一個「中國」,兩頂皇冕?

 

 

1636年,即位十年嘅金國大汗皇太極即皇帝位,改國號為大清,改族號為滿洲。喺呢一件事件上面,大家會諗到啲咩?

呢度我會提出呢個問題:點解皇太極要喺呢一年改國號呢?點解已經即位十年又要再即位呢?

要回答呢第一個問題,首先我哋可以睇返1636年前後發生過咩事。一查之下,原來之前一年,金國出兵攻打蒙古察哈爾部,察部自知不敵而降。而呢個察哈爾部嘅首領,就係自忽必烈稱大元皇帝之後,正統傳承嘅大元大蒙古國皇帝額哲。額哲投降之後,皇太極就成為新嘅蒙古大汗,第二年就正式稱帝。

等等,元朝唔係畀明朝滅咗咩?北元唔係改名做韃靼咩?點解到明末都仲有元朝嘅?冇錯,呢個先係真正嘅問題,亦都係中國史書好少提嘅一點:自從1368年元順帝北狩,直至1644年清兵入關之間,「中國皇帝」呢個稱號似乎係分裂成兩個。而呢一點喺傳統嘅中國史官私修史角度嚟講都係不可思議嘅。

出現呢一個情況,原因係明朝建立之後,雖然多次「犁庭」,但係都冇辦法完全消滅元朝,明朝充其量只係喺皇帝離開中國本部期間自立為帝,技術上並冇正式繼承元朝。明軍最多就係喺捕魚兒海之戰將元軍主力擊破,但都係捉唔到元朝皇帝,結果明朝廷只可以同人講:「蒙古改號韃靼,廢咗大元國號囉。」咁當然,呢個只係明廷單方面宣佈。係咪好熟口面呢~同中共自稱繼承咗中華民國真係完全一樣呀~[1]

點解係單方面宣佈?因為,其後蒙古統治者一直都強調自己係「大元」皇帝,尤其是兩個蒙古政治重要時刻:也先太師篡位,自號「大元天聖可汗」,建年號「天元」[2];巴圖蒙克即可汗位,自號「大元可汗」[3]。亦即係話,根本喺蒙古人眼中,甚至成個塞外地方包括女真人地界,佢哋都認為元朝尚在而明朝新立;反而喺明人眼中,除咗要主管外事嘅官員之外,真係冇咩人知元朝未亡。

咁樣嘅話,就可以答到點解皇太極即位十年之後突然要改國號,又重新即位。因為佢成功滅元,亦都得到蒙古其他部落嘅支持,正式即位為大元皇帝──亦即係蒙古可汗。咁依家易姓易族,自然都要跟中國傳統,改國號、新受命啦,亦都係皇太極整合金國崛起多年所糾集嘅各個種族嘅機會,佢包羅女真、蒙古、漢人、朝鮮人而建立「滿洲人」呢個新民族作為大清國嘅國族;之後多爾袞要漢人薙髮易服,話唔定都係想延續皇太極嘅滿洲政策,當然,事實係唔係就不得而知啦。

所以,由另一個角度睇,成個明朝其實都係「南北朝」格局,一個中國、兩個皇帝,互稱南朝北朝。最後北朝嘅皇帝帝位被奪,再由北朝乘南朝內亂消滅埋南朝,咁嚟結束咗中國歷史上呢個「第二南北朝」時期。不過有趣嘅係,清朝治世都未完全將兩個皇位重新融合,清朝皇帝一直都另有一個蒙古汗號,而且一直都有娶蒙古科爾沁部女為后妃[4];反而到清朝結束嘅時候,先因為佢哋退位詔書話「總期人民安堵,海內乂安,仍合滿、漢、蒙、回、藏五族完全領土為一大中華民國」,咁先真係將蒙古嘅皇權同中國嘅皇權完全結合,然後即時交畀新嘅民國政府。

最後,不得不說明嘅係,以上都係一啲未有定論嘅諗法。如果大家有其他意見,歡迎留言討論,睇下可唔可以繼續充實,或者直接否定咗佢。多謝各位!

 

[1]元朝係唔係中國呢?元朝治世,佢哋自己都拗呢個問題拗咗大部分時間,仲出現過一次因為皇帝近身侍衞反對漢化,佢就殺咗厲行漢化嘅元英宗。不過去到元順帝治世,元朝已經定調咗自己係繼承金宋兩國而成中國皇帝。所以元朝係中國,呢一點毋容置疑。

[2]但文獻內係用「大元田盛可汗」同「添元」,係蒙古出塞日久中文水平下降定中文史料有心玩嘢就唔知啦。

[3]同樣,文獻係用「達延汗」,呢個就有可能係明人已信元朝滅亡,就咁音譯蒙古人發音唔準嘅「大元可汗」。

[4]科爾沁部為成吉思汗之弟拙赤合撒兒之後,額哲之父林丹汗治世,原屬於林丹汗部嘅科爾沁部叛歸金國,佢哋亦係最早一批支持皇太極嘅蒙古部落。

 

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

  • 【遊戲新聞】一年一度 E3 遊戲展 講完無影嘅作品年年都有 by 森麻
    又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總 […]…
  • 國安法下的香港電影 by Terence Yun
    倘若國安法成為指引下,創作人又再多一重限制,這條紅線之無形壓力便走進創作人的腦海之中,無形刀壓在創作人頸上。香港沒有審批劇本制度,不同大陸,批左就可以開拍(當然亦有批左,拍左都不能上畫),而香港沒有審批,意味著創作人在創作時要估計和預計在什…
  • 八仙嶺縱火案翻案問題 by 蕭少滔
    我以下按刑事偵緝的「排除法」,讓大家客觀地重組案情。大家如有指正及補充,可以有助澄清事實的話,無任歡迎。…
  • 八仙嶺之殤——災難回顧報告 by 無妄齋
    以下為我們翻查當年事故資料所得,目的並非要指控當年誰是誰非,也無意勾起當事者的傷痛。相反,是旨在透過重溫事件經過及法庭紀錄,為讀者提供較為完整的說法及根據,並寄望從此杜絕坊間的主觀臆測,以正視聽,還世間一個公道。…
  • 2020TVB份業績——間公司由內爛到外 by 庵念慈
    去年都仲有10億廣告收入(點解仲有人會去TVB落廣告),雖然跌左一半,不過以今年TVB個情況,可能更惡劣,VIU TV搶廣告真係屌打,個個爭住落《調教你MIRROR》。…
  • 如何成為護士?(包括登記護士與註冊護士) by Su子
    呢篇野係寫俾考完DSE,有志投身護理界既所有同學。…
歡迎讚好我們的facebook page,免費資訊源源送上。

文章資訊

ID: 160976
Date: 2017-06-04 17:51:44
Generated at: 2021-06-13 12:55:50
Permalink: https://www.vjmedia.com.hk/articles/2017/06/04/160976/一個「中國」,兩頂皇冕?