攝影初學者的六課重要練習（上）

係今時今日呢個圖像主導既年代，每人手上拎住一部手機，已經可以當自己係一個攝影師。但當你開始認真看待攝影，去買一部相機開始攝影，並嘗試去將自己覺得都將滿意既作品同網絡上既靚相比較既時候，就會發現，點解人地既作品會有難以解釋既吸引力，而自己既作品就開始有講唔出既奇怪。可能你都試過咁既情況，好多時對住一個明明肉眼睇已經覺得好靚既景，但打算拍攝既時候居然無從入手，唔知應該點去影。

到底問題出左係邊？因為人地部相機既性能較好？因為人地後製既技術較好？好老實講，係會有影響，但最核心既原因係，你未正式打開你個隻攝影眼。

下面我會提議六課練習畀各位，今次係上篇，先講最基本既頭兩個。

我諗有唔少開始學攝影既人，都一定會上網自學一下相關知識，例如咩光圈快門iso白平衝焦距構圖黃金比例等等，唔好拋書包住，呢一刻就先放低佢地先。然後，拎出你既相機或者手機，插上一技日常用既鏡頭，例如18-55，24-70之類既鏡，將相機調較去自動模式（P mode），總之拎起就影得便可，然後出街練習。先講下練習既內容先：

第一課練習——觀察光線陰影

當你係街上面行既時候，可以注意光線既形態。無論日與夜，光線都係攝影師一個好重要既題材，因為攝影本來就係記錄光。平時係街上面行，可能未必會留意到周圍因為光線而出現既靚景，所以第一課練習就係，觀察光線然後記錄。光線主要係兩個方法存在，一種係陰既環境見到既光，另一種係光既環境見到既影。

一開始如果唔知道點樣可以影得靚，係絕對無問題，單純將佢記錄落黎都可以。但最重要係，要開始留意到光線，發現到陰影。無論日頭既太陽光，或者晚上既街燈一樣，唔單只要留意，仲要敏感佢既存在。掌握到靚既光線，你既作品就會開始有吸引力，因為光線為你既作品帶黎一種對比。如果想令自己更集中留意到光線陰影，可以將相機調較到黑白模式，一目了然。

第二課練習——觀察圖形線條

無論係人為既建築、花紋、圖案，或者係大自然既當中，都有好多線條分明既圖形。簡單到可以係圓形、三角形、梯形等等。圖形係另一種攝影師鍾意係作品入面呈現既原素，佢地未必係好直接咁拍攝圖形既實物，但佢地係構圖既過程會參考圖形，或者將圖形隱藏係相片當中。

你練習要做既，就係行街行山既過程入面，留意身邊事物既形狀。見到一啲無論明顯既圖形，或者唔明顯但自己見到既圖形 – 例如係唔同景物，甚至人都可以，就將佢拍攝落黎。同樣，一開始唔知點影得靚係無問題，最重要係練習既過程，令自己以後多一種敏感，學識留意沿路既一切，將各種圖形既元素收納係自己未來既作品構圖當中。同樣地，如果想令自己更集中拍攝到不同形狀線條，可以將相機調較到黑白模式，因為減少左色彩既干擾，線條更明顯俐落。

練習既方式好簡單，你每個星期至少搵一日時間，當今個星期既主題係觀察光線，你出去練習個一日就咩都唔好理，全日集中觀察同拍攝光線，愈多愈好。然後下個星期畀自己既主題係圖形，去練習個一日就集中留意街上既圖形。

咁既練習有咩目的？唔知你地身邊有無啲鍾意攝影既朋友，成日好似著左魔咁望向一啲你都唔知佢望咩既地方？然後見到佢地會一臉興奮咁拎出相機去影一啲你覺得唔值得影既野，後來到佢上傳作品既時候，先會發現原來個個位置係可以變成一張咁有魅力既相片？當你做完呢啲練習，就可以慢慢進入呢個世界，去發現身邊未曾發現既美景。

如果大家想知道攝影相關知識，呢啲教學上網真係隨手可見，大部分基本上都係免費。但點解好多人已經明白晒好多知識，但都無從入手唔知點去影一張好既相片，核心原因係未識得觀察。希望呢兩個練習幫到你，而下次，我會提供另外幾個可以幫助大家搵攝影題材既觀察練習，到時記得收睇，多謝你地睇到呢度。

作者IG：https://www.instagram.com/kianleephotography/

作者：木人里

一個心地善良既仆街。

閱讀後覺得好，請多多讚好及分享～：）