五千年「燦爛」文化

 

睇紀錄片講納粹德國嘅崛起,希特拉 1923年啤酒館政變失敗,到 1933年上台,中間只係經過十年。到佢完全沒落(1945年4月自殺),又係大約十年多少少。有紀錄片話其實某程度上可以將二戰睇成係一戰嘅延續,最低限度,一戰嘅凡爾賽條約對一戰後德國,對希特拉上台,有一定嘅間接作用。而二戰喺 1945年結束,納粹德國喺果十年做過好多喪盡天良嘅事,戰後德國去納粹化,短短幾十年已經面目一新,即使東西德合併,共產勢力正式退出歐洲歷史舞台只係大約二十零年嘅事。有趣嘅係,納粹法西斯主義雖然都係一種威權主義,但佢係反共嘅。

望下東方一個「偉大民族」,同樣係被共產主義、威權主義催殘乃至到今日依然統治,但係底下嘅社會、人民,係呈示唔到果種嚮往自由,解放人性嘅動力,反而越來越多為威權歌功頌德,甚至呈現出支持暴力嘅民族主義傾向。再望遠少少,日本社會,一樣有唔少人反思,話日本嘅民主只係由美國「裝粒 CPU」咁直接放入去,日本社會嘅封建思想,「東方儒家主義」思想其實一路揮之不去。

咁假如呢種講法有參考價值,似乎喺我哋睇偉大聖國嘅時候,就要考慮埋呢個地方自明清以來就係處於一種「歷史上必然沒落的封建制度」之中,而其歷史潮流既然係一路衰亡敗退緊,咁即使佢中間嘗試過幾多次「中興」,其本質依然係一路向住衰亡退走嘅。有本書話明代朱元璋係少數講明唔會實行「仁政」嘅君主,認為明清兩代對人性極盡扼殺之能事。當然,同一時間有人認為明清兩代都有唔少可取之處,唔同史料有唔同嘅解讀。但當我哋併埋唔同地方嘅歷史睇,不免就會令人疑惑,會唔會係長達五百年以上嘅衰落封建統治,已經令某些文化成為一種「文化基因」,自自然然地繼承咗落去呢?呢套文化基因唔一定全部都係壞事,但總體嚟講某些特質就係阻礙咗社會發展同蛻變。

即係話,君君臣臣父父子子之類嘅概念,如果追求社會結構穩定,未必係壞事,但如果社會發展要求更多,就有可能成為一種桎梏。上面只係一個可能嘅例子,但整體概念就係咁。亦因此,呢個東方嘅偉大聖國五百年嚟雖然維持住一種「一線國家」嘅頭臉,但實際上佢嘅社會整體風貌只係一路衰落緊,裡面嘅人縱使個別有天縱之才,但整個社會依然係顯露出一種無法自我改進,無法解放人性嘅面貌。我覺得因此希特拉死後只需幾十年,德國就可以解放同進步,但係偉大嘅聖國喺大魔頭死後幾十年,果種蒙蠻,無知,對威權嘅崇拜幾乎無減弱過。我認為過往果五百年嘅「教育」,實在應記一「功」。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 158401
Date: 2017-04-27 17:00:28
Generated at: 2020-08-15 21:17:27
Permalink: https://www.vjmedia.com.hk/articles/2017/04/27/158401/五千年「燦爛」文化