讀完工聯會課程自稱專業塔羅占卜師:「上夠十堂就有。」

 

有個女仔黎開牌,但次次揭牌我未出聲,佢就比哂反應嘆氣呀、倒抽一口涼氣呀咁。

識睇牌唔出奇嘅,耐唔耐有啲客本身都睇書上網學過吓塔羅牌,知道問感情出 Lovers 牌、或者「愛唔愛你呀?」出 Death 牌呢啲盲嘅都識睇嘅牌義。不過眼前嘅牌像明明係好嘢黎,唔通個客反社會,想要差結果?

咁我見佢唔出聲,我咪解牌囉;佢問轉唔轉工好,出 Judgement 正牌 同 Death 反牌。我話「喂,好嘢黎,鼓勵你轉噃⋯⋯」

我嘢都未講完,佢反一反白眼,「妳識唔識解架!Death 啊!死人啊!仲叫我轉!」

我心入面反咗個比佢更勁嘅白眼,「小姐,隻牌反轉架,反牌唔係咁解。」

「我怕自己唔靜心所以先唔幫自己開牌,其實我識塔羅,我有證書。」

我聽到呢度呆一呆,證書?美國塔羅總會嗰張?我都未去考喎,我心諗考完都好似妳咁我真係考黎托,不過我把口仲係好有耐性咁問,「證書係指⋯?」

「工聯會頒架,上夠十堂就有。」我講堅,佢個樣閃露住自豪嘅神色,唔講仲以為佢係咪用鏡架裱起張工聯會證書擺屋企,「我都係專業架,不過無妳咁熟之嘛。」

聽到呢度我已經笑唔出,柒到盡頭件事就唔好笑,做乜嘢?工聯會學塔羅牌係咩玩法?幫工人爭取權益嘅新方式呀?定中年再就業計劃?連一隻牌正反意思唔同都唔識,到底係無教過定呀小姐妳無用心上堂先?黎得搵我又要兇我,妳估武林對決呀?如果比我師父聽到而家啲人進化到拎住工聯會證書就叫專業塔羅占卜師,應該要飲杯蔘茶定驚。

不過,佢把口話唔信我,結果都係問咗五條問題,盛惠五舊水,多謝老細⋯⋯⋯orz

 

 

作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 159258
Date: 2017-05-09 14:44:52
Generated at: 2021-07-29 16:13:02
Permalink: https://www.vjmedia.com.hk/articles/2017/05/09/159258/讀完工聯會課程自稱專業塔羅占卜師:「上夠十堂