婚後財政獨立?真係得?

(photo via cc Flickr user Kalvin Chan)

 

話說我個payroll account ,係結婚之後,都係set 左係我同塔嫂既聯名戶口。但係其實,大家唔好誤會,呢個只係一個結左婚之後叫做多左承擔既一個象徵式,D錢平時點樣駛,邊個駛,我地完全係無理。

而結左婚咁耐,其實塔嫂係無係呢個戶口到提取過一分一毫,而我亦都曾經提議過,我可以俾番咁上下數目既家用,但係佢一口就拒絕左:

我唔知要你D錢黎做乜,我自己都有份人工啦。

其實我既睇法係,可能俾下家用會更好呢,因為我唔會拎黎賭沙抄石,但係塔嫂仲要加多句:就係我唔駛靠你先好。到時如果我要著草,我都唔駛旨意你。

調番轉講,其實我又真係唔會理平時塔嫂將D錢會駛左去邊。大家管大家自己盤數,十分flexible。

我成日覺得,有D人係埋一齊,不論係咪同物質有關,覺得唔係好滿意,又唔攤開出黎三口六面講,又偏係要係個討論區度搵班人去吶喊助威,對呢段關係真係有害無益。一來,網上食花生既,多數都係搞屎棍,俾唔到好既意見你不特止,仲暗地裡插多你個另一半幾刀,成件事由有彎轉變到無彎轉。第二,其實如果你講左,可能對方先醒悟:

下,原來你係介意呢D小事架。

好多人講愛到天荒地老,包容到要生要死,但點知原來會同你講個麵包果五蚊因為係佢俾錢而唔開心的話。咁就好大鑊,因為對方隨時真係以為你一直無介意。誤會就會造成往後更多既問題。好老實講,你點知男方依家孤寒,係有咩盤算係入面?人地到時滾左一千萬出黎同你環遊世界,你係咪又唔去?

anyway,對D錢咁上心,咪唔好要窮撚囉,飛左佢囉。搵個可以係咁將D錢亂咁fing 架囉。但又調番轉講,另一個佢,會唔會都咁愛你對你咁好,仲肯將D錢係咁放係你度?就又係睇彩數囉。

都係果句啦。我搵雞碎咁多果陣,塔嫂又係同我食頹飯。到我搵多少少咁大把,我地都係繼續搭小巴坐地鐵。有時D道理好簡單,講得多就無謂啦。睇大家究竟係度追求D乜既唶。我自己就一直相信,香港仲有唔睇物質既女仔既。LOL

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 155993
Date: 2017-03-28 14:37:28
Generated at: 2021-09-23 04:13:36
Permalink: https://www.vjmedia.com.hk/articles/2017/03/28/155993/婚後財政獨立?真係得?