《蘭花刼》:十年倉底貨又如何?無線嘅慣性收視,播雪花都會贏

 

香港人忍耐能力之高,真係唔單止震驚世界,直頭震驚全宇宙所有星體。

我聽口痕友講,最近有一套新上既TVB黃金時段劇,竟然係十年前既倉底貨,播出黎解像度可媲美信和舊時老翻VCD。難為左一眾演員,等足十年,仲要幫TVB係度塗脂抹粉,拍晒宣傳片講到戲點樣點樣神劇,又真係劇本寫得好出色——既然咁好,點解要等十年。我果位口痕友好鍾意蘇玉華,佢話:如果我係蘇玉華,都真係佛都有火,唔爆得佢樽,咪又係因為賣佢怕係大佬?

一套十年期既劇,家庭觀眾如果都可以照單全收既,我真係奉勸你一句以後不論返工返學,都千祈唔好吹人地慢,話人地無交功課趕唔到deadline 之類,反正你等足十年既野都可以睇啦。如果仲係舊時片場播帶年代,我真係驚會隨時食帶然後出播放錯誤訊號呀。:O)楊過等姑姑都可以等到十六年,唔爭在啦。仲竟然可以興趣盎然咁研究下邊個藝員十年都無老,我真係服左你咯。畢竟都係想放工返屋企抖下輕鬆下唶,做乜咁計較幾年拍喎,right?

 

已故演員魯芬

 

仔細D睇,呢套劇有不少甘草演員或者配角,甚至已經係播出時間經已歸天。個人認為以首播劇黎講,成件事真係黑色幽默到一個點。本來拎先人出黎講,或者對某些人黎講係會有欠尊重既。但係咁喎,如果墳總泉下有知通到靈訪問佢地,佢地會覺得自己生前都睇唔到有份參與演出既作品呢件事,究竟係開心定係唔開心呢?點樣講,拍一套劇,都係時間心力,有血有淚,拍完收埋唔播,點樣對演員黎講,都係一件遺憾掛。

不過廢話講完喇。老蕭做燈神之前,就曾經講過:無線既慣性收視,播雪花都會贏。依家播十年凋謝晒既蘭花,都係花,咪又係一樣。ViuTv 再無咩秘密武器,例如搵熟食廿年既宮雪花上啪啪聲太好聽係黃金時間對陣的話,我就真係唔多睇好囉。

 

作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 160844
Date: 2017-06-01 15:04:12
Generated at: 2021-10-24 10:58:48
Permalink: https://www.vjmedia.com.hk/articles/2017/06/01/160844/《蘭花刼》:十年倉底貨又如何?無線嘅慣性收視