宅男之「公仔人」初體驗

(photo via cc Flickr user Takashi Nishimura)

 

學生時期既自己零用錢唔多,基本上車錢飯錢每日可能得20蚊左右。為左慳錢會幫同學作文,借功課俾同學抄去幫補下自己,而拍拖洗費都係由我唔食飯儲番黎。年尾流流既假期就係我呢d學生哥搵錢去拍拖既最佳時機,而我果陣時就搵左份好難忘既工。

「等我同你講解下工作流程,你其實只係周圍行下同d人合照下就得,做4個鐘之後就可以收工,出糧就即時出埋俾你,有無咩問題?」

「無問題!」我果一刻答得好爽快,因為我未知道將會發生咩事。

「好啦,咁你可以去換衫啦。不過你記得去左廁所先,陣間無得去架。」

當我去緊廁所既時候,個腦不停諗緊:「4個鐘200蚊又唔洗點做又幾好搵喎,如果每星期番一日都好。」

但當我去到更衣室既時候就俾眼前果套「衫」嚇親,因為呢套就係又厚又大件既公仔衫,所以我呢一刻先明白點解200蚊……

幾經辛苦先將件厚厚公仔衫著到上身,以呢件衫既厚度黎計,冬天著住底衫加埋件公仔衫企喺海旁絕對夠用,但夏天我諗會焗暈都似,可想而知幾咁「溫暖」呢?加上一個半透氣既公仔頭,我呢隻兩隻腳行既鹿出世啦!(車,咪又係聖誕老人個打雜!)

基本上成件衫同個公仔頭加埋唔算太重,雖然有個位透風同透氣,但都係一樣熱同焗。至於睇野方面個設計就會令你睇到路認到人,唔會令你碌落扶手電梯甚至仆親既,不過視野有限要打醒十二分精神,我都唔想上報紙。(Eg. 提早過聖誕商場人鹿激戰3分鐘)

 

「估唔到你又著得幾好睇喎!不過提提你,出面好多小朋友架,唔好整喊佢地啊。」

「如果見到鹿都喊咁見到聖誕老人咪發惡夢?」

「咁你就大錯特錯啦!」

「下?點解?」

「因為聖誕老人會有糖有禮物派俾佢地,而你係乜都無….」

出到去商場發現人山人海,或者係因為今日平安夜所以好多一家大細、情侶、一大班朋友行街感受下節日氣氛。至於聖誕裝飾方面,來來去去都係有棵用後即棄既聖誕樹、出奇地殘眼既閃燈擺設、一盒盒用花紙包好既道具禮物、頭頂FingFing下既裝飾、仲有聖誕………

「呠….=3」

我好清楚聽到聖誕老人放左個大臭屁!(因為佢行我前面)

我將來一定會同我既小朋友講:「聖誕老人好鐘意放臭屁,因為係送俾唔乖小朋友既聖誕禮物黎!」

其實唔只好多小朋友都同我影相,仲有好多後生仔甚至公公婆婆同外國遊客都有,每次影相之前我都會同佢溝通幾句。Eg.「小朋友你幾歲啊?」「聖誕老人果度有糖食,不過唔好咁快食哂。」「唷確傻(ようこそ)」「Welcome to Hong Kong!」(強調一次:我真名並唔係叫阿勤)

至於咩「甫士」就要睇下佢地想點影,當然都有抱住小朋友既「甫士」啦。(不過因為件衫又熱又焗真係特別吃力)

 

正當我同完一堆小朋友影完想小休既時候,俾我遇到我以前班上出名又惡又殘雞既女同學C小姐(基於安全考量我全部都用化名)。不過女人的確係一種表裡不一既動物,佢同佢男朋友一齊既時候竟然係出奇地溫柔同斯文…

「BB,不如我地埋去同呢隻鹿合照啦?幾得意咁喎。」

「好。」

聽到佢講BB呢一下我唔係以為佢發緊夢,我以為自己發緊夢咁,我為左安全梗係想盡辦法去逃走….

「唔好意思啊,可唔可以同我地影張相?」

但比著平時既佢一定無可能係咁好禮貌啦咁nice!!

「黎同我影張相!」「喂!笑下得唔得?你便秘屙唔出屎啊而家?」「擺下甫士啦好無?你食薯條唔__落茄汁架?」「__!你條呔點打架?阿媽無教你啊?」「未訓__醒啊?影張相都搞到成隻野咁無精神!」「放低盒飯!幫完我先准食!」「__!你d字寫好d得唔__得啊?打晒風我點抄?」

我個腦只係諗起呢個佢,你明唔明果種華麗轉身既分別啊?

「好….」我專登用低八度既聲應佢。

「多謝你啊,Merry Christmas!」或者愛情既魔力可以令一個癲婆變番一個真少女,不過我都估唔到可以差咁遠。

「咦,miss你同張sir行街啊?唔怕俾其他人見到咩?」C小姐仍然係少女模式。

「係啊,放假都要休息下嘛!」

「你都拍拖行街街,咁張sir我都一樣既啫…」

「既然咁不如大家一齊影張相?」我想講之際俾呢位少女搶左我句對白。

「好提議,我地幾個一齊影啦!」

「哥哥,唔好意思啊。可唔可以再同我地影多兩張相?」

「無問題。」直到呢一刻我完全唔相信眼前呢個就係我識既C小姐………

 

做做下唔覺唔覺就3個幾鐘,又係時候準備收工,不過呢個時候我就見到佢自己一個人行商場…

「傻佬,我地今晚出去睇下燈飾啦不如?」

「聽日我地bbq完先再去睇啦好唔好?」

「平安夜喎今晚….」其實我聽得出佢好唔開心,不過為左俾個驚喜佢只好拒絕。

「我知,但今日真係唔得….」我決定今晚唔陪佢。

「咁由佢啦……」

我呢隻鹿當然唔放過機會行埋去佢度啦…..

「咦,大時大節一個人行街?定係等緊人呢?」

「唔係啊,我都想等緊人…」佢個表情係好好好好唔開心。

「唔好唔開心啦,我地不如一齊影張相啦!」我梗係醒目地將佢唔開心既狀態Tune下先。

「好啊…..」其實我好似迫緊佢咁。

「笑下啦,扁咀唔好睇架!」

「嗯…」

「唔好唔開心啦!」我呢隻鹿用右前腳一野摸落佢個頭度。

「啊!!!你做咩摸我個頭…………..」好多人突然間目光望住我同佢,有半秒鐘諗緊:「我會唔會俾自己女朋友當係痴漢咁俾人拉架?」

「Sorry,我唔知道你唔鐘意….」

「唔係,其實我好鐘意摸頭但好似有d怪…」

「我當然知道你鐘意啦傻婆!」我好想講出口但又唔得。

「我走啦,Byebye!你都加油啦!」見到佢笑住咁走我都放心D…..

 

終於到收工一刻,番到後台換衫既時候發現我其實係濕哂之餘仲有超強烈既汗味。

「你都幾大汗喎,洗唔洗去後面員工更衣室沖身先?」

「唔洗啦,但我想要番d合照得唔得?」

「無問題,你俾低你email我,我夜少少send番俾你…」

「另外呢度係人工250,麻煩你簽收。」

「250?」

「果50係Bonus黎,我地遲下會call你番工架!唔該哂。」

 

結果我就身水身汗去買份佢想要既禮物送俾佢……

「先生,有咩幫到你?」

「我想要果個紫色既水晶球。」

「送俾女朋友呢?洗唔洗用盒同花紙包起佢?」

「係啊…………….」

個水晶球差唔多係成日人工,雖然辛苦但一諗起佢好開心個樣就咩辛苦都無哂(初戀係唔同d)。不過我自己卻重演自己既「悲劇」(**註1)「屌,就到果下甩手飛左落地下!」

「對唔住,我跌爛左送俾你既紫色水晶球…」

「有無搞錯!你係咪掛住望女仔?」

「無啊…..唉,就到果下我自己甩手…」

「算啦!我地今晚砌番好佢啦。」

「今晚?唔係BBQ咩?」

「梗係啦,咁貴既野無理由丟左佢掛?」

雖然最終都係痴唔番但唔知點解大家都好有心機(野都攤到凍哂),結果呢個碎左既水晶球變成一個只屬於我地既水晶擺設。

可惜既係我無能力將碎左既心復原,除非我遇到………

 

註1:我就經常性牛油手,無論係蛋糕西餅Pizza Puzzle總之易碎易爛既野都跌過哂。

註2:我無再番過呢份工

 

 

作者:陽光宅男

陽光宅男
人如其名,只係一個有陽光氣息既宅男,鐘意打機9up講笑話但懶到出汁,保證大家完全估我唔到。FB PAGE 陽光宅男Ken

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 160896
Date: 2017-06-02 04:56:52
Generated at: 2020-10-31 15:08:33
Permalink: https://www.vjmedia.com.hk/articles/2017/06/02/160896/宅男之「公仔人」初體驗