成功公式

香港嘅失敗或者在於唔能夠接受多元。

咩係多元？就係能夠接受其他人同自己唔同，包容唔同嘅價值觀。

唔多元嘅後果係咩？就係狹隘，狹隘嘅目光往往會令人失去長遠嘅利益。

香港人好鍾意定義咩叫成功，咩叫失敗，而且為成功定下一條又一條嘅公式。

細個努力讀書，考好公開試，入大學讀商科、醫、法律，大個做專業人士，月入六位、甚至一球，35歲前供完樓，再炒炒賣賣過一生。

咁就係成功。

咁唔係唔好，但係每一個人都要被呢種成功/失敗所定義，個社會就會好悶，缺乏激情嘅人生係難以有所創意嘅，冇創意嘅人，個社會自然缺乏動力，咩都慢人一步。

一間公司炒人先炒IT部，目光淺窄，莫過於此。

香港人好鍾意講美國點點點，中國模式又點點點，但係兩國搞start-up，搞網都搞到蒸蒸日上，香港人偏偏就視而不見。

香港人想要咩？想要一份安安穩穩嘅工，最好係公務員。居然會有人想自甘平庸。依家唔係講緊八成人係咁，而係九成九嘅人都係咁，三大畢業出到嚟都係想要份安安穩穩嘅工，做人毫無野心，社會點得嚟有所進步呢？

作者：哲學仔

一條哲學廢青

閱讀後覺得好，請多多讚好及分享～：）