點解司機同廚房佬日日都M到咁款?

(photo via cc Flickr user 瓦力_WALLACE)

 

每次要同司機或者廚房佬夾嘢我都好頭痛,因為佢哋M到嘅次數仲密過我,M到即係點?脾氣暴躁、無理取鬧、睇咩都唔順眼,總之就生人勿近。你同佢講嘢佢係可以完全唔理你,當你透明,大佬咁你即係聽到定聽唔到呢?可唔可以有禮貌少少,尊重返我?「嗯」一聲都好吖。有時忍無可忍或者件事真係好趕我唯有問多次,佢又話:「妖!唔好煩住晒啦!」如果遇著佢心情唔好,真係會無啦啦發脾氣鬧你一餐,或者cut你線,明明我已經好有禮貌對佢,但係唔知點解佢都當我係殺父仇人。

唔好以為好似撒嬌的女人咁嗲幾句就會無事,佢哋係唔受呢套!我亦都試過跟返佢哋個粗豪tone講嘢,都係無用。可能你話佢大聲唔代表佢無禮貌,老老實實,咁大個人,係大聲定係無禮貌,點都識分,佢哋嘅表情,語氣永遠都係好不屑,最好嘅形容就係M到咁款。究竟點解佢哋態度要咁差?係咪為咗想凶人,令到無人敢叫佢哋做嘢?我真係唔知。除咗腦細,佢哋真係個個都凶,經理都無面比,但係所有同事都只可以忍,鬼叫公司無咗佢哋唔得咩,Marketing無咗可以請過第二個,但係司機同廚房佬真係好難請到啱,唯有安慰自己,佢哋唔用粗口鬧其實已經係十級畀面。

或者係我唔識體諒佢哋,廚房佬喺廚房度熱屎辣辣,對住個爐係咁炒,出晒汗,係人都躁啦!司機長期困住喺架車度,廁所都未必有得去,梗係躁啦!喂,咁我坐寫字樓雖然係有冷氣涼,但係我畀腦細鬧,處理客嘅無理投訴,十九幾萬個deadline要趕,仲要對住啲又懶又賤嘅同事,我夠躁啦,又唔見我發泄喺你哋身上?唔知點解藍領嘅人永遠覺得白領嘅人係齋坐涼吓冷氣就有人工收,我加班加到零晨無補水,你日日準時收工又點計先?根本工作性質唔同,係無得比較。大家都係做嘢,打份工,拿拿臨做好件事,收工咪算囉,係要為難人,畀氣人受,呢種究竟係咩心態?

「強哥,麻煩你今日送呢袋嘢去呢個地址。」我說。
「。。。」強哥無反應,又唔拎走袋嘢。
「唔好意思呀,腦細話今日要送,好趕㗎!」我說。
「妖!你唔一早同我講!次次都話急!」強哥M到樣地說。
「妖!係囉!次次腦細都咁遲先同我講!我今日都已經忙到嘔泡,一陣仲要開會,真係好煩囉!」我M到樣地說。
「唉,得啦,我同你搞掂佢。」強哥說。

要同司機同廚房佬相處,秘技就係同佢哋一齊M到咁款,同佢哋一齊躁底,甚至躁過佢哋,咁就大多數情況都可以安然渡過,共勉之。

 

P.S. 當然我都有遇過啲好好人嘅司機同廚房佬,有啲仲好幽默添,不過係極少數,又或者係我比較黑仔,遇著嘅多數都係唔好老脾啫(戴頭盔先)。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 160850
Date: 2017-06-01 17:19:40
Generated at: 2022-08-11 19:41:20
Permalink: https://www.vjmedia.com.hk/articles/2017/06/01/160850/點解司機同廚房佬日日都m到咁款?