歷史傳聞就係咁煉成

火鳳燎原圖片

 

牛頭角姦劫案,警方極速鎖人、好似破到案咁,然後疑犯又喺警署入面自殺身亡。相信事態發展至今,大眾都唔會再聽香港警察之後點去解釋呢一件事。因為大家都已經定性咗,認為警察係捉人交數再殺人滅口。

事實係唔係呢?我唔敢話係,亦唔敢話唔係。不過可以肯定嘅係,即使警方畀得出證據,證明疑犯真係自己搵到方法喺署內自殺,而警方真係唔係兇手,其實都唔會有人信。到時可能大家會話:「唓,你實話唔關你事咯,依家係話你哋殺人呀!」然後繼續無視啲證據。因為事件嘅發展得已經太過離奇,而且常理推斷內在拘人士會有人看實唔畀佢自殺,可以自殺嘅工具亦會盡量沒收。咁如果警察話要查呢?又會有人講:「你咪自己人查自己人!」即使警方真係冇嫌疑,都至少衰一樣疏忽;呢個時候大家又一定會話:「有冇咁啱呀,呢個時候嚟出錯?平時唔會錯係錯嗰下?」話分兩頭,我又唔多信警方會拎到證據證明自己冇殺人囉。

搞成咁,個原因真係陳腔到冇得再濫調:警民互信又見低點囉。警察點解講咩都唔會有人信,咪就係因為市民認為佢哋講咩都唔可信。再推前少少,點解差佬要咁大陣仗圍捕Hidden Agenda,咪就係警察唔信香港市民係會同佢合作──歸根究底就係身有屎,自己都知自己衰咩,咁咪搞大陣仗啲囉。

今次係一宗強姦案,老實講,個疑犯唔係咩名人名士,可能好快就會遺忘;又有可能會以其他形式,例如行內秘聞、都市傳說,甚至係鬼故咁流傳落去。不過無論係咩形式都好,鄙視警隊都會係故事嘅主軸。因為此件事反映嘅意義,並唔係個疑犯點死或者警察係唔係手腳乾淨,而係香港人已經唔信警察。

 

火鳳燎原圖片

 

可能你會話,我又唔係幾十年之後返嚟,邊得嚟咁肯定?我唔係未來人啫,但我哋過去都有人架嘛,都有呢類傳聞架嘛。最出名,就莫過於幾個清初宮廷傳聞:太后下嫁、順治出家、雍正奪嫡、乾隆義女,甚至乎到咗現代,都仲有阿瓊瑤阿姨炮製咗個永琪歸隱出嚟。如果我哋將個社會環境倒帶返清朝,唔難發現,其實呢啲故事多少都係因為清初漢人無力反抗,見到清朝宗室幾代都有啲異樣,於是就穿鑿附會出呢啲宮廷傳聞出嚟流傳。

以太后下嫁為例,流傳嘅講法係話多爾袞任攝政王時期,娶咗當時嘅皇太后(日後諡號為孝莊文皇后)。考究原因,當年清世祖即位只係細路仔,又係多爾袞同孝莊支持之下即大位,二人於順治朝亦共同掌握權力,合作無間;而且多爾袞於順治五年開始加號為「皇父攝政王」,講到好似佢屌咗皇帝老母咁。當時嘅漢人就估,係唔係真係屌咗呢?因為古來北虜有娶寡嫂嘅習俗,話唔定呢班旗下佬都興呢味嘢呢?就係咁樣捕風捉影,就流傳咗一個太后下嫁嘅傳說出嚟。後嚟更加編造咗兩人年少時有一段情,而皇太極係橫刀奪愛。依家皇太極早死,兩人就終於再續前緣嘅故仔出嚟添。

真相係點呢?「皇父」一稱,與其話係多爾袞真係娶寡嫂,不如話係佢得勢之後,得意忘形之作。根據較正式嘅記載,順治四年,多爾袞曾表示自己有風疾,「不勝跪拜」,後嚟就即時唔使佢再跪;到咗第二年更加直接封佢做皇父。代入佢嘅角色,天下係佢代個姪仔打嘅,點解要跪佢?當佢想唔跪又真係得咗,就想變本加厲,稱「皇叔父」都唔夠,要叫就叫「皇父」,因為養佢育佢嘅,又真係唔係皇太極而係多爾袞喎。再者,加埋多爾袞死後一開始係追尊為清成宗義皇帝,好有可能根本就係因為多爾袞一早就發現自己不育,已經認咗皇帝做契仔,所以先有「皇父」呢個頭銜出現。只係佢估唔到佢屍骨都未寒,呢個契仔就已經清算佢之嘛。相反,孝莊文皇后作為皇帝生母,政治地位比多爾袞更穩固,又有咩需要要同多爾袞結婚嚟鞏固地位呢?而且,清世祖嘅大清算,亦都冇燒到太后架。

以上種種其實比起太后下嫁都合理得多,不過呢,人就係鍾意聽奇情嘢嘅,而且最重要嘅原因係──即使知道太后下嫁係鳩吹出嚟,因為漢人根本就睇唔起滿洲人,認為佢哋係野蠻韃子,專事亂倫,寧願信係因為皇家亂倫都唔認為係不舉攝政王收契仔。講到尾,就係一個信字:清初漢人寧信滿洲皇室淫亂宮闈,同香港人寧信警察屈打成招殺人滅口。大家對真相,都係冇咩興趣嘅。

而呢啲傳聞背後透視到嘅民心民意,就不言而喻啦。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 159406
Date: 2017-05-11 15:16:54
Generated at: 2021-06-24 19:59:16
Permalink: https://www.vjmedia.com.hk/articles/2017/05/11/159406/歷史傳聞就係咁煉成