肥仔一跌落河就連部單車都失去. . . . . . 共享單車投河事件

 

我諗大部分香港市民都同筆者一樣,唔係新聞講單車飛落河都唔知沙田嗰邊有樣嘢叫共享單車,雖然以前有係咁易上網睇過其他國家有呢樣嘢嘅存在,但真係估佢哋唔到竟然夠膽喺香港搞呢門生意,嚟咗唔夠一個禮拜就連啲單車都接二連三咁畀人飛落城門臭河。先唔講香港人平日會唔會咁有雅緻踩單車返工返學,就算有都一定係小眾,再加埋香港呢個市場主導嘅城市,淨係望一望啲租借單車舖頭都式微緊,啲設備又溶溶爛爛咁都唔翻新/維修,就知租借單車市場有幾咁蓬勃啦,既然有過江龍過嚟香港玩命,梗係要睇吓佢乜料嚟先啦係咪?

 

共享單車係乜玩法?係咪香港獨有㗎?

共享單車,顧名思義係一部單車,可以供應畀唔同嘅人使用,而用法都係大同小異,就係要先下載所屬公司專用嘅Apps,開設帳戶再以信用卡作為埋單找數嘅交易工具,要用單車嗰陣就用去最近嘅共享單車場搵部無穿無爛嘅共享單車,輸入返車身編號就可以踩車,還嘅時候就泊返去指定嘅位置(有啲國家是但擺低唔阻路就ok),再輸入返車身編號就會直接用卡埋單找數,一般都係按小時計嘅。而共享單車就唔係香港獨有嘅,目前有嘅國家分別係英國、新加坡、鄰國等等,只係香港依家得一間公司獨市做緊共享單車呢門生意,直接影響緊傳統租借單車嘅舖頭。共享單車就咁聽落去好似好方便、乾手淨腳,又無乜害處咁,事實上又係咪咁呢?

 

共享單車嘅衍生問題係啲乜呢?

講香港之前,恕筆者離一離罩講吓第二啲地方先,其實共享單車喺嚟香港之前,喺各大小地方都出哂事,比如新加坡啲單車係任人掉喺路邊當還咗車,如果咁不幸你泊咗㗎車喺啲Café外面諗住買杯嘢飲、休息吓再踩,可能出返門口部車就畀第二租咗去踩,跟手你又要搵過第二部車,其實呢個問題都未算太大,望吓我哋鄰國,佢哋都係近期先引入共享單車呢樣嘢,眾所 _ 知鄰國人民質素之高,有邊樣嘢佢哋做唔出呢?先嚟個用共享單車佔領公園,一到放假就湧去租部車先,人同車嘅比例係一比一,基本上推車仲多過踩車,依家係咪興國民老漢化,放假都要全民推車先安樂。其次就係鍾意偷呃拐騙嘅鄰國人知道成部車偷咗去都踩唔到,隨即諗咗兩個方法去解決呢個問題:1. 將成部車飛落海/河/湖,同歸於盡。(話說第一個喺上海掉㗎車落海嗰個都係香港人)2. 成個車偷唔走?咁咪拆走佢啲零件將佢由公家雞變做私家雞,共享變私享,踩車人的事不能叫偷,係叫拆件,轉個手又可以無本生利,無成本嘅嘢。啲單車賊怕咩做吖。最後就係我無得踩你都唔可以有,將啲不明來歷嘅針放喺啲座位上面,等啲用家一個唔留神就畀佢地插到滿肛紅,呢單嘢搞到筆者諗返起鄰國啲交通工具座位有乜愛滋針呀,盒裝飲品有乜乜毒咁,似乎佢哋搞啲乜都可以輕而易舉咁醜化件事。轉返去香港睇,我哋暫時見到嘅就係部共享單車屍沉城門河、啲單車佔領哂公家泊車位唔使畀舖租、搶咗本地租借單車舖啲生意… …但筆者覺得最主要嘅問題都唔係呢啲嘢,請問一眾香港人覺唔覺得香港係一個適合以單車代步嘅城市?如果唔係,咁共享單車公司同香港政府到底係為啲乜要推廣共享單車呢樣嘢,先係成件事最核心嘅問題。

 

(座裡藏針會唔會喺香港人學習鄰國人嘅下一個步伐?)

 

如果政府係想單靠共享單車嚟令香港市民做多啲運動、以單車代步減輕公共交通負擔、推行綠色生活、智能化生活… …各種出師有名嘅原因都好,如果政府可以就咁將個波射落一間私人企業到,諗住間公司可以幫你做到哂以上嘅目標,咁諗未免太過大諗頭或者太天真啦掛,無論畀幾多支援佢哋(更可笑嘅係啲支援根本就廢嘅,容許共享單車泊喺公家泊位方便人用),但核心問題唔自己去解決嘅話,做幾多嘢都只係於事無補,老實講,香港嘅城市規劃真係亂嚟,有邊條路真係適合市民全程以單車代步,你同人講踩單車過海幾乎無人想睬你,喺市區又得條車路踩到單車,初學者分分鐘喺馬路擦到吓㗎車就會連命仔都無埋,老老實實政府要搞呢啲錦上添花嘅嘢之前,可唔可以實實在在改善吓城市規劃,唔係亂咁賣地起樓就算。香港地,小人多,係呢件事上面,恕筆者唔想做金田華/柯華調查邊件垃圾掉㗎垃圾車落垃圾河到,之不過呢,呢啲來佬嘢永遠嚟親香港之後都實無好嘢發生,自由訂價呀、回收再造之類,實會有啲無公德心嘅人玩串個Party,將一樣本來原意係好嘅嘢玩爛,比如今次將啲單車飛哂落河嘅人,唔通涉事條友仔覺得會有城門臭河神飄上嚟問你:「請問你跌落河嘅係銀單車,抑或係金單車呢?」唔好玩啦大佬,本來條城門河質素已經唔係好,仲要係咁拋啲嘢落河做乜啫,唔該佢唔好再影衰香港,同唔好污染香港啲公共環境,條河唔係你個垃圾筒,再者有乜恩怨咪公開解決佢,影響啲無辜嘅市民做乜。

 

作者:健華

90後廢青,如果你認同我的文章,可以多留意一下輔仁媒體的廣告及其他文章,以表支持,如對文章有任何疑難,歡迎PM。fb: https://www.facebook.com/KelvinKinWa.7

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 158202
Date: 2017-04-25 04:31:15
Generated at: 2021-06-23 23:41:36
Permalink: https://www.vjmedia.com.hk/articles/2017/04/25/158202/肥仔一跌落河就連部單車都失去-共享單車投河