不一樣的赴美升學指南

 

每年喺呢個時間,都一定有啲朋友走嚟問毛定石,如果啲仔女喺DSE失手入唔到8大,有無其他選擇。當然係講緊學費係香港一般中產家庭可以負擔到,學術水平要好過喺香港嘅社區學院(CC),收生要求又唔好太高,而最好係可以去到美國…..

每次聽到呢啲要求,我都喺腦海入面浮現咗幾個例子。咁我就趁呢個機會同大家講吓我接觸過嘅大學(包括其優點同缺點),乘機拋磚引玉以引起更多回響。

 

(1)Minot State University(MSU):

 

Minot 係位於美國North Dakota(州)嘅一間城市,地點係接近美加邊境。如果由香港去,就一定要轉機。MSU係一間州立大學,不過學費就無分本州(Resident)同非本州(Non-Resident),每年嘅學費連雜費喺講緊US$7k有找。即係同香港學費差不多。如果計埋宿費同校內膳食,係講緊每學年US$13k。如果無乜Budget,而仔女啲讀書成績唔太差,呢個係一個唔錯嘅選擇。

不過,如果要講缺點,亦有幾個:(i)好凍,每年可能會由十月到下一年四月落雪,十二月如果有北極寒流,就係唔係講笑;(ii)無香港人追求嘅神科,例如Law,Enginnering,同Medicine。

 

(2)Northern Marianas College(NMC):

 

如果嫌North Dakota又凍又遠,位於塞班嘅NMC可以係另一個選擇。塞班就係一個常夏之島,而且香港又有廉航去到,而航程只要5個半鐘。如果你驚啲仔女唔知係唔係掛著玩,上網買機票,第二日就可以去緝私,絕對識合香港啲虎媽。

NMC現時係收緊US$190一個學分,即係讀完成個120學分嘅BBA,學費只係要US$23k,即係除開每年學費唔使HK$45k。如果計埋租地方住等開支,估計租金約US$500到800一個月,其他開支就唔太清楚,不過應該同香港差不多。

NMC係做Open Enrollment,即係只要有中學畢業証書,佢到會收入學。不過,NMC係將收生入學同讀邊個學系分開處理,即係你讀唔讀到BBA,就要睇你能夠達到入有關學系嘅最低要求。

不過,NMC亦有缺點:(i)NMC係CC,而現正搞緊升格做4年制大學。所以只有BBA同BS in Education兩個課程係四年制,其他係副學士課程;(ii)塞班有賭場;(iii)塞班因為容許中國人用落地簽證,聽聞通街中國遊客/賭客,最近亦拉過一班中國用免簽入境後跳船嘅黑工。

 

(3)Guam Community College (GCC) 及 University of Guam (UOG):

 

關島兩間專上學府都係Open Enrollment。雖然GCC係CC,不過有幾個原因要提一提。首先,GCC學費比NMC更平,只係US$180一個學分,第二,就係喺GCC收嘅通識(General Education)學分,大部份都可以轉去友校UOG。即使喺關島,好多學生都選擇喺GCC同UOG同時報讀,為慳錢喺GCC讀通識,喺UOG讀degree。

而UOG就係正式嘅4年制大學,不過學費就比較貴,要成US$504一個學分,即係如果喺UOG讀成個學位(124學分),就要近HK$500k學費。不過,UOG相對上述幾間學府,就有幾個優勢:(i)佢有開4年制Nursing(而UOG Nurisng School係會收NMC同GCC嘅Associte Degree學生插班讀第三年,不過聽聞爭得好緊要);(ii)打算短期內大學會開Civil Engineering Major,而現時係有協議,讓UOG嘅Pre-Engineering(讀兩年)學生轉去有同其他美國本土大學讀三年級;(iii)生物(尤其喺海洋生物)及環境科學(不過只有碩士課程)頗出名。所以,如果想讀有關學科,呢個係一個不錯嘅選擇。

 

關島另有幾個優點:(i)UA有直航;(ii)21歲以下禁煙禁酒;(iii)租金亦算OK(約US$600-800一個月)。

不過,關島嘅缺點係:(i)UOG學費較貴;(ii)關島生活費亦唔太平;(iii)政府考慮緊比消閑用大麻合法化(不過,最近又話因為Trump爺要禁而縮返個Bill再諗諗);(iv)本地基本上無公共交通工具(除非你日日搭的士同Uber),而大部份人係自己揸車,亦即係話,過去之前要考車牌,再喺入境後再考筆試路試。

講到尾,都係一句:如果仔女真係失手,而自己亦唔想佢哋考多次DSE,放手搵啲自己負擔到嘅海外大學,係一個對自己同仔女一個更佳嘅選擇。

 

P.S.我介紹得,就唔會係香港某啲政黨啲議員讀嘅嗰啲大學咁,即係無評審。以上講嘅四間院校,都有美國相關嘅學術評審機構嘅accreditation,而入面唔少課程,亦有相關專業工會/學術協會嘅secondary accreditation!

 

作者:毛定石

閱讀後覺得好,請多多讚好及分享~:)

其他熱門文章

  • 【遊戲新聞】一年一度 E3 遊戲展 講完無影嘅作品年年都有 by 森麻
    又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總 […]…
  • 八仙嶺縱火案翻案問題 by 蕭少滔
    我以下按刑事偵緝的「排除法」,讓大家客觀地重組案情。大家如有指正及補充,可以有助澄清事實的話,無任歡迎。…
  • 八仙嶺之殤——災難回顧報告 by 無妄齋
    以下為我們翻查當年事故資料所得,目的並非要指控當年誰是誰非,也無意勾起當事者的傷痛。相反,是旨在透過重溫事件經過及法庭紀錄,為讀者提供較為完整的說法及根據,並寄望從此杜絕坊間的主觀臆測,以正視聽,還世間一個公道。…
  • 國安法下的香港電影 by Terence Yun
    倘若國安法成為指引下,創作人又再多一重限制,這條紅線之無形壓力便走進創作人的腦海之中,無形刀壓在創作人頸上。香港沒有審批劇本制度,不同大陸,批左就可以開拍(當然亦有批左,拍左都不能上畫),而香港沒有審批,意味著創作人在創作時要估計和預計在什…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
  • Zopiclone——傳說中的安眠藥「白瓜子」 by 小小藥罐子
    Zopiclone,可以讓人入睡大約6至8個小時,所以,一般建議連續入睡至少8個小時,避免出現「宿醉(Hangover)」的機會。所謂「宿醉」,簡單說,透過安眠藥入睡後,如果睡眠的時間不夠長的話,醒來後,仍然可能會覺得睡意未散,頭昏腦脹,影…
歡迎讚好我們的facebook page,免費資訊源源送上。

文章資訊

ID: 160323
Date: 2017-05-24 23:42:29
Generated at: 2021-06-14 11:37:02
Permalink: https://www.vjmedia.com.hk/articles/2017/05/24/160323/不一樣的赴美升學指南