個世界已經唔同咗——所謂嘅「財務自由」

 

(photo via cc Flickr user See-ming Lee 李思明 SML)

 

我覺得個世界已經唔同咗了。

 

1. 「財務自由」呢個詞語喺十年前大行其道,人人侃侃而談,達成嘅方法無非係靠股票或者靠物業。呢兩個係最傳統嘅積累財富方法,基本上幾百年來無非如此。好多醫生有所謂「月球人」(月入一球)或者「星球人」(每星期收入一球)之說,有醫生朋友話,其實都係靠炒舖買舖放租,即係本質上都係物業。

 

2. 但係呢種講法喺近十年係有慢慢退卻之勢。或者應該話,因為今日購置資產嘅門檻實在太高,以往大力鼓吹要「買資產」嘅對象,門檻高咗好多,對絕大部份人嚟講,成為咗空談。你話人點解唔十年前買樓,係毫無意義,因為對好多後生仔嚟講,「十年前我係中學生」!

而樓市係一個循環嚟,經濟循環呢一點相信無人有爭議。喺連升咗十幾年(嚴格而言係由 2003沙士後開始升到今日),今時今日嘅香港樓市仲有幾大投資價值?回顧歷史,八十年代開始嘅樓市「必升」之勢,一方面係因為賣地受限(大陸驚英殖「賣晒」香港嘅地),另一方面係因為香港仍然受惠於「全球流動資金」嘅便利,令「四方財」依然可以維持香港嘅高地價。但係一方面經濟周期喺未來五年逆轉嘅機會提高(連升三十年點都難過升二十年然後跌掛?),另一方面香港嘅角色喺全球化之下似乎會轉淡,香港樓市會否依然堅挺,係一個好大嘅問號。

 

3. 當然,咁你話買深圳樓,大陸樓。呢點我係無異議,本質同你去買外國樓,毫無分別。只不過管理成本,了解法規等等,亦都係成本所在。係值嘅,不過要辛苦先得世間財,唔似得你去買香港樓乾手淨腳。有人話諸如日本等地嘅樓,首先「炒」唔起,其次就算放租,回報率同管理都相對麻煩,有人會認為係得不償失。買大陸樓,熟法規,熟管理,往來頻繁者,值得做,但總體嚟講,你必須要清楚了解你買緊嘅嘢嘅當地法規係乜。

 

4. 總體而言,我認為今日大力提倡買樓嘅上一輩人,係根本唔明白今日全球環境,同埋一種席捲全球嘅「年青人苦悶」。全球嘅資產都上升得好緊要,就好似曹仁超當年講嘅「發達容易搵食難」,你揸住幾層樓,當然覺得大家都應該要買樓先可以財務自由,但係對年輕人黎講,而家首期係講緊二百萬港紙,但你每個月儲到嘅錢可能只係幾千蚊,甚至幾百蚊(租金、飲食、交通)。就係因為呢種矛盾,先出現咁多不接地氣嘅「去少幾次日本就買到樓」,請問當你年入只係二十零萬時,你點樣「儲幾年」就儲到二百萬返嚟呢?做槓杆,風險極高,如上所述,資產價格逆轉隨時會出現,到時未得其利先蒙其害。

 

5. 對於而家嘅年青人嚟講,「財務自動自由」已經唔再吸引,應該話就算吸引,都知道係一件無可能嘅事,等如我同你講「如果你買到塊大地皮起『新太古城』你咪賺到幾百億囉」咁,係「啱」呀,但有意義咩?喺全球化之下,「資產錢搵錢」係王道,真,但要賺得到第一桶金,所需嘅運氣、眼光、技術比以往高咗好多(穿膠花 vs 研發革命性電動汽車)。因此以資產錢搵錢呢回事,只能當係資料提供,對於現今普遍三十五歲以下人士,係毫無意義。對佢哋嚟講,一種「多元技能」或者更加吸引,一種「無論點都搵到食」嘅「多元身份」更加可以確保佢哋嘅生計乃至生活。以往你可以打死一份牛工,「好勤力」然後買樓上車保平安,今日你打死一份牛工,年年都「共盜時艱」無償加班無人工加,然後買唔到樓打死成世工。所以「傳統智慧」一早已經不適用。反而提倡一種更闊嘅「技能表」可能更加實際。

 

作者:林非

離經,不欲縛於經書舊說,欲自成一家自成一經。八十後,以追求人生自由之道為己任。

閱讀後覺得好,請多多讚好及分享~:)

其他熱門文章

  • 【LEGO快訊】LEGO迷你兵團正式登場 by 阿九
    講左好耐嘅 LEGO 迷你兵團終於都喺紐約玩具展前席正式登場!暫時公佈嘅產品總共有 5 款咁多,而當中以 75 […]…
  • 【劏房生活實錄】連打飛機/捽碟都怕被鄰居聽到. . . . . . by 一百八十呎
    上次講過我同隔嚟屋只係一板之隔,夜晚瞓覺連人哋呼吸聲都會聽到。人哋屋企又有小朋友,可想而知,捽碟的話我一定要帶耳機。試過唔記得戴,一開就大大聲「澳門首家線上賭場上線啦」,嚇到我心都離一離,人哋唔知以為我沉迷毒海都唔好啦。…
  • 【引爆中國】(二):中國沒有不分裂的本錢 by 薰華
    上次講到葛劍雄《統一與分裂》提出,中共政治政確下嘅標準計,中國歷史上只係統一過81年,而依照傳統中國所講嘅統一嚟計,其實中國亦都只係統一過950年。咁即係話,無論你中意由夏后帝啟開始計、由成湯開始計、由周召共和開始計、由秦始皇開始計,定係由…
  • 【口罩知識】99% PFE 就等同 N95 口罩? by Tango Chan
    PFE(Particle Filtration Efficiency)則是顆粒過濾效率,以 3M 為例,他們會利用 0.1 μm 的微粒及 28 lpm 流速來測試外科手術口罩的過濾性能。而普遍來說,這項測試容許使用 0.1 – 5.0 μ…
  • 【引爆中國】(一):中國只係統一過81年? by 薰華
    「支爆」呢個term,筆者都聽咗好幾年,然而每次話支爆,結果都好似不了了之咁,直至今年武漢肺炎大爆發,有朋友就開始盤點下現時中共所面對嘅所有問題,發現係歷朝歷代滅亡前夕嘅事件嘅大集合。既然係咁,筆者亦都想講下到底歷代嘅統一同分裂,背後究竟係…
  • 【引爆中國】(三):統一之後…… by 薰華
    今日唔係想講秦漢之際喺中原發生嘅事,而係睇下喺我哋呢頭,嶺南一帶發生嘅事。…
歡迎讚好我們的facebook page,免費資訊源源送上。

文章資訊

ID: 159341
Date: 2017-05-10 18:12:42
Generated at: 2020-02-24 16:06:47
Permalink: https://www.vjmedia.com.hk/articles/2017/05/10/159341/個世界已經唔同咗-所謂嘅「財務自由」