青山醫院對面,將興建三萬人公共屋邨?

 

嗰一晚,你鼓起勇氣,想同女神更進一步。一直以嚟,你都借頭借路做搞手,照顧晒班大帝好幾次,為都係同女神熟下先。今晚,你終於問出呢個問題:

「你住邊架?我送你吖?」

「青山。」

唔係話歧視精神病人,不過我相信,聽到呢個答案嘅錯愕程度應該係僅次於答和合石,因為……「乜青山有人住嘅咩?」

 

相信無論係一般人嘅認知,定係專業判斷,精神科病人係需要一個靜養嘅環境。當然,我唔係專業,如果唔係都請專業人士指正。不過,青山醫院的確係起喺一個人煙稀少嘅地方。雖然唔係完全冇民居,但所謂嘅民居其實係得四層樓高嘅政府宿舍。至於其他設施,不妨睇下地圖:

 

點解提起青山呢?最近有人向我報料,話原來政府打算喺離青山醫院一巷之隔嘅地方(現為屯門第54區第3及4(東)號地盤,下稱「三/四(東)西」),起個可以容納過萬人口嘅公共屋邨,而且土地平整工程喺2015年已經開始咗:

 

留意上圖最各個嘅填色嘅部分,綠色部分就係屯門第54區第3及4(東)號地盤嘅範圍。呢個位置依家仲可以喺Google Map度睇到,2011年6月仲係一片露天貨倉,名曰海濱貨倉/泰記貨倉。如果企喺以下Cap圖嘅位置(A點),背住就係青山醫院嘅後門,而左邊就係畀精神病康復者嘅社企用嘅新生農場;對比今時今日嘅海濱/泰記貨倉位置,農場仲喺度,但倉地已經係工程進行中。至於青山醫院同三/四(東)西之間嘅道路,亦已經擴闊成可以畀泥頭車過:

 

再由另一個角度去睇下,喺同一條路繼續行,行到青山醫院學院樓(上面地圖未顯示)東端對開(B點),可以見到2017年6月,三/四(東)西已經平整到七七八八,同時亦都可以注意到,路邊嘅樹木已經消失。

 

根據屯門區議會2016年11月1日會議有關紀錄(屯門區議會文件2016年第32號)顯示,房委會曾向屯門區議會匯報屯門公屋發展最新情況,三/四(東)西由2015年開始平整工程同道路工程,最初係打算起4,000個單位,容納12,000人;2017年5月,房委會又再入紙,打算放寬個西嘅地積比,令該位置可以起到5,200個單位,容納達13,000人。成個屯門第54區嘅公屋計劃初步已經預計容納28,600人,仲未計4A(南)地盤會有1,000個單位,將會喺2020年代中期落成,另外仲加有700個可能係居屋嘅單位會起。咁搞法,雖然唔敢話旺過旺角,但呢個地方仲適唔適合靜養呢?

另外,現時青山醫院正門外,其實係有一間學校。未來公屋落成之後,一定會有一定嘅商業設施,到時候原本繞過青山醫院西端嘅一段青松觀路同新福路(即原青山醫院後小路),就會成為中學同學仔去新屋邨之間嘅必經之路,多嘅唔講,中學中午放食飯,呢條路仔一定熱鬧過依家幾十倍。

另外,即使政府規劃咗L54A路作為屯門第54區公屋發展計劃嘅主幹道(位於三/四(東)西以北,理論上唔影響原青山醫院交通),由最近三/四(東)西嘅輕鐵線站就係青松站,青山醫院西側道路好明顯又會成為居民出門嘅必經之路。先唔講呢片土地對居民有幾唔方便,青山醫院嘅正門同後門都變成交通要道,然後你同我講呢度係間畀人療養精神疾病嘅醫院?諗出嚟嗰個食撚錯咗屎呀?

老實講,依個公屋計劃一早就拍咗板,依家只係再將佢起大啲,再講咩其實都冇用。城規會對呢次放寬地積比嘅諮詢喺6月9號就完,希望大家睇完《一念無明》感動完,都真係關心下,呢個社會到底有冇認真考慮精神病患者嘅需要啦。

順帶一提,呢單嘢由2015年2月決定起公屋起,直至今日2017年6月5日,除咗決定嗰時有幾份報紙報過要起屋同要收紫田村地之外,就係得前幾日由某間紅底大網媒報導過,而且亦都只係由交通壓力角度入手報導;比起2015年幾份紙媒好嘅,咪就係有提幅地喺青山醫院以北囉。

 

注意:筆者並無精神病患相關知識,如有錯訛,煩請指正。

 

作者:薰華

薰華
塵世中一件無名廢青,除咗偏見同口水就冇嘢多。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 161211
Date: 2017-06-06 04:35:45
Generated at: 2021-06-24 00:35:08
Permalink: https://www.vjmedia.com.hk/articles/2017/06/06/161211/青山醫院對面,將興建三萬人公共屋邨?