關於PTGF/PTBF,我想講嘅係. . . . . .

 

 

呢兩日PTGF/PTBF呢類「職業」喺網絡間炒返起,應該都有賴連登有個熱門Post嘅,咁入面啲連登會員就討論兼且將各大小嘅PTGF嘅個人資料呀、三圍、接客幾錢提供乜服務、仲有張唔知係咪本尊嘅相擺哂上去(用咗會員加密法),差啲可以整咗本好似日本藥房有得拎嘅無料案內所指南出嚟咁款。其實諗返轉頭啲對話Cap圖同啲相如果唔係本尊,純粹為咗釣條水魚上岸買點數卡、江湖過數救急吖,定係要約出嚟霸王硬上弓?其實喺無真憑實據底下,拎住啲Cap圖講自己個FD做緊PTGF/BF咁又公唔公平呢?咁到底PTGF/PTBF 對連登巴絲、乃至社會大眾有乜影響呢?不如就呢啲嘢一齊集思廣益吓啦。 :o)

 

PTGF同PTBF係咪等同於賣淫?

即係咁講,出租女友/男友呢樣嘢,又唔一定會牽涉到性交易嘅層面上嘅。好似再早多四、五年前興起嘅「援助交際」咁,當中提供呢種服務嘅人都唔係話一嚟就上床呀、扑嘢之類,反而係扮吓男/女友,畀個客感受吓「拍拖」嘅滋味,呢種「拍拖」嘅方式同感受又係咪真正嘅「拍拖」,恕筆者唔喺到討論咁多,畢竟「味覺」同「感受」嘅嘢都好主觀,有人試完可以話係真,又有人可以話感情用錢買唔到返嚟。總之,並唔係每個PTGF/BF都好似連登所講:「雞,全部都係雞!」有時候可能你開到個價都未必有人睬你呀。凡事都有兩面睇嘅,有人賣身,都可以有人守身如玉嘅,莫論呢件事都係統稱PTGF/BF定點,一陣唔小心舂個頭埋去中伏,一行埋去就問:「How much per Q?」反而失禮嗰個可能係自己咁就唔好啦,所以呢,做人都係睇定啲好,一陣又畀人話物化女性可恥就唔好(咁物化男性呢)。

 

叫得做PT,係咪因為做唔到Full Time先做Part Time?

嗱,筆者就覺得人哋可能本來就有個Full Time大將軍/皇后喺身邊大家都未必要知,咁有冇必要做你Full time,出得嚟行係為咗搵快錢定搵快感都好,開宗明義佢都唔會係需要你個人,係你份「家用」對唔對得住佢啫,其實「一樓一鳳」對住啲客都係Part time嚟㗎,除非個客有本事包養佢哋成世而佢哋又肯,咁呢件事咪係山雞都變鳳凰嘅活例子,呢個時候諗到筆者諗起嗰篇叫雞叫沉船嘅潮文 :o),唔係你嘅嘢你叫十次春都唔會變成你嘅Full time,可能咁好彩畀你Part time形式享受過嘅,咪當曾經擁有過囉,就好似「初戀係一世,現任係一時」咁,或者長揸唔到喺手嘅嘢大家先會越有興趣去知、去爭、去試。

 

好人好者點解要做PTGF/BF,正正經經唔得嘅?

當我哋講緊個社會講緊「民主自由」呀、「身體自主」呢類嘢嘅時候,筆者就唔覺得我哋需要專登限制佢哋做乜做物,話之PTGF/BF係當自己做緊社會實驗定真係搵快錢都好啦,只要佢哋無影響到社會大眾,同時協助到真正有需要嘅人解決佢哋嘅難處之後,呢件事又係咪大家想像中咁壞同觀感咁差呢?點解性工作者、援交、PTGF/BF呢幾類型「工種」可以喺香港維持到,某程度上都證明佢哋係有價有市,有需求自有供應,經濟學嘅嘢就唔多講啦。好老實講,呢兩日見到各大社交平台啲群情咁洶湧就知大家對佢哋都好有興趣,就算唔做恩客都好想了解佢哋點解要「入行」,跟住就會問點解咁多「正行」唔撈要撈「偏行」,筆者就覺得人人對「正經」嘅界線都好唔同,可能有啲人覺得個身體係佢哋自己嘅,用自己身體去換取資源係無問題嘅,又可能有啲人話個處唔留畀老公/老婆就係唔忠貞,反對婚前性行為云云。回歸基本步先,只要呢幾類職業所做嘅行為無影響其他人,例如:定期身體檢查、安全性行為、唔係畀人唆擺、強迫之類,其實問題又並唔係咁大嘅。同埋大家覺得PT就等於Public toilet咩,你揀人時,人哋都會揀返你,我諗大家他朝一日走去幫襯做返個社會實驗嘅時候,都會去選擇返啲乾淨、企理、白白淨無性病咁,同樣地,你拎把尺度人,人哋把尺分分鐘長過你都唔知,到時無你份嘅又算唔算公廁呢?諗住去試/試過嘅人又算唔算唔正經呢?呢啲道德問題都好值得大家去反思吓嘅。。

 

去到尾,筆者覺得與其去喺呢個「工種」上面爭論啲女正唔正、會唔會係真、佢哋係咪好污糟之類嘅嘢,不如諗吓性工作者、援交、PTGF/BF佢哋對社會嘅道德同價值觀上帶嚟乜嘢嘅衝擊,諗吓啲人點解接受到或者接受唔到佢哋嘅存在,而香港依家正正係有一群人依靠呢種職業維生/賺零用錢,我哋口講就話「職業無分貴賤」,咁佢哋嘅存在又係咪踩中大家條「道德的底線」,所以大家寧願停留喺「雞,全部都係雞」、「咪又係雞」、「你條女係雞,三萬蚊過夜呀」呢啲一錘定音又無討論空間嘅說法,都唔去了解吓佢哋因乜而要咁做呢?喺呢件事上面,我就覺得大家好需要去了解同知多啲做緊工作者、援交、PTGF/BF嘅人係點睇自己,同點睇啲恩客,嗱講明先,筆者完全唔係要幫任何人講好說話,淨係想開放大家嘅討論,咁多位讀者有乜高見都可以分享同留言講解吓,大家一齊多角度思考嘛。

 

作者:健華

90後廢青,如果你認同我的文章,可以多留意一下輔仁媒體的廣告及其他文章,以表支持,如對文章有任何疑難,歡迎PM。fb: https://www.facebook.com/KelvinKinWa.7

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 158081
Date: 2017-04-23 05:00:16
Generated at: 2021-06-23 22:21:57
Permalink: https://www.vjmedia.com.hk/articles/2017/04/23/158081/關於ptgf/ptbf,我想講嘅係