好多時候，我哋對一啲文本嘅第一觀感都會受呢種「物以罕為貴」機制影響，以致一啲少用或者無咁popular嘅嘢就係高級啲，而popular嘅嘢就梗係低級啲。但文本嘅「文學價值」高低應該係同「文本點樣建構出意義，發揮作用，以致產生某種特定效果」有關，而理應同「物以罕為貴」嘅機制無關。而文本嘅價值亦唔止文學價值一面，重可以包括文本喺某一個時空下嘅代表性意義。畢竟，唔同嘅語言只係唔同嘅系統，而文學藝術呢啲嘢理應超越語言嘅限制，喺唔同系統下都應該可以搵返相應嘅文學同藝術。