警告，部份素食者已經去到忘我境界

早前外國有素食媽媽覺得自己個BB食人奶都係違反食素，決定私自幫bb由人奶轉食植物奶最後BB因爲唔夠營養而死，死既時候連1磅都冇，法官仲話構成虐兒，分分鐘坐監。

呢頭講完無耐，香港就有人話「狗狗食素，主人有得揀」，我不禁問上帝，人類點解會自以為自己可以改變神嘅決定。

呢個世界有冇神唔重要，重要嘅係，大家有冇諗過，人同狗，都唔係草食性動物，人係哺乳類動物，狗更係屬於食肉目，係狼嘅近親，雖然都係又食得菜又食得肉，但同樣嘅係缺一不可。

BB太細，係最吸收營養嘅時候，植物奶根本提供唔到足夠嘅蛋白質去成長，特別係頭六個月，植物奶根本冇營養令BB成長，而最瘋狂嘅係呢對外國夫妻本來係餵人奶的，佢自己餵素再餵人奶都得啦（好似係），但佢竟然覺得咁都唔夠素，喺根本冇詢問過醫生意見就私自餵植物奶，你問我，呢對夫妻根本就愛素多過愛BB。

狗呢？喂先未講狗仔個意願，我相信狗仔如果仲係bb時根本唔可以淨係餵素奶，好喇到佢大隻喇，係咪可以餵素都係疑問，亦冇獸醫講過狗可以食素，點解人類可以違反大自然法則，想隻狗食乜就餵乜？你哋係咪當咗自己係神？

素食者有好多原因驅使佢食素，想健康啲，因為相信動物平等，希望環保減少肉食資源等等，簡單嚟講，我會用四個字概括：「普渡眾生」，大家都係好愛小動物，想為地球出分力，我明，我真係明，我自己都會一星期食一兩日素，但有冇諗過，連狗都食素係一個幾咁本末倒置嘅行為？

狗本來可以自由自在的，由以前人會捉狗隻成為自己嘅工作犬，到今日將狗成為寵物犬，本來一切都唔係大自然定律，但今時今日我當然唔可以叫你棄養，問題係你可以自己食素，減低對名種狗嘅需要，唔好再俾無良狗場迫啲狗媽媽生仔，領養代替購買，呢啲唔係更加「普渡眾生」咩？你知道嗎？世界上最大既肉食者唔係狗呀，狗食肉亦都係更經地義呀，最大嘅肉食者係人類咋，所以你迫狗食素，同叫隻老虎食草一樣，係虐待嚟㗎。

而成年人可以食素，都係因為成年人類有足夠智慧去壓抑自己對肉類嘅渴望，以及成年人身體機能足以應付食素嘅影響，同埋最重要係，當人唔食肉食素，成年人可以食其他嘢吸收返但BB唔得㗎，一兩個月嘅bb，連飲太多米水都會敏感架因爲太早吸收澱粉質可能會敏感㗎，所以唔好再妄想改變世界喇，我哋人類係要補償返俾地球，而唔係再傷害更多生命。

其實我從來冇諗過咁都可以寫篇文出嚟，我以為呢啲係常識，但原來有一班食素者係咁走火入魔。我唔知有幾多素食朋友會睇哂成篇文，但如果有，請勸吓佢哋，我代每一隻狗多謝你哋。

作者：Sunshine

無限的宇宙裡，人和物質的山，水，遠村，雲樹，又如何比得起？然而人的思想可以超越到太空裡去，它們卻永遠只在地面上。《山中雜感》－－冰心 FB PAGE: 陽光燦爛的 Sunshine

閱讀後覺得好，請多多讚好及分享～：）