7：55am，鬧鐘響，我嚇醒咗，眼角仲有淚水，即刻衝去望下媽媽有無事，原來佢仲瞓緊覺，即刻安心晒，呢個係我咁大個女發過最恐怖嘅惡夢。平時嘅生活總係為咗工作而忙，唔計瞓覺嘅時間，見老闆同同事一定多過見屋企人。放工返到去已經得返半條人命，有時都攰到唔想講嘢，可能媽媽問多幾句都覺得煩。夜晚亦唔係成日返屋企食飯，有時加班太夜唔想佢哋等、有時去咗拍拖、有時約咗朋友食飯、有時去咗做facial或者massage，總係有好多原因。