最起碼佢敢言:麥明詩

 

早前麥明詩因為用手食熱狗引起狗仔隊大造文章話佢冇啲儀態,結果麥明詩好快說出咗篇文串住回應件事。冇錯,用手食熱狗同用手食炸雞一樣係理所當然,君不見TVB之前硬Sell KFC嗰陣個個藝人都係用手食炸雞?如果有人要用刀叉幫件炸雞分屍先係離地行為。不過身在娛樂圈大把非神枱級藝人唔敢得罪狗仔隊,話哂曝光率同個人形像好大部份都要靠班狗幫手,結果比人影到自己「殘爆」又樂,「煙剷」又好,冇幾可有藝人會企出嚟為依啲正常不過嘅行為舉動講兩句,更遑論話返狗仔隊轉頭,除咗依個十優港姐。

老實講,麥明詩當選港姐嗰年我對佢冇咩好感。話哂嗰年靚過佢嘅參選佳麗唔少,如果唔係有十優依個光環,佢直頭應該三甲不入。而且佢同林作嘅關係離離合合煩過TVB師奶劇,睇新聞硬係會見到佢個名真係好厭。不過喺後期面對唔少話題嗰陣,當所有藝人都學王苑之一句「我討厭政治」確保飯碗平安,偏偏麥明詩就語出驚人,敢企出嚟指七警係「罪有應得」,打人有罪,警察知法犯法更係罪加一等;最近陳美齡做局長件事仲會拎埋啊媽嚟抽水,質疑出過書有名氣係咪就有料做局長。

其實佢講嘅嘢唔係咩一言驚醒夢中人嘅金句,只不過係作為一個普通市民嘅心底話,但而家喺香港要聽一句真心人話真係難過登天,特別係一個叫有啲名氣,靠娛樂圈搵食嘅人。見到黃耀明何韻詩點比人打壓,見到黃祖藍陳小春奶鞋底奶到幾發達,身為藝人以利益為重,就算唔大叫我愛共產黨去搏出幾個大陸Show嘅機會,總會自我審查言行,「唔該講就唔好講」。只係麥明詩可能未覺世間險惡,又或者佢覺得做人最緊要對得住自己。不平則鳴,對一個正常人嚟講真係一件好正常嘅事。

當我只係見到一個正常人,見到幾句正常說話就有感而發嗰陣,香港到底有幾變態?

 

一個讚好,是對我的一點支持。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 159046
Date: 2017-05-05 15:57:14
Generated at: 2022-12-09 17:12:20
Permalink: https://www.vjmedia.com.hk/articles/2017/05/05/159046/最起碼佢敢言:麥明詩