【其實唔難】如何三十出頭可以穩定咁收到六位數字利息?

 

(photo via cc Flickr user Flavio~)

 

我睇到某某媒體係度寫有一個金融才俊(據講係匿名既)推介自己以唔知咩槓桿操作,令到自己三十出頭已經可以穩定咁收到六位數字息。然後佢仲會出書去推銷自己既投資方法。

我心諗,既然係咁,大家不如慳番筆。點解咁講?首先我要質疑下:要月入六位數字既息,究竟佢依家要有幾多錢投資係手?保守估計,都唔方高風險喇,我當五厘啦,咁即係起碼都二千至三千萬無走雞。佢話佢依家只係三十出頭,大學讀金融出身,即係二十鬆D,開始佢既發達大計,我當佢唔知點咩grant loan 都唔駛還,已經有本金一百萬俾佢去滾,嘩,佢唔知玩咩leverage 玩咩fixed income 可以滾到成年均回報成四成既產品呢。咁真係就算得,都幾高風險喎。

拿,不過又唔好事事質疑。始終零八年至一八年係水浸期,幾乎買咩都升。我就曾經係FB分享過點樣可以不成功便成仁既即時發達例子,說明香港錢真係好易搵,如果你唔驚破產的話。在下再舉多少少例,講下如果你眼光真係超獨到既話,係「其實唔難」地達到佢既境界架。當然,睇我寫野完全免費啦。只要你問到叮噹借時光機的話,以下資訊真係好有用。

 

1。買騰訊!

我地唔好咁極端去講騰訊一開始只係三蚊果陣啦。係二零零八零九年爆到天昏地暗果陣,騰訊曾經得番五十蚊。依家十年過去,騰訊去到接近二百七十蚊,更加係一拆五,即係話係接近一千四百蚊。換句話說當中既金額係翻近二十七倍。如果果陣某君真係有百零二百萬,咬緊牙關,放入騰訊,咩都唔做,佢的確係可以甚麼派息都穩袋十萬之類。當然要識得有早知無乞衣至得啦。你好似呀哨牙咁醒都放左,咪無行囉。

 

2。去買樓!

人人都知道係香港買樓係唔會蝕架。係唔會見頂架。樓市永遠只會升升升架渣。如果係十數年前,樓市低迷既時間(無人依家記得有咁既時間,所以提出黎唔好鬧我 🙁 ),你走去一D無人地帶置業,例如鴨俐洲果D位,嘿嘿,果陣可能十幾萬首期,依家層樓隨時已經成千萬,咁你係咪又已經爽過爽健先?當中仲未計你可以不斷樓換樓。如果計埋,隨時你依家住緊幾千萬豪宅,唔好話海之戀啦?愛之戀都買得起!

 

3。簡單總結!

簡單講,香港真係一個隨時發達既地方。以上兩例,亦都充分說明唔一定要借到一屁股債去買期指,先可以發達。你最緊要有父資產,老豆借到一百幾十個俾你,何愁大業不成?所以一個隨時發達既地方,係無人理會琴棋書畫,或民主自由架。最緊要有個地方,可以開到電視,睇TVB,人生真係一大快事。所以外母睇唔起D無錢上樓既男仔,真係好應該。無錢上車,又唔識得買騰訊買恆大,唔怪得失敗啦。我會叫個女唔好嫁埋你。完。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 160788
Date: 2017-06-01 03:27:29
Generated at: 2021-09-29 07:17:06
Permalink: https://www.vjmedia.com.hk/articles/2017/06/01/160788/【其實唔難】如何三十出頭可以穩定咁收到六位數