香港電影回暖,真係要多謝合拍片

 

香港電影每年都有一日俾人廣泛咁討論,就係金像獎當日,真係得一日架咋。我以前就講過,好多人係個日見到電視就會話「咦,點解我唔知有呢部戲嘅?」,「好似好好睇咁」,但平時個三百幾日,就會同你講「有咩好睇呀?」、「咪又係個啲」、「都唔知佢講咩嘅」,同埋最常聽到嘅「呢啲戲會睇,不過留返上網睇。」

近兩年金像獎都俾人一個錯覺,就係港產片回暖喇。but how?我地睇睇2016年香港電影(或者所謂華語電影)嘅香港票房,成功過七位數嘅只有6部,全部都係合拍片,全部都係香港導演作品。但就我個人觀感同坊間反應,除左《危城》以外,其他都無一例外被冠以「爛片」之名。當然,人地都唔care香港市場個7位數,人地係睇緊大陸個9位,10位數呀嘛。然後我地再睇尋晚有份拎獎嘅幾部名義上港產片香港票房,《樹大招風》有9百幾萬票房,排十大嘅第9、《幸運是我》有2百幾萬、《點五步》有4百幾萬,《一念無明》截至寫文嘅今日有有7百幾萬票房,大有過千萬之勢。喂阿哥,過千萬都係零頭黎咋喎,成本都回唔到,抵俾人地話你地香港人陝隘。

 

 

尋晚嘅金像獎,無論許冠文、無論陳惠敏,梁小龍、無論新藝城一堆人,都係反覆用香港電影舊時點舊時點打飛機。香港電影市場好細,要出去,唔出去就等死。老實講,我已經唔會怨恨呢班人,因為呢兩年當我唔再用一種判嘅角度去睇呢件事,我發現嘅係,其實大部份香港人對所謂「廣東話製作」、「香港製造」嘅歌影視娛樂係冇忠誠度。好簡單,你依家搭巴士,睇人地揸部手機,10個有6個一定係睇緊大陸綜藝同大陸劇集。點解?卡士勁囉,你睇下《我是歌手》、景靚囉,你睇下啲古裝片、製作認真囉,你睇下《夢想的聲音》、夠揼本囉,你睇下連黎明同郭富城都上綜藝節目,佢地幾耐冇出現係香港電視台?

之但係,當金像獎又一次係所謂港產片大勝之時,呢班人有冇諗過,點解你地手執天下資源,要劉華有劉華,要古仔有古仔,要千軍萬馬有千軍萬馬,戲院都排哂啲場俾你地,點解呢啲得個零頭嘅陝隘港產片仍然有生存空間,仍然係冇乜爭議下拎左大部份獎?說穿了,你地班人就係揸住幾十億不停拍垃圾。如果合拍片係有質素,以廣東話製作嘅電影一早就收皮喇,仲有冇人會想睇《勁歌金曲》而唔睇《我是歌手》呀?

所以,你要出去,真係唔阻你發達。無你地拍咁多垃圾合拍片,香港電影無今日看似有回暖跡象嘅今日,多謝!

 

作者:阿享

一個戒緊牛肉,但打邊爐仍然會忍唔住既耶青。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 157118
Date: 2017-04-10 15:48:04
Generated at: 2022-07-07 02:33:00
Permalink: https://www.vjmedia.com.hk/articles/2017/04/10/157118/香港電影回暖,真係要多謝合拍片