男女平等,軟飯無罪。

 

女人大多數以釣到金龜為榮,因為代表下平生無憂、出入上流社會、買名牌如買菜,簡直係夢想生活。你話佢貪錢咩?你打工咪又係為咗份糧,跳槽咪又係貪新公司人工高啲,只不過人地用感情代替勞力搵錢,用個更舒服嘅方法得到自己想要嘅嘢。身處喺下下講男女平等嘅香港,我地好應該順應潮流,當女人爭取緊更多權利嗰陣,我地男人都要學習下女性:女有女嘅釣金龜,男有男嘅食軟飯,咁先係真正嘅男女平等嘛。

男女平等唔應該淨係為女性爭取,男性都可以好好平反:點解食軟飯就係冇用,點解食軟飯就唔係男人?女性要爭取同男性同工同酬仲有同樣嘅升遷機會,而現今香港都的確愈嚟愈多女強人喺辦公室坐房指揮下屬。愈嚟愈多女性唔再需要靠另一半養,甚至可以一個人應付到全家人嘅支出,所以男性食軟飯嘅機會比以前更多,亦更常見。唔好以為食軟飯真係咁易,樣子未必係最重要條件,除非你諗任追何氏千金啦。反而心靈上嘅支持同男人嘅細心先係女強人最重視,返工已經夠忙,放工如果仲乜都要自己做自己諗咁要個男人有何用?放工幫佢揼兩嘢,講句辛苦啦然後聽佢吐下苦水,等佢返嚟有種家嘅感覺,知道大半日喺出面對住一班牛鬼蛇神之後屋企有個人會等自己返屋企,依種感覺先係女強人最希望男人比到佢嘅。

食得軟飯,識煮埋飯當然好啦,唔識而要叫外賣嘅耐唔耐整個沙律清清腸胃都要啦係咪先?做家務就要睇下有冇鐘點賓賓,冇嘅自然要你做埋(或者你自己比錢請鐘點囉,食得軟飯嗰一千幾百算係乜)。如果有埋細路你自然要做湊仔公角色,啲咩家長會啊見家長睇上堂都係你去,務求令女強人喺公司放心搏殺。你話怕比家長校長睇唔起?大大聲同佢地講:男女平等啊,你歧視我老婆做得嘢啊?你歧視我唔鐘意返工鐘意湊仔啊?你講吖,你個師奶係咪父權支持者?可恥。

當然啦,男同女點都係有差異。女人真係可以日日出街洗錢唔煮飯唔做嘢等老公返嚟嗲下佢同佢講「我今日買咗件好性感嘅睡衣啊」就可以,但男人如果都係咁無所事事就肯定比人睇唔起。始終而家網絡咁發達,喺屋企搵下Freelance做,學下煮嘢食,繼續Keep住忙碌嘅在家生活一啲都唔難。

Come On,放低你嘅成見,放低你嘅顧累。向食軟飯條路進發,為男女平等出一分力。

 

 

作者:毛言地

毛言地
你有多久沒去找自己的理想?搏殺一天,回到家,倒頭就睡。 無言,只因生存太累。談理想?妄想; 毛言仍言,只因理想,本就是「理應去想」 http://www.facebook.com/MaoYanDe

閱讀後覺得好,請多多讚好及分享~:)

其他熱門文章

  • 【遊戲介紹】耍帥動作射擊遊戲 《Gungrave G.O.R.E》無限子彈變型棺材爽爆殺敵 by 五木
    主打耍帥和爽爆的動作遊戲,除了《Devil May Cry》外,還有另一個系列《Gungrave》(銃神)。新 […]…
  • 講起「蔡康年」,你諗起乜野? by 齋老味
    曾經係當紅DJ,因為施念慈報警話俾佢打,立即被貶為人渣,無得做DJ走曬樣,從此淪為TVB專用低能或變態角色。近年因為有高清台,無記多咗財經節目,先知佢原來而家係財經主持。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 「𠒇」字係咩嚟?——港姐冠軍帶出嘅哲學問題 by 散彈一號
    試想象下,喺未有電腦嘅年代,如果你見到某張手寫嘅form上面,有人寫自己個名係「陳曼𠒇」咁啦。你會唔會即刻覺得自己唔識讀呢隻字,即刻走去查字典睇下個字點讀? 應該唔會掛。你第一個反應,可能會心諗:「嘩,呢個人寫個『兒』字寫得咁樣衰嘅。」…
  • 解構精神心理治療——輔導個案概念化(Case conceptualization) by 西多士
    如果問大家對「輔導」一詞想起甚麼?可能會聯想到精神疾病,情緒困擾,婚姻問題,家庭暴力等。其實,「輔導」並不如有些人想得這般負面的。先說說「輔導心理學(counselling_psychology)」吧。!它是「應用心理學(applied_p…
  • 《鋼鍊》「等價交換」根本不是真理 by 方潤
    很多人提及《鋼》,都是提及等價交換原理,甚至以為《鋼》就是教人等價交換,其實是大謬。因為《鋼》的每一集都有這段開場白,由主角兩兄弟讀出:「人不作出犧牲,就不會得到任何回報,想得到一樣東西,就必須付出同等的代價。這就是煉金術的基本原則 - 「…
歡迎讚好我們的facebook page,免費資訊源源送上。

文章資訊

ID: 161470
Date: 2017-06-08 15:15:45
Generated at: 2022-12-01 18:54:42
Permalink: https://www.vjmedia.com.hk/articles/2017/06/08/161470/男女平等,軟飯無罪。