韓式史學家

政治 / 最新文章綜覽

 

 

甲午戰爭之後,朝鮮國終於獲得一個夢寐以求嘅好機會:中國終於唔再理佢。於是,喺1897年,朝鮮王熙即皇帝位,改國號為「大韓帝國」,以承大明正統(?)。不過,眾所周知,呢個大韓帝國只不過係日露之間嘅俎上肉,稱皇稱帝,只不過係列強許以確認中國勢力完全退出朝鮮半島咁解。日露戰爭以日勝露敗為結果,既然朝鮮霸者地位已定,咁樣大韓帝國存續與否就再唔重要。

1909年,由於勇武派安重根將反對日本即時吞併韓國嘅伊藤博文殺咗,第二年日本就正式吞併韓國,大韓帝國滅亡。就喺韓國亡國之後嘅一兩年,韓國出現咗一部奇書,名曰《桓檀古記》。內容講述桓因之子桓雄下凡建立倍達國,桓雄又助一熊化成人,然後娶熊女而生子王儉。王儉於開天之後1565年,建立咗檀君朝鮮,係朝鮮嘅開國君主,仲話佢哋派過人去幫帝堯治水添,連韓文都係嗰時就有。呢個開天之後1565年,後嚟又話係公元前2333年喎,即係開天嗰時差唔多公元前4000年,韓國文明原來有成6000年歷史呀!其後一段時間,「檀君」就成為韓國史界嘅新寵,不斷有檀君歷史書出現。

國家新亡,韓國文人第一件事,原來係編返本韓國史書話自己有6000年歷史,同年前後辛亥革命之際,中國人都係認為黃帝係公元前2698年出世,中華文明多極都唔夠5000年,而且大家都認同周厲王之前其實邊年打邊年都係估估下。有人話中國歷史多吹水,我睇點都唔夠檀君之民勁啦。呢類為咗政治目的,扭曲歷史,用以自吹自擂自己High嘅偽史學產品,真係不妨credit返一聲:韓式史學。

韓式史學有咩特點呢?不外乎三大特色:一、夠紫薯:冇嗰樣整嗰樣,無中生有好多奇情嘢入去,其實加咗紫薯唔會好食咗,唔加都唔係咁差;二、夠拉絲:東拉西扯不著邊際,講嚟講去都講唔出有咩實質證明,只係將啲唔關事嘅史料扯埋一齊;三、夠隱世:全部都係獨門秘方(aka老作),自然係隱世奇書。

咁當然,雖然叫得佢韓式,又唔代表係由韓國開始嘅。始終,韓國唔係第一個有歷史記載嘅國家,歷史紀錄亦都殘缺不全。最早嘅信史係由中國史家寫嘅,現存最早嘅史書係12世紀先出現。事實上,韓式史學家周圍都有,尤其是當君王發現歷史有政治作用嘅時候,佢威逼又好、利誘又好,韓式史學就會不斷湧現;而且仲會有一大批廢柴自發做韓式史學家,博上位。

今日,我哋眼中最多韓式史學嘅,係中國史學界。你往往可以發現無論古今,都有唔少有問題嘅記載,好多都好犯駁。咁搞法,係咪中國史學先係最垃圾呢?其實會係咁,不外乎幾個原因:

  1. 中國史書紀載最完整詳實,紀錄多自然問題都多;
  2. 自唐以後官修史制度非常完整,但同時朝廷觀點又會因為咁而滲入史書,當中最顯眼嘅例子就係「玄武門之變」,由於唐太宗頻繁出入史館干預著述,所以同玄武門之變有關嘅記載可以話係相當統一;
  3. 中國近代政治變動多,而且傳統操守完全崩潰,政治人物對於史書干預亦比過往更為赤裸、暴力,韓式史學自然大增;
  4. 近代往往輕視文科教育,大家嘅歷史觀都停留喺教科書。偏偏中史教科書唔係受國民黨史觀影響就係受共產黨影響,有礙歷史眼光之餘,缺乏思維訓練嘅教法,奇情又吸引嘅韓式史學,比正經史學自然易share出去好多;
  5. 因為語文能力所限,你好少會去睇外國史料,自然冇咁嘅眼光去搵其他國家嘅韓式史學。

係囉,講到咁,中國史仲唔係垃圾?睇嚟做咩呢?咁點解你又唔諗下我哋點解會分辦到韓式史學出嚟嘅呢?好簡單,歷史事實發生過,留低嘅史跡、史料,傳世嘅記載唔會係絕對單一嘅,一定會有唔同嘅人留低咗好多唔同角度嘅記載。憑呢啲記載,我哋就可以發掘出歷史嘅原狀,嘗試重組歷史事實,自然就可以發現邊一啲係因為政治理由而編造,邊一啲係真確。

或者有人會話,利用韓式史學去宣揚政治理念,都係工具嚟,有咩所謂。首先,呢啲就係中共最常用嘅手法,今時今日大陸人周不時話金融風暴係中央救香港,或者講到香港好似冇咗東江水會死咁,其實都係韓式史學大行其道嘅結果。我哋要建立嘅係民主自立嘅香港,而唔係又一個愚民世界,所以呢啲手法係不可取;另外,韓式史學以編造為主,破綻極多,好容易駁斥。到時你宣揚未成功就已經畀外敵駁倒,頓失支持亦無謂。

舉個例子:一啲維吾爾人為咗宣揚「中國歷史唔少係假歷史」,就自製咗幾項韓式史學出嚟;然後香港嘅獨派組織就傻更更走去share喎,結果咪就係連支持者都叫佢哋「好心唔好亂share嘢啦」。一次咁、兩次咁、三次咁,原來你係信口雌黃嘅,以後點信你好呢?

又一個例子:為咗論證「香港自古以來不屬中國」呢個本身就好韓式嘅 statement,有例如「中國1912年建國論」、「香港從未被叫中國嘅國家直接統治過」等等韓式史學嘅市講法。首先,好簡單,以英文文本為準嘅《北京條約》同《展拓香港界址專條》,同埋中英文有同樣效力嘅《南京條約》,三大香港主權條約都係英國同China簽嘅,而唔係同Daicing Gurun簽嘅。咁China係咩呢?中國囉(咁你可以話支那嘅,咁你鬧咩人做支那人吖?中國人囉)。如果「中國」係1912年建國,咁1842年英國同咩國家簽嘅呢?英國又喺咩國家手上得到香港嘅呢?你答清國,但咁三條條約有兩條都冇效架喎,因為係用China簽架喎。當然,講到尾,中國係一個文明概念,只要有一個政權承認中華文明正統、服從中華文明教化、保護中華文明存續,咁呢個國家就係中國;近代之後呢個概念先轉變成民族國家概念咁解,但依然冇影響佢嘅傳承,直至中共竊國而止。

事實上,歷史上唯一成功自力由中國獨立建國而且獨立到今日嘅越人,佢哋嘅傳統史書同現代史書都好大方咁寫住自己畀中國統治咗1000年。

要舉例子,仲有好多。遠嘅唔講,近呢十年見過嘅經典韓式史學,仲有「台灣從非中國領土論」、「台灣漢人皆混種論」、「中共領導中國抗戰論」、「香港人為百越族遺裔論」、「中國發現美洲論」、「高麗國發明印刷論」、「孔融與父母不睦抵撚死論」等等,都係韓式史學嘅代表作。其實呢啲奇論,於建邦立國無補,又易於引為笑柄。喺現世既無意義,到後世又會亂惑人心,最後只會變成日後研究「香港人恨建國恨到鳩咗」嘅史料。成功建國尚好,失敗嘅更加係千年笑話。咁又有咩謂呢?

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【遊戲新聞】一年一度 E3 遊戲展 講完無影嘅作品年年都有 by 森麻
    又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總 […]…
  • 國安法下的香港電影 by Terence Yun
    倘若國安法成為指引下,創作人又再多一重限制,這條紅線之無形壓力便走進創作人的腦海之中,無形刀壓在創作人頸上。香港沒有審批劇本制度,不同大陸,批左就可以開拍(當然亦有批左,拍左都不能上畫),而香港沒有審批,意味著創作人在創作時要估計和預計在什…
  • 八仙嶺縱火案翻案問題 by 蕭少滔
    我以下按刑事偵緝的「排除法」,讓大家客觀地重組案情。大家如有指正及補充,可以有助澄清事實的話,無任歡迎。…
  • 八仙嶺之殤——災難回顧報告 by 無妄齋
    以下為我們翻查當年事故資料所得,目的並非要指控當年誰是誰非,也無意勾起當事者的傷痛。相反,是旨在透過重溫事件經過及法庭紀錄,為讀者提供較為完整的說法及根據,並寄望從此杜絕坊間的主觀臆測,以正視聽,還世間一個公道。…
  • 2020TVB份業績——間公司由內爛到外 by 庵念慈
    去年都仲有10億廣告收入(點解仲有人會去TVB落廣告),雖然跌左一半,不過以今年TVB個情況,可能更惡劣,VIU TV搶廣告真係屌打,個個爭住落《調教你MIRROR》。…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
歡迎讚好我們的facebook page,免費資訊源源送上。

文章資訊

ID: 160646
Date: 2017-05-30 05:11:02
Generated at: 2021-06-13 13:59:04
Permalink: https://www.vjmedia.com.hk/articles/2017/05/30/160646/韓式史學家