: 2017-03-24 14:12:31
Generated at: 2021-09-23 05:33:56
Permalink: https://www.vjmedia.com.hk/articles/2017/03/24/155642/特首選戰-八項阿媽係女人嘅道理