如果妳覺得追男仔好難,可能因為你唔識鼓勵對方。

 

(photo via cc Flickr user Eryne!)

 

經過上次,作為小宅女嘅你應該已經完成左基本打扮同埋識得點樣比位男仔示好,依家繼續探討男女基本攻防。

兩個人成為情侶嘅要素,首先當然係要互相鍾意對方啦!但到底咩叫鍾意,而點樣去觸發鍾意呢個感覺,我睇法係咁:大家對對方嘅條件大致上滿意,而經過一段「拍拖Rehearsal」之後,再次確立鍾意呢個感覺,要成為男女朋友,就係再加上結尾嘅收割儀式——例如表白。

你有無異議?無嘅話我地繼續。

先講第一步,條件要大致上滿意。咁你追得人,人地嘅條件你就一定滿意架啦!更重要嘅係你嘅條件人地滿唔滿意架姐!所以上篇嘅開首已經講左,整靚左自己先,我知樣同身材好大部份天生,而肥瘦都唔係一時間可以改變得好多,但打扮同言行舉止可以短期內改善嘅,唔該真係搞搞佢。

不厭其煩再講多次,衣著唔洗太over,搵個衣著好少少嘅女仔朋友教下路,你話你係宅女無朋友嘅,上youtube睇下啲有化妝嗰啲女仔,特別係同自己差唔多身型嗰啲女仔,上鏡嗰時大約會著啲咩,抄返個八、九成,醜極都應該唔會死得人嘅。

咁言行舉止呢?一句講晒,出黎見人嗰時,唔洗提醒人,其他人都會當你係一般女仔咁看待。以下有一個簡單測試方法,搵一個完全無利益衝突嘅男仔朋友,問下自己叫唔叫男人婆、八婆同姣婆。前兩者不解釋,而作為一個收放自如嘅姣婆,係唔應該比人睇穿。確定左三樣都唔係嘅話,基本上就通過考核。

點解我要強調「出黎見人」嗰時?因為要促成對方睇得上你,其實咁樣好夠架啦。話知你返到屋企一路捽腳指一路搣橙,啱啱交手唔洗咁快話晒自己啲缺點比人知。你想一個男仔睇起上黎正正常常,將心比己,你就會知道自己唔應該做啲咩。

但係,呢個世界上咁多人,淨係講令你大致上滿意佢條件嘅人咁多,咁係啲咩促成拍拖?

答案就係拍拖嘅預演,大家嘅交往去到一定程度,藉住互相示好嘅步驟,令到雙方的關係愈黎愈親密,留戀呢種親密,正正係鍾意對方嘅表現。喺呢度要留意,過程係循序漸進而充滿試探,俗稱Flirt 黎Flirt去,咩叫Flirt?我嘗試去概括——講/做啲超過左你地客觀關係應該講嘅野。呢一步男人多數做主動,而作為女孩子嘅你,需要嘅就係認清邊啲係男仔拋出黎嘅訊號,接住佢,然後鼓勵對方再做多啲。

我唔建議女仔主動出招,因為故事開頭已經講過,你是沒有長處的小宅女,唔好主動去做啲太高難度嘅野,你面皮又薄,比人無視一兩次你一定好頹。接Flirt就相對容易好多,起碼你知道人地有心同你玩,被無視嘅機會就會大大降低。

上集講到,你令到個男仔幫你做左某件事,你首先要衡量一下呢件事會唔會導致一對一嘅相處,如果會(例如你話有新戲上,佢直接約你睇戲),咁自動跳到約會篇(姐係下一篇),然後獎勵佢;如果唔會,你就要獎勵佢,等佢同你更加熟,你再提出下一個困難,佢幫你,獎勵,重複直至到佢約你為止。

點樣去獎勵一個幫你做過野嘅男人?

記住,絕對唔需要用對等嘅野去獎勵,幾多歲都係,男人幫女人,並唔會要求回報,佢只需要掌聲同鼓勵!我比個概念你,超人幫村民打走左隻怪獸,故事去到呢度,你作為村民點樣回報呢個超人?感性少少,真係崇拜下佢嘅能力,記住,士為知己者死,每個男人天生都有種英雄感,想人地依靠佢,想自己成為一個可以比人依靠嘅人……具體例子,圖書館凍到停屍間咁,佢忽然過黎買左杯咖啡比你,你要點做?表示下佢真係好幫到你,佢好細心……等等。如果面對面怕讚得太over嘅話就message先講啦,但如果你選擇左面對面好正經,啲多謝要留返訊息講嘅,唔該有咁甜得咁甜,推薦一個emoji icon比大家,有腮紅嘅笑樣,加喺講嘅野後面,普通一句多謝都會甜到漏。呢個真係居家旅行,溝仔必備利器。

佢幫完你一次,但係又無約你出黎,咁點算?

咁就要睇下你當時讚佢英明神武嗰時,對方嘅態度。如果一兩句you are welcome之類, 符號都無個嘅,咁可能人地對你無意思,不外乎佢已經有鍾意嘅人,或者你嘅條件唔入佢考慮之列。唔洗氣餒嘅,人夾人緣,唔一定係你有問題。若然你真係非佢不嫁咁嚴重嘅,咁基本關係建立左,大家傾多啲計先,再睇下佢願唔願意同你有講有笑囉。

第二個情況係,你讚完佢,佢肯認下叻,同你傾下計,咁你地嘅關係應該有變好,雖然佢未約你出黎,你可以打鐵趁熱,隔一小段日子再去提出你嘅困難。呢次嘅困難可以私人少少,可能係關於你感情嘅野,屋企嘅野,升學就業嘅野……人係好奇怪嘅生物,如果同對方有一定程度嘅溝通之後,無形中會跟左對方嘅節奏,你同佢分享自己嘅野,佢都會分享私人嘅野比你聽。如果去到一個程度,佢有啲私人嘅野得你知,或者佢唔再好似一般朋友咁傾計,真係向你透露自己內心嘅陰暗面,你就要好好聆聽,處理佢嘅情緒。無論你要講咩都好,一定要夠正面,而且表達兩個重點——其實佢係一個好有能力嘅人,而無論外面嘅人點睇,你一直都相信佢有日變得更好。

前面嗰句係哄佢,後面嗰句係加深你地兩個人嘅聯繫。

有樣野係無分男定女,人係需要被關心,只不過男人礙於面子同社會規範,唔可以將啲困惑擺面。如果一個男人肯將自己嘅私事同你講,而且表達左自己嘅睇法同情緒,呢種親密程度其實男人更加深刻,因為表達本身已經承擔左唔小嘅風險,你比到嘅反應正確嘅,佢約你嘅機會就愈大。

女仔同男仔唔同,可以做嘅事多數都係比個好嘅反應,從而搏得下一次機會,每個男仔都會想自己女朋友溫柔體貼,當然你有自己嘅特色係好事,一定會加分,但特立獨行嘅同時,都一定唔好忘記自己柔弱嘅一面,記住!有位就強調下佢嘅英明神武,比個概念男神,同你一齊,佢係可以發揮到自己嘅英雄感,情感上脆弱嘅部份,亦可以交比你處理,咁成功率自然會大大提高。

 

下篇將會講到,男神終於約會你,面對面嘅注意事項又有啲咩。

 

 

作者:求其花

求其寫,求其賣,求其志不求奢華|求其真,求其愛,求其花不求其果

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
歡迎讚好我們的facebook page,免費資訊源源送上。

文章資訊

ID: 159960
Date: 2017-05-20 03:59:41
Generated at: 2022-08-10 12:14:49
Permalink: https://www.vjmedia.com.hk/articles/2017/05/20/159960/如果妳覺得追男仔好難,可能因為你唔識鼓勵對方