我又講下我覺得「un翻啅able」的旅遊城市

 

突然見容總係度推《一人一個最「un翻啅able」的旅遊城市》,我係第一次睇,睇完其實諗返其實我都幾鍾意上海,不過只限生煎包小籠包,對其他嘢冇乜留戀。果度地鐵十點幾就收wtf?! 有無咁早收皮呀咁大個城市中國最大金融中心喎十點幾就冇地鐵冇嘢呀嘛。

我又講下我冇乜特別點都唔會去多次嘅城市。

 

1。首爾

對韓國本身冇乜特別好感或者抗拒,如果唔係果陣Niantic係果度攪Ingress anomaly我都唔會主動去韓國(如果唔知咩Ingress 可以睇下呢篇 我有玩Pokémon GO,但更加鍾意玩Ingress)。

我住明洞附近,去到首爾機場就搭機場線係首爾站轉地鐵。我拖著行李轉車個陣完全無出閘我好似行咗成公里,仲要唔係平路要行上行落,中間應該係設計問題無得避有好多上十幾廿級又落返去果啲西設計。大佬呀首爾站呢啲大站預咗多遊客架啦𨋢有無多部又要行上行落咩設計嚟架。

其次就買嘢啦,韓國啲shopping真係完全唔啱男人去。我去咗幾個行街熱點都買唔到想買衫褲嘅嘢,最後我成個韓國trip除咗零食買到嘅就只有一個港紙百頭嘅公事背囊,無啦。成個trip好似淨係食嘢吸引到我,個豬血腸係幾好食嘅。個人唔係幾好炸雞嗰啲,所以成個trip都係食啲傳統嘢多,同埋燒肉。

最worthy嘅就應該只係響內藏山睇紅葉,真係好震撼好靚,接著第二日我去南怡島睇紅葉都覺得冇乜嘢因為兩個地方差太遠,直情覺得有少少晒咗,應該南怡島先再內藏山咁就唔會咁後悔。

 

內藏山紅葉~

 

2。大阪

小弟對日本認識唔係好夠,淨係去過兩次東京之後一次大阪連阪神,不過大阪比起東京真係冇乜嘢好玩,起碼我仲會想再去多次東京。

離開首都諗住食嘢會平啲,點知大阪物價其實都係同東京差唔多。而且景點又少同散,如果有朋友叫我講返大阪有咩地方一定要再去我真係講唔出。好多地方都係去一次就夠,唔會再去,好似黑門市場,去一次感受下算啦,下次都係去築地場外啦,多款揀啲又新鮮。食嘢可能我唔識搵,我暫時幾次去日本想翻兜再食嘅一間係東京一間係京都,兩間都係行行下搵到。

係個程trip我絕大部份時間都係大阪因為幾日酒店都係果度,咁都唔比我遇到間俾我再去多次嘅理由,可能我真係同大阪無緣。

 

黑門市場都幾好食不過幾貴嘅海膽

 

3。悉尼

我去悉尼係去讀書唔係去旅遊啦,但係頭幾日落地我都係以玩為主。如果依個moment你問我悉尼有咩好玩for 遊客嘅地方我真係答唔到你。

來咗兩個幾月帶過兩個遊客,一個台灣一個香港,佢哋都係啱啱係第二個城市順道過嚟,佢哋都一致認同係呢邊無車真係無嘢好玩。成個CBD最好咪個歌劇院囉,最多咪加埋Harbour Bridge俾你,都無乜嘢好睇呀其實。食嘢又無乜特別,反而係度做得好食嘅係越南嘢,暫時覺得啲pho做得好過香港好多(頂。。。同香港比),鬼佬嘢就德國嘢唔差嘅,其餘嘅啲飲食文化真係承傳咗大英祖國優良傳統。

如果有架車就唔同,啲郊區啲境差好遠,btw有車又去市區麻煩,無一度唔晒俾錢泊車而且仲要收天價。所以住嚟講都幾佗佻,如果係嚟旅遊真係唔好搞我。

 

Local 朋友推介嘅袋鼠肉

 

仲有無人續落去~呢啲經驗應該有旅行嘅人都有,等我下次去個陣可以留意下

 

作者:山區學童

喺澳州19野雞學店讀緊俗稱調理農務系嘅農業經濟學,不過到而家都唔識耕田。寫呢啲19文係因為生活太悶又唔想係咁打機所以寫下解下悶~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 158784
Date: 2017-05-01 05:50:52
Generated at: 2022-01-19 06:27:44
Permalink: https://www.vjmedia.com.hk/articles/2017/05/01/158784/我又講下我覺得「un翻啅able」的旅遊城市