我係95年出生,今日大家喺度爭論「六唔六四」,又點點點點點,我心諗關我咩事呢?

 

 

細細個就睇電視見到每年六四維園燭光燦爛,去到中學老師同我講六四,再因為參與社運組織,而真係有接觸六四晚會——仲記得有契機嘅第一年嗰晚落大雨,我要返工OT,冇去﹔後來即使有去,我都只係出現喺街站,參與點算籌款嘅工作比較多,而冇入過場內。所以嚴格嚟講,我係冇正式參與過六四嘅晚會嘅。

但因為身邊人,我睇咗好多關於六四嘅嘢。你問我睇嗰陣覺得點啊,作為一個人咁就點都有啲情緒同感受嘅。但對我嚟講,六四當時帶畀我最多嘅係震撼:「原來喺咁近我哋嘅地方,有個咁嘅政府係會殺咗啲學生,係咁唔人道。」睇完六四嘅嘢,基於人道理由我唔會反對平反六四,而更多嘅係似睇咗一部悲劇小說一樣,拎咗要拎嘅嘢之後就完咗。

點解會咁冷漠?我諗因為我係95年出生,我冇咩同中國有接觸,我冇好似上一代人咁睇住電視直播,睇住報紙喺咁報嚟見證六四掛。你問我對我嚟講最記得最記得嘅,反而係有輪梁錦松偷步買車、沙士同埋推廿三條,然後五十萬人上街,再去到後尾阿董伯腳痛下台。今日大家喺度爭論「六唔六四」,又點點點點點,我心諗關我咩事呢?我知道咗鄰國發神經,我知道鄰國成班癲佬咪得,鄰國班人都覺得國家好經濟好就通通都可以忘掉嘅時候,我做咩要為佢哋擔心?

守護歷史、保護真相我支持嫁,但係係要以點嘅形式呢?點解要講到唔去六四晚會就忘記歷史呢?八九六四對香港民主進程嘅推動係不可否認嘅,我哋要記得佢係因為基於地緣政治,係基於我哋曾經受佢影響。出於人道理由我哋都係應該悼念嘅。但係六四嘅燭光晚會要去嗎?對我嚟講,不了,因為搞六四晚會嗰個支聯會係撐「建設民主……鄰國」嘅,我對呢樣嘢冇興趣。「平反別人的六四」、「追究鄰國屠自己城」非我責任,但我絕對唔會反對。

與其話大家喺度討論去唔去六四晚會,不如話大家係拗緊大家仲有冇去六四晚會嘅必要以及今後我哋應該以何種態度面對六四。而我覺得唯有擺脫呢種「做/唔做」,而認真去諗「做緊咩?」「點解要做?」以及「以後應該點做?」先會為我哋嘅爭論帶嚟意義。

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 161072
Date: 2017-06-04 05:21:40
Generated at: 2020-10-28 04:44:22
Permalink: https://www.vjmedia.com.hk/articles/2017/06/04/161072/我係95年出生,今日大家喺度爭論「六唔六四」,又