成功爭取失婚救濟金

(photo via cc Flickr user Wanai Piyakulchaidej)

 

「喂?」

「阿寶,生日快樂呀!」

「你打黎一定無好死。」阿寶聽到我把聲,依然唔敢相信我打黎淨係為左句生日快樂。

「嗯……咁嘅,你仲記唔記得呢幾年我哋同學擺酒,人人去酒店都係夾九舊而唔係整數一千蚊?你都有份架!」

「……係呀!你地叫架嘛。我哋圍內都成廿個人,次次都夾少一百蚊,其實為咩?」阿寶以為有著數,終於卸下心房,認真聽我講野。

「我哋覺得雖然結婚係一件好值得開心嘅事!但你知啦,無理由次次都得一對新人開心,其他未結婚,或者未有伴侶嘅人就要出錢出時間去飲架嘛!有見及此,喺好耐好耐以前!姐係Once upon a time,第一個結婚嘅方頌瑩同學,就提出左一個劃時代既建議:每次結婚,新人喺人情入面撥出十分之一放入基金!交由班會財政——姐係我黎保管。到左三十歲,未結婚嘅時候就可以按返當時生日嘅次序黎領取救濟金。」

「救濟金?咩救濟金同我生日有關係?」

「係呀,有見於30歲過後,已經步入適婚年齡既中後期,有好多pre-中年婦女例如閣下需要儲錢買姑婆屋啦,行街扮靚買衫化妝啦,報多兩個courses黎充實自己啦……as we all know香港地咩都係錢,呢筆救濟金符合到大家嘅需要,達到自己開心人地又開心既目的。」作為專業既救濟金管理人,有人問到呢筆錢既成立背景,當然唔可以含糊!

「頂你咩姑婆屋呀!性別歧視呀!你地啲男人30歲無結婚唔緊張既!唔洗行街扮靚買衫化妝,淨係打機得啦你地!咁大個人都唔化嘅,拎埋啲錢去買game啦未來獨居老人!幼稚鬼!聽住呀!你地男人咁唔識照顧自己,小心老左失禁連換片都唔識呀失婚老男人!」阿寶忽然連珠炮發,睇黎非常之唔滿意我嗰段加左「例如閣下」。

「……」我啞口無言。
「Excuse me。」口出惡言之後重識講Excuse me,阿寶果然係一個知書識禮既讀書人。

「咁我無野問啦,下個月小雲生日,我打去問下佢申唔申領救濟金先,你地個個都唔拎,到十月嗰時我生日,幾萬蚊就袋袋平安!」利益申報:我都有機會接受呢筆錢,中年男人無人照顧其實都好慘好可憐。

雖然我覺得應該未去到賴屎既。

「幾萬蚊?咁多錢點得黎!」阿寶無預到自己拒絕左一筆唔少既錢。

「首先當然係之前結婚新人既慷慨捐輸,另外喺Bianca同佢老公Gabriel結婚既時候,兩位新人……或者叫善長一時興起加碼每人另捐5000投放到基金裡面。早幾年受惠於豪門曼聯陷入低潮,同埋李斯特城喺英超歷史性封王,救濟金總額依家已經達到47120港元……係前所未有咁高。」黎到呢度我覺得要比啲掌聲自己。

「你仲拎啲錢去賭!話時話,Bianca之後離左婚,依家都未夠30歲,咁又點計?」阿寶幸災樂禍。

「我作為失婚救濟金既管理人,為左大家嘅福祉,當然唔會比Bianca再次申領失婚救濟金啦!成件事好serious架嘛!不過你既然唔要就算啦,反正到左十月,無人要筆錢就係我架啦哈哈哈哈!」我笑到好似終極大魔王喧,切合返我十月尾出世,天蠍座非常神秘既性格特質。

「我都係要啦!幾萬蚊無理由益你,但我唔算等錢洗,嗯……等我諗下我近排有咩要用錢先。」阿寶明明未諗到都拎左先,正宗損人不利己。

「呃……咁呀,因為班入面仲有其他人未結婚,而且失婚救濟金既原意都係想大家開心下,如果第時結左婚……舊錢要退返一半出黎比有需要既人架……」

「如果我結婚,舊錢全部退返晒出黎,你地連人情都唔洗比,成舊錢放入救濟金,Happy?」阿寶一向爽快。

「Happy!我喺度代其他同學仔多謝你先!聽日我就同其他股東交待返今天會談結果,同日會將港元47120存入你既銀行帳戶。」

「無其他野啦嘛?」

「呃……無啦,不過你頭先講,我可能第時變成獨居老男人,屎片都唔識換,你都講得岩既,咁依家大家都單身,你第時都可能失禁架嘛!咁你可唔可以考慮下同我……」

「唔可以。」阿寶已經收左線。

失婚救濟金真係一項好好既發明,新人高興之餘,亦到照顧到未婚既人,更重要嘅係,藉住呢舊錢,可以令友誼更加長久,關係更加穩固。每有一個人結婚,除左佢地本身洋溢既幸福,同時亦代表筆錢會愈黎愈大,新人留低既,都係一份心意而唔係一份負擔。其他人作為座上客,睇完千篇一律既新人成長片段,拍手都拍得大力啲。

良緣締結,佳偶天成。
失婚彩池,有你有我。

 

 

作者:求其花

求其寫,求其賣,求其志不求奢華|求其真,求其愛,求其花不求其果

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 158371
Date: 2017-04-27 08:20:22
Generated at: 2021-09-19 15:55:44
Permalink: https://www.vjmedia.com.hk/articles/2017/04/27/158371/成功爭取失婚救濟金