【咪俾錢中介】俾考完晒DSE 先決定去外國讀書嘅你參考下

 

(photo via cc Flickr user Aaron Hawkins)

 

睇到名校Secrets係度講緊海外升學嘅嘢,我諗呢個時候好多人都有心理準備要出去讀,但係周圍升學中介都有好多參差嘅。所以我想講下當初我係點搵agent,而且一蚊都無俾過agent嘅情況下出國讀書。

其實我就因為細細個就俾屋企人影響嘅關係對調理農務系呢科好有興趣,因為咁我就開始咗留意下到底邊間U有呢科讀又受得DSE,而且syllabus 入面冇乜理科嘢,最後就揀咗2間出嚟,分別位於台灣同埋紐西蘭。由好早開始身邊的人已經灌輸咗一個公開試衰咗先會出國讀嘅思想,我一直以為外國嘅大學(好出名勁個啲除外啦)好易入,所以揀咗間好似幾好嘅大學就去望下點樣申請。

台灣就一定係跟海外聯招報名,呢個時間仲有無得報我就唔係好清楚,不過我想提下報咗或者想報嘅同學一定要睇下自己想讀果科係咩類組。好似我咁係中學選修讀Econ同埋BAFS,想報台大嘅農業經濟學系佢竟然係第三類組,唔計Econ/BAFS分,即係人哋用5科嘅分我只係得4科同人比,我相信呢個係我入唔到台大嘅最大原因,明明Agri Econ都係Econ但係weighting 可以係0!!!!呢個係我考個年一月先發現,乜嘢都太遲,報嚟純粹搏下好彩。所以大家一定要留意下自己個科有冇weighting。再舉下例子,台大生物產業傳播暨發展學系(志願代碼 1021),佢係一字頭即係第一類組,望落去生物xxxxx應該關理科事啦, 但 係 phy chem bio都 唔 計 weighting 架!!因為佢係第一類組。所以報台灣大學嘅人一定要睇清楚自己咩類組,因為自己揀科只可以揀硬一個類組嘅科,所以唔可以又一又三咁揀,睇清楚自己想要咩先好揀呀~

睇返紐西蘭,嗰間大學跟埋張認可香港升學agent公司名單建議我經agent報因為保險簽證果類嘢會幫你搞掂晒,所以我就跟住佢個list嚟搵。無耐我就聯絡到其中一個,就連埋學校internal exam成績表同埋證件嗰啲嘢上佢office搞。去到代理呢啲嘢點都會sell下你啲學校同埋foundation programme。不過我個原則就係點都唔會讀foundation,一係讀u一係retake,唔諗咁多晒錢嘅嘢,去外國讀書已經用好多,唔想再晒更加多嘅。除咗呢樣佢亦都同我介紹咗多兩間澳州有呢科嘅大學俾我(後來先知澳州總共有4間Uni有呢科,另外個兩間唔講係因為佢哋無代理),同屋企人講過之後佢哋都覺得呢兩間唔錯所以而家心目中嘅排位變成台灣>NZ>AUS。

好多人覺得應該要拎咗conditional offer先啦,其實以我報嘅紐澳大學為例都唔使拎定先。其實佢哋網上面已經有每科嘅DSE收生要求,好似悉尼大學、墨爾本大學、新南威爾斯大學 etc.呢啲咁多香港人去嘅大學一定有。只要DSE分數同埋IELTS過咗佢嘅要求就可以入讀,九成九唔會話面試個啲咁。所以,除非個間學校唔使申請費,大家唔使咁急申請住拎咗offer先,慳返筆錢都好啦~不過夠分之後又點慳呢,一陣再講。

等到7月出成績,就麻麻地,唔係心目中嘅成績。喊過,頹過,呢個時候負責我張單嘅agent就問我幾多分,最後決定係點,再順便sell 下foundation。果日我仲記得,離開學校之後就去accept 下用嚟水泡嘅asso offer,食個飯就去咗agent個間嘢係美麗華酒店function room搞嘅升學展。呢個展好重要,因為唔同國家啲好多大學係哂度(唔係太關我事,我都揀好晒邊間),可以即場睇下唔同學校有咩科啱你,報埋名都得,最緊要係可以waive 報名費。報名費成六百蚊港紙架~梗係慳得就慳,就算係睇下其他學校咩情況都好呀。

我個成績如果想讀呢科只可以係而家個間,講到好sad咁不過咁多間呢間無論ranking、背景、聲望都好似最勁,之後生活費貴得滯…….果度搞掂哂,過兩個禮拜收到conditional offer,然後考IELTS,拎夠分嘅IELTS 去accept offer,body check,買簽證要求嘅海外學生醫療保險,再申請入學,最後搞簽證。上面嘅嘢除咗IELTS係自己考其他嘢都係agent幫我搞晒,最多要我上去office簽下名俾下錢咁。而且最重要正常係上面啲手續都要收錢,因為我去咗果個升學展啲手續費,好似千六蚊,幫我waive哂!!!所以再講多次嗰啲展一定要去下~~~

最後經歷9個月long holiday等1st sem開始,而家我就讀緊間唔差嘅大學讀緊我一直想讀嘅調理農務系,都算係圓夢啦。雖然唔係一開始最想入個間,但係呢間除咗學費,各方面都好過台灣個間,所以算啦~而家我讀得好開心~~

「讀書梗要俾錢,咪俾錢中介」

冇錯呀真係有得俾就唔好俾,雖然佢哋都要搵食,但係唔好唔記得學校會用你啲學費回佣俾返agent。學費已經咁貴又得慳真係慳返筆啦。同埋嚟緊打算搵agent幫手報外國學校嘅你,一定要清楚自己想要啲乜,唔好俾agent左氹右氹就改變主意,有咩主義同係外國讀書嘅朋友問下意見,聽到嘅一定比你係agnet到聽得更多。

考完晒oral到放榜嘅呢段時間除咗盡情grad trip、graddin、part time,記得睇下自己,同埋同屋企人商量有無話真係想出外國讀多啲,而家先搜集資料絕對唔遲。最緊要係適合自己。

最後祝大家行一條自己想行嘅路~

作者:山區學童

喺澳州19野雞學店讀緊俗稱調理農務系嘅農業經濟學,不過到而家都唔識耕田。寫呢啲19文係因為生活太悶又唔想係咁打機所以寫下解下悶~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 159061
Date: 2017-05-05 22:03:13
Generated at: 2022-01-19 06:44:53
Permalink: https://www.vjmedia.com.hk/articles/2017/05/05/159061/【咪俾錢中介】俾考完晒dse-先決定去外國讀書嘅你