如果你覺得追男仔好難,可能因為你唔識約會細節。

 

(photo via cc Flickr user MJWein)

 

至今你學識左點打扮自己,又識點去鼓勵男仔,係時候約會啦!

如果個男仔同你傾完一輪,message傾得好好地,肯約你出黎嘅時候,可能佢已經有一定嘅意思,決定黎個終極interview,令你成為佢嘅女朋友!作為面試官嘅你,當然首先要考慮你對佢到底有無意思,如果一直以黎嘅交流,令你覺得呢個男仔都過關,可以比多啲機會佢嘅時候,咁面試當然係無問題啦!但事關我唔知你地男神係咩性格類型,有啲男仔呆下呆下,真係無諗過成個行程,就咁約中午日光日白同你食一食野就走。為免變成咁,你可以喺佢約你嘅時候,反提議你想夜晚先見面,原因當然係你中午有野做啦,自己諗個體面少少嘅藉口,改返好個時間,做好前置準備。

因為夜晚可以做嘅野其實唔多,多數係食飯、睇戲、飲野,如果個男仔約得你夜晚食飯睇戲既話,其實個男仔對你都應該有意思,但係!千祈唔可以掉以輕心,作為一個擁有科學精神嘅宅女,一定要識得「大膽假設,小心求證」呢八個字。正如我上兩篇咁講,呢度嘅提議盡量係無門檻亦都唔洗面皮厚,先唔好當佢一定鍾意你先。如果你怕同佢睇戲無野講嘅,記住必須提議食完飯先一齊去睇戲,以免兩個人唔習慣見面嘅環境,睇戲大家唔出聲個幾鐘,之後食飯更加唔知搵咩講好。

 

咁我當你地去左食飯先。

 

以前我都有寫過文章,關於男仔追女仔,約到出黎見面嘅時候,喺話題同餐廳嘅選擇,我都比過基本嘅提議。因為入門常識呢啲野大家都應該有,多數係西餐或者日本野。佢要約其他嘅,你盡量探聽下可唔可以改,唔係話飲夜茶食潮州粥有問題,事實上我覺得中式野好食好多添!但始終中式餐廳個環境太光猛,人多嘈雜,好影響「面試」當時嘅環境。

出發前,當然要執返正個人,揀套啱場合嘅衫,然後你要準備幾樣野。

一、唔該帶包紙巾,可以表示下你女性化嘅一面。

二、心入面準備返一個你自己嘅困難(problems),好似之前兩篇咁講,到時請教佢。無嘅話,諗一個假設性問題——有趣而合理少少,唔好問人揀咖哩味嘅屎定屎味嘅咖哩之類嘅問題。如果真係諗唔到嘅話,就諗定你同佢之間嘅mutual friend嘅感情近況,再問佢有咩睇法。

話題呢啲野呢,純粹係救場用,你唔係男仔,理論上應該用唔到。但如果佢一副江郎才盡諗唔到吹啲咩,你一介宅女,當然宅心仁厚啦!想幫下佢嘅話,就拎返出黎用,等佢有野elaborate。

三、事前搵定間甜品舖,地點喺食飯嘅地方附近,咁就萬無一失啦。

 

我地直接飛去約會部份。

 

點啲咩食啲咩,我又無咩特別建議,唔好食到成身都係咁就OK。兩個人坐低面對面,少少緊張難免會有,如果想你地之間個感覺親密啲,例如食西餐,餐黎到嘅時候,你咪話:「咁多我食唔晒架,幫我食啲丫。」好casual咁切啲比佢,起碼令大家個氣氛自然啲。然後就開始食野啦!邊食邊傾,個男仔應該會表現下自己,哄下你開心。期間你再去了解下個男仔係咩人,同你一直以黎了解嘅一唔一樣,再去決定點做。點解我成日講要睇清楚一個人?因為呢個時候,男仔出盡奶力去追你,表現一定會好過平時好多,所以我希望你喺開心嘅同時,都盡量睇清楚對方嘅本質係啲咩人,唔好成日比外在嘅條件蒙蔽,一個人幾多錢幾靚仔都好,同你一齊之後,最緊要都係對你好——唔係物質上比到啲咩你,都唔係比到幾多驚喜你,而係真係會嘗試喺任何方面協助你,令大家成為更好嘅人。

返返正題,傾計嘅中途,對答都好重要,好嘅對答決定成個約會嘅走向。我唔係要你記得某幾句句子到時用,係話比你知男仔需要啲咩。好多男仔都不自覺好鍾意講自己,有時係興趣野,返工野,時事甚至政治野都有!老實講,如果你約見嘅男仔質素唔係好低,多數都會講下啲資訊性嘅野,咁你可以做到啲咩?首先當然都比少少反應,唔好一副老娘唔想聽你講廢話嘅樣。有時可能個話題係你唔熟嘅,佢又講得太深,你不妨直接重覆佢講嘅野,然後話你唔明,表示你一直有聽,而你想知多啲。

男仔呢方面其實好似啲獨居老人,唔會在意你到底聽唔聽得明,只要你願意聽願意學,唔係懶醒扮知嗰啲,佢地好樂意同你傾,而傾同教呢樣野本身佢都會得到滿足。

咁如果佢講到啲你唔願意討論落去嘅野咁點算?你可以將你出門前準備嘅話題拎出黎用,但當然都要有禮貌地完結左男仔講左嘅話題先啦。食到咁上下,記得拎紙巾出黎,如果個男仔拎出黎先,你都可以講句「估唔到你咁細心」,當然唔好一臉發姣,少少微笑加放少少電就得架啦!點做?我唔係女仔,我以為呢啲與生俱來,如果唔係,對住塊鏡練下,應該得掛。

 

面試完畢,終於到比錢嘅時候。我知道你作為一介宅女,內心都是心高氣傲,唔想男仔無啦啦請食飯。咁依家得兩種情況姐,一係in得成一係in唔成,有待觀察就當後者。

不過無論點,一定要拎銀包出黎扮AA,咁當然個男仔無動作,真係要你AA嘅時候,咁就皆大歡喜啦!因為你本身都諗住自己比架嘛係咪先!雖然咁樣可能代表佢唔打算追你了,但呢啲題外話啦。當佢一直對你都好有意思,好想請呢餐飯,咁你拎左銀包出黎,佢就會覺得你都唔係當佢水魚,請都請得開心啲。

咁男仔講得佢請,你拎銀包出黎佢都會叫你收返架啦,呢隻有兩個分支。

一、你對佢有意思,就話:「咁我請你食糖水啦,附近有間糖水……」你出門前所準備嘅糖水舖就係為左呢刻出動,咁正常糖水就唔會貴過餐飯嘅,呢個提議男仔都會欣然接受,同時覺得你係一個識大體嘅女仔,更加更加重要嘅係:你比左個signal佢,增加大家相處時間,咁印象都唔差啦!都叫比左個膽佢,提出送你返屋企。

二、你都係覺得佢唔係好得,你唔想俾佢請。但如果怕場面好尷尬嘅話,佢話請你嗰時,你可以笑住講:「唔好啦,咁耐先見一次。」千祈唔好講下次見都唔知幾時,因為佢有可能覺得你等緊佢約下次。咁樣講,言語上拉一拉返開個距離,佢醒嘅話應該知咩事,唔知嘅話就有得佢請啦,無謂再糾纏。

 

快樂嘅時光過得特別快,食完個糖水,轉眼間你已經要返屋企,如果佢要送你返去……同樣道理啦,如果佢唔OK嘅,就企硬唔比佢送啦,免得佢誤會,如果你俾佢送,其實件事都好明顯架啦,中間啲等車嘅時間,問多啲感情野,私人野,搏佢講兩句催情說話,確立返大家個關係。香港地咁安全,送得你返屋企,都係誠意嘅表現黎架啦!如果你同佢屋企分隔超過八個地鐵站,直情係真愛呀!去到你屋企樓下,你準備上樓之際,佢多數都會講一句……

「返到屋企記得Text我呀。」

「知道啦,你都係呀。」咁今日嘅行動基本上叫成功架啦。返到去,沖左個涼先send message比佢,再續未了情啦。

而如果你喺屋企樓下,忽然覺得想請佢上黎飲杯野嘅,我無咩意見。不過最好做定最壞打算,有咩事上黎,未確立段關係,賴數都是有可能的,投資涉及風險,閣下點做就悉隨尊便。

 

下篇會研究下關於睇戲同飲野嘅備忘。

 

 

作者:求其花

求其寫,求其賣,求其志不求奢華|求其真,求其愛,求其花不求其果

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 160363
Date: 2017-05-25 20:48:54
Generated at: 2021-09-18 17:25:07
Permalink: https://www.vjmedia.com.hk/articles/2017/05/25/160363/如果你覺得追男仔好難,可能因為你唔識約會細節