天下烏鴉一樣黑——韓國酒吧遊

 

話說去韓國應該都冇咩好寫,不過第一次去韓國做嘢,喺韓國留學嘅朋友就帶我落咗一次酒吧,咁就發現咗,原來韓國的酒吧文化,同香港其實好唔同。

文章大綱我依家就可以講,其實去到邊個國家的大部份酒吧,都想係搵吃架喇,「天下男人一樣咸」係咪?落得呢啲地方,識到咩人,咪自然有咩結局囉,不過咁,原來韓國呢個地方,可能比我哋想像中更為開放。

首先,喺韓國人口中「酒的店」有好多的,一啲係睇韓劇成日見到女主角坐喺啲食店入面飲酒,呢種其實係韓國都好常見,好多時都收到好夜甚至通宵營業既。

 

 

​而另一種都好常見嘅就係落一啲有得跳舞有DJ打碟嘅,喺我哋香港人口中,就當然喺club啦,而我當日去弘大的酒吧街,開得最多最多,就係呢一種,播歌大家跳舞識人俾人識俾人抽水抽人水嘅club,啲後生韓仔韓妹都好鐘意呢啲。

 

 

至於係咪好似google大神俾出嚟咁風光如晝,我都唔知了,而我只係知,呢啲club,每到星期五呢個hot day,大家都會去到呢啲門口出面排哂隊,等入場,仲神心過返學,而啲職員都比香港嘅進取,佢哋會不停拉人入去,會不停撩你講野,會有個靚女跑去你面前叫你舉高手,做咩?數人頭打印仔落你手背,之後帶你入場囉。

 

 

而我當日去呢,就唔係以上兩種,而係去一啲我留學韓國嘅香港朋友口中一啲hunting bar,韓國一啲人口中嘅talking bar。簡單講,落得呢啲場都係想識人,比起落club都更直接,跳舞都叫係咁易身體接觸你唔知有冇下文架嘛,呢度,侍應會安排男士分別坐分去唔同嘅檯度,有女仔入黎,就會安排佢地坐落是但一張檯,如果岩心水,就會主動撩你傾計,格局同香港嘅清bar好似,暗暗地一圍二圍咁坐係度,唯一唔同呢,呢度擺到明就係俾人搵食,如果香港你冇啦啦想坐去某一台靚女度飲酒識吓女,分分鐘俾人媽媽聲。

呢類型嘅酒吧其實係香港好少見,不過我想講,唔好信啲咩youtube片講,可以好安心去當識下韓仔,都係果句,天下男人一樣咸,點解同你傾計?你估真係交流英文咩?佢哋去得呢啲bar,一係就係club場帶嚟見下真樣,最後都係想一個入嚟兩個走,去邊?附近弘大大把hotel係呢啲bar附近架~

 

 

而如果你唔識韓文,分分鐘真係雞同鴨講,朋友講,其實係呢啲地方識到嘅韓國男仔主要見到一係暖男型細佬型,會幫你斟吓水,見你醉就叫係飲少啲,一係就好進取,會不停同你skinship,搭吓你膊頭,放隻手去你屁股後面,掃下你,而當晚我個位唔識飲酒嘅同事,就岩岩好遇上呢種男仔坐喺旁邊,好在嘅係,同行嘅人好多,咩事都冇發生過,雖然我唔知其實位同事其實係咪想有事發生.....

題外話,韓國呢啲bar經已玩到有套餐乜乜乜,幾支酒,加兩款小食都係幾萬won,而我果位係韓國留學學壞哂嘅朋友,仲會不停叫整一杯燒酒炸彈俾我地一行人飲,一sort青提味燒酒加一sort啤酒,鐘意飲酒嘅人可以試吓,不過呢種溝酒其實易入口唔易醉,想醉又想呃下人,記得揀返普通燒酒溝啤酒,因為果汁味嘅酒多數都好低濃度。

 

 

最後就一定要講嘅就係,香港你飲酒,最多就會見到有啲企街姐姐向你揮手,但韓國就唔同,啲派傳單嘅人心知你地唔會接架喇,佢哋會一嘢扔哂落地下等你地自己睇,成條街都係宣傳單張,上面印住個電話,有個性感女人,打過去有咩搞?就要等你去韓國試下寫返篇食評話返俾我知喇。

 

 

至於我當晚點?咪照顧果位醉左嘅同事囉~~

 

 

作者:Sunshine

Sunshine
無限的宇宙裡,人和物質的山,水,遠村,雲樹,又如何比得起?然而人的思想可以超越到太空裡去,它們卻永遠只在地面上。《山中雜感》--冰心 FB PAGE: 陽光燦爛的 Sunshine

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 158423
Date: 2017-04-27 17:49:04
Generated at: 2022-01-19 05:42:48
Permalink: https://www.vjmedia.com.hk/articles/2017/04/27/158423/天下烏鴉一樣黑-韓國酒吧遊