第一樣要讚《動物朋友》嘅就係佢簡單而且到位嘅劇情同世界設定。《動物朋友》雖然係輕輕鬆鬆又一集，但係佢並唔係一部冇明確終點嘅日常番。一路睇《動物朋友》嘅時候，我發覺自己一直都喺度期待住個終點，好想睇到謎底被解開嘅一刻。基本上，我哋觀眾同主角小鞄嘅處境係一樣嘅，都係無端端、冇頭冇尾冇原因咁畀人抌咗喺一個奇特嘅SafariPark入面，所以我哋可以同小鞄產生到共鳴。觀眾並冇收到額外嘅資訊，冇旁白、冇另一個視點、冇背景資料，小鞄見到嘅嘢就係我哋見到嘅嘢，所以觀眾其實係同佢一齊喺度解𡁵迷嘅。