其實個個男人都想要黃蓉咁嘅女㗎啦

冰雪聰明，美若天仙，仲要咁專一，本身更加係有錢有家世，娶咗個咁嘅女人真係飛黃騰達。

郭靖就係一個例子。

但係，你寫咗個咁完美嘅女神出嚟，要佢點出場好呢？佢點同男主角相戀好呢？好多小說入面都有啲咁嘅女主角，但係只有金庸寫得出黃蓉，點解？因為黃蓉有靈魂。

點解一個咁完美嘅女神要畀仔溝到？如果男主角死纏難打，咁就係狗公，男主角就乞人憎，而女神被狗公溝到呢？讀者就更加唔高興。

咁女神倒貼呢？屌！爛書嚟嘅！真係撕爛本書佢。

最好嘅係咩？機緣巧合之下，情投意合。一見鍾情？太低級喇，男嘅係狗公，女嘅唔高貴。男方同女方無論幾靚仔都好，一定唔可以單單因為樣而喺埋一齊，咁先畀到毒撚、毒西一啲幻想。而且金庸係何許人也？如果香港史上有一條友可以走出嚟大大聲講：「屌！你班毒撚都唔識溝女嘅！溝女邊使靠靚仔㗎！」嗰個一定係金庸。佢寫靚仔只係畀你班人意淫下咋（其實郭靖、喬峰、虛竹同埋韋小寶都唔係靚仔）！

所以女神點解會被人溝到？因為女神都係人，人就有心靈嘅弱點，對女人又好對男人又好，你捉住咗個弱點，你就俘虜咗佢，你叫佢去東佢就去東，中出就中出。即係話，喺呢個位到，女神同毒撚係平等㗎！不過毒撚個弱點就明顯咗啲咁囉！

所以黃蓉有個弱點，就係老母早死，老豆唔識教女，搞到佢覺得全天下間都冇人對佢好。

但係，對佢好就溝到佢？大把毒撚都溝到啦！

所以黃蓉好聰明，佢專登扮成個乞兒咁，睇下仲有冇人對自己好（中二病）。

平心而論，街邊有個咁串嘅乞兒，畀著你同我都走啦！

但係郭靖唔係一般人，如果嗰個時代有IQ test，佢可能同阿甘正傳入面嘅阿甘一樣係個弱智兒童。冇錯，郭靖就係武俠界嘅阿甘。

郭靖宅心仁厚，弱弱智智，對每一個人都冇機心，都咁好，佢當年可以為咗三唔識七嘅哲別挨打、仲差啲被人殺死，依家佢可以咁傻畀曬成副身家黃蓉有幾出奇？

成件事根本順利成章。

直情同你講：「世上只有郭靖溝到黃蓉。」你都覺得合理。

OK，你都係覺得郭靖配唔上黃蓉？

我畀個串柒柒狗公富二代同郭靖比，你寧願黃蓉被邊個溝到？

所以金庸真係好勁，完美示範咩叫用人物性格去帶動劇情。

但係依家嘅小說唯求速食，唯有用劇情帶動人物。

金庸嘅小說直情好似喺個虛擬世界入面，寫幾個人物，呢啲人物有自我意識同性格同能力值，金庸只係安排下佢哋嘅出場，成個故事就會好順利成章咁發展落去，佢根本唔使干預。

作者：哲學仔

一條哲學廢青

閱讀後覺得好，請多多讚好及分享～：）