其實就好似當年黃霑話「如果東京不快樂」解唔通一樣，新詩型嘅語句，係嘗試將一啲字詞用「貌似」無邏輯嘅方式接合，但係你探究之後，就會搵到其實係將一啲尋常字詞借代或做象徵，直接取代背後想描述嘅心情，形成一種較有深度嘅寫法。「如果東京不快樂」，有讀者就認為係因為作者本身不快樂，所以即使去邊度都覺得個地方唔快樂，云云。呢個就係解讀。解讀唔同「權威讀法」，每個人都可以有自己解法，不過就唔一定有「權威解讀」，即使係作者自己，佢講法亦只係「一家之言」。