真實之軒轅黃帝

 

都話,讀歷史真係要讀原文。《史記》原文其實唔難明白。唔知點解,我地嘅中史書反而有時會亂吹,咁我就拉番本《史記》原文出嚟讀,放開以前嘅固有諗法,直接理解太史公講咗啲咩嘢。

咁就由第一本《五帝本紀》開始,原來真實嘅黃帝同佢嘅時代,同以前學嘅都幾唔同︰

《史記。五帝本紀》

黃帝者,少典之子,姓公孫,名曰軒轅。生而神靈,弱而能言,幼而徇齊,長而敦敏,成而聰明。

軒轅之時,神農氏世衰。諸侯相侵伐,暴虐百姓,而神農氏弗能征。於是軒轅乃習用干戈,以征不享,諸侯咸來賓從。而蚩尤最爲暴,莫能伐。炎帝欲侵陵諸侯,諸侯咸歸軒轅。軒轅乃脩德振兵,治五氣,蓺五種,撫萬民,度四方,教熊羆貔貅貙虎,以與炎帝戰於阪泉之野。三戰,然後得其志。蚩尤作亂,不用帝命。於是黃帝乃徵師諸侯,與蚩尤戰於涿鹿之野,遂禽殺蚩尤。而諸侯咸尊軒轅爲天子,代神農氏,是爲黃帝。天下有不順者,黃帝從而征之,平者去之,披山通道,未嘗寧居。

東至于海,登丸山,及岱宗。西至于空桐,登雞頭。南至于江,登熊、湘。北逐葷粥,合符釡山,而邑于涿鹿之阿。遷徙往來無常處,以師兵爲營衛。

官名皆以雲命,爲雲師。置左右大監,監于萬國。萬國和,而鬼神山川封禪與爲多焉。獲寶鼎,迎日推策。舉風后、力牧、常先、大鴻以治民。順天地之紀,幽明之占,死生之說,存亡之難。時播百穀草木,淳化鳥獸蟲蛾,旁羅日月星辰水波土石金玉,勞勤心力耳目,節用水火材物。有土德之瑞,故號黃帝。

黃帝二十五子,其得姓者十四人。

黃帝居于軒轅之丘,而娶于西陵之女,是爲嫘祖。嫘祖爲黃帝正妃,生二子,其後皆有天下:其一曰玄囂,是爲青陽,青陽降居江水;其二曰昌意,降居若水。昌意娶蜀山氏女,曰昌僕,生高陽,高陽有聖德焉。黃帝崩,葬橋山。其孫昌意之子高陽立,是爲帝顓頊也。

咁呢,第一段,講姓名嗰啲基本資料,至於「生而神靈,弱而能言,幼而徇齊,長而敦敏,成而聰明。」就同北韓宣揚金三世「3歲就會開槍,9歲時能射中移動的目標。」「沒有不會的運動,籃球勝過NBA選手。」無咩分別。太史公惜字如金,點解會寫埋呢啲膠嘢?

第二段開始,就講事件,雖然簡略,但很清楚。首先,黃帝唔係第一個天子/天下共主,因為佢前面仲有神農氏,黃帝係取而代之者。唔好理之前有幾多個人話事,《史記》就係由「神農氏世衰」、黃帝崛起開始。

而「神農氏世衰」、「諸侯相侵伐」就係天下由統一而分裂,班諸侯為咗爭地盤而相侵伐,咁軍費大升就焗住「暴虐百姓」。都講到明「世衰」,呢個天下共主當然無力維持國際秩序,咁就要等新一個世界警察出嚟收拾殘局。

黃帝係點搞掂個局嘅呢?「習用干戈」好明顯係發明咗新武器「干戈」而「習用」,並變成好打得。跟住當然係搞好內政「軒轅乃脩德振兵,治五氣,蓺五種,撫萬民」。「度四方」,應該真係搵人去度地,畫地圖,孫子都話「不知山林、險阻、沮澤之形者,不能行軍」,黃帝天生聖人,一定會度掂啲路程,查探好敵人,先至出手。「教熊羆貔貅貙虎」唔係真係教野獸打仗,而係練兵搞咗三個有名號嘅兵團「熊羆」「貔貅」「貙虎」,真係未見到已經可以嚇下班契弟。

咁黃帝崛起就要打低班「相侵伐」的諸侯。而一開始嘅情況卻是「蚩尤最爲暴,莫能伐」,即係黃帝有新武器係勁,但仍然唔夠蚩尤打,所以「莫能伐」,係唔敢打。於是,黃帝就搵咗炎帝嚟開刀,炎帝真可憐,同薩達姆一樣,被安個「欲侵陵諸侯」的借口︰黃帝話炎帝「想」侵陵咋,炎帝係未侵陵架!總之黃帝要搞帝國主義,邊個弱就蝦邊個。太史公無寫細節,但黃帝要「三戰,然後得其志」,即係打咗三次會戰都消滅唔到炎帝,於是同佢搞咗個和約,炎帝認細佬,黃帝做大佬。

黃帝打贏咗炎帝,勢力有所增強,就打蚩尤。「蚩尤作亂,不用帝命。」不過係黃帝發動戰爭的借口,總之,黃帝唔係自己一個去打,「徵師諸侯」即係動用聯合國部隊,最後「與蚩尤戰於涿鹿之野,遂禽殺蚩尤」。打贏咗,就正式取神農氏之代之,先至有「黃帝」的尊號。

但係,黃帝打完蚩尤係咪就天下太平呢?唔係喎,「天下有不順者」,好明顯,黃帝係征服者,唔似係王天下,好多人唔順超。「黃帝從而征之,平者去之」黃帝係邊個唔妥佢就打邊個,打完又要走,雖遠必誅,要「披山通道,未嘗寧居」。黃帝根本係周圍打仗,仲要去啲無路開路嘅不毛之地,總之無日安寧。

「東至于海,登丸山,及岱宗。西至于空桐,登雞頭。南至于江,登熊、湘。北逐葷粥,合符釡山,而邑于涿鹿之阿。遷徙往來無常處,以師兵爲營衛。」

睇第三段,就知黃帝唔係坐天下,而係周圍去,去嘅範圍仲好大,「東至于海,登丸山,及岱宗。西至于空桐,登雞頭。南至于江,登熊、湘。北逐葷粥,合符釡山,而邑于涿鹿之阿。」差不多成個中國大陸去晒。佢帶住啲兵周圍去,過住「無常處」、「以師兵爲營衛」嘅恒常戰爭狀態生活。

跟住就講黃帝點治國,係有分工嘅,「置左右大監,監于萬國」,搵咗「風后、力牧、常先、大鴻以治民」。至於「萬國和」係一種軍事鎮壓之下的和平。「鬼神山川封禪與爲多焉」就係同秦始皇一樣,帶住兵周圍耀武揚威,封禪留低呢度係我地盤嘅標誌,有不順者就鎮壓。而喺黃帝時期,科學技術進步,農業就「時播百穀草木」,畜牧就「淳化鳥獸蟲蛾」,都有做到好事。跟住講下咩「土德之端」,就附和緊太史公時代流行嘅五行之說。

咁「黃帝二十五子,其得姓者十四人。」仲有十一個去咗邊?「其得姓」即係分到地立到國,有地盤先有姓者。另外十一個,無講。太史公咁都講?就係側面說明,去到黃帝時代,帝王之家,王子之類,死亡率都好高,唔係個個有得分地建國,更唔好話只有一個可以繼承大統。

最後就講傳承嘅問題,「嫘祖爲黃帝正妃,生二子, ……」,首先,黃帝開始都三妻四妾生一大堆,所以,三妻四妾先至係中華傳統文化,幾時香港政府放棄英殖遺粹,俾番男人納妾?其實,咁樣對成蟲、大劉等人的女人會有保障好多。講番黃帝,咁正妃生咗兩個,其餘廿三個就即係庶出。而太史公就強調正室仔繼承大位係正當嘅,要強調呢兩支都「其後皆有天下」。

黃帝應該做咗好多年皇帝,最後係皇孫登基繼承,「高陽有聖德焉……其孫昌意之子高陽立,是爲帝顓頊也」。英明君主得享高壽,佢啲仔女等唔到都好正常,王孫又掂,咁隔代傳位對王室有利,咪做囉。幾千年後,大英有個事頭婆都做咗好耐,佢個仔查理斯王子應該都等到無咩癮,寧願冒被廢的險都要娶個一生中最愛,反正個仔睇落幾有Potential做個好英王,咁隔代傳位,又有何不可?

 

下一篇就講到我地老師好推崇嘅堯舜同禪讓,太史公原文點講呢?

 

作者:白恩樑

好讀書,不求甚解,每有會意,便欣然忘食。(陶潛《五柳先生傳》) 為天地立心、為生民立命、為往聖繼絕學、為萬世開太平。(張載) 子曰:「飯疏食,飲水,曲肱而枕之,樂亦在其中矣。不義而富且貴,於我如浮雲。」(論語.述而) 創業要準備一桶血,而最大的創業就是打天下。(王強,《亞洲週刊》訪問2009)

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 158771
Date: 2017-05-01 05:12:01
Generated at: 2021-12-09 06:31:38
Permalink: https://www.vjmedia.com.hk/articles/2017/05/01/158771/真實之軒轅黃帝