今日下午掛八號風球的可行性分析

 

三號風球懸掛。天文台竟然仲率先作出預告:『天文台會視乎苗柏的移動路徑及強度變化在下午稍後考慮是否需要改發八號烈風或暴風信號。』

點樣分析呢句野?依家個風只不過係熱帶風暴,中心風力只係大概七十幾公里,雖然風切變唔算強,但係海水溫度亦唔算高,我不覺得有好大機會出現近岸急劇爆發既情況。就算上到去STS即係強烈熱帶風暴,即使係100公里範圍掠過,都唔會令香港吹起暴風。因此,係依家既牌面上,9/10號可以排除。

咁8號呢?如果單純強度而言,以風論風,烈風圈一方面極少,向西度不足的話,係西貢一邊登陸,可以話係無乜威脅可言。依家距離香港200公里,時速20公里,即係登陸時間大可以係今既子時,即係晚上11點至凌晨一點左右。就算俾你有風大家都返晒屋企啦。

不過,我仍然覺得根據過往紀錄,今任既天文台長係相當手鬆既,就算出黎弱八,佢都可以唔覺得有所謂。畢竟到時無風八號俾人鬧,總好過強三吹郁垃圾桶大鑊。加上依家已經咁爆響口,8號唔係話全無可能既,就算到時無一個風站吹起持續烈風(即62公里以上),佢都可以以安全理由掛波。

但照依家計就算俾你晚上10-11點預警/掛八號(都仲係PM黎既,所以天文台唔算錯),又有何用呢?個風點都捱唔到聽日清早。以一個咁樣既小型風暴,天文台絕對會以一登陸既情況,即刻移除所有台風信號,然後改發季候風信號之類。可能到時博下紅雨黑雨都仲話。

所以你問我聽日放唔放到假,我真係不存奢望。到時有咪當中獎囉。

 

後補:最新兩報睇黎,行快左唔少,而且強度好似有少少提升。但基本上已經可以完全排除聽日唔駛返工既機會。如果以長州既風站做指標的話(葉慶輝提示話橫瀾島已經>60),掛八號波時間就會提早,並接近今日放工時間,如果按照依家路徑去推算,咁天文台又會好大鑊。LOL

 

 

關於作者:鵝鑾鼻燈塔

鵝鑾鼻燈塔
前高登講故人。現為廢中。努力抵抗中年危機中。FB PAGE:https://www.facebook.com/Ellan.Ou/

我有回應

則留言

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。