喂,唔係個個女人靠姣就上到位㗎!

(發姣示意圖)

 

一向對外宣稱只係鍾意鬼佬嘅90後同事Bibi最近可能食錯藥,係男人佢都姣,外賣仔、送貸仔、司機大哥、廚房佬、維修佬、男同事,總之一個都唔放過。至於點姣?離不開都係嗲聲嗲氣,間唔中有少少身體接觸咁囉,我次次行過見到都會毛管戙。姣成咁有咩著數?有人請食嘢,送下小禮物咁囉,擺到成枱都係。其實佢姣佢嘅事,我同一眾女同事大可以唔理佢,衰就衰在佢識一樣中國國粹 – 變臉。

話說有次我等緊𨋢,佢喺格𨋢入面同個阿叔傾到嘻嘻哈哈咁,然後一出𨋢見到我,即時西面仲「摺」咗我一聲,再用好不屑嘅眼神望住我,what the hell?我做錯咗啲咩?唔止我,佢對所有女同事都係西面,阿姐都無面畀,所以大家都好憎佢。有個新嘅男同事仲傻下傻下話:「可能佢性格本身係咁呢,對個個都咁nice。」如果佢一視同仁,男女都姣嘅,fine,但唔係囉,不過咁,其實佢都帶咗好多歡樂比我哋嘅,話說有一日,佢竟然勇敢到當住阿姐面對腦細出手。

「Rex,我好凍凍呀,你有無外套可以借比我?西裝褸我都唔介意㗎。」慘慘豬Bibi說,其實佢著低胸小背心加短裙,凍都好正常。
「有,不過無帶,哈哈。」腦細Rex笑說。
「我有喎!借畀你吖,凍就唔好再著短裙仔返工喇,知嗎?」阿姐關心地說。

呢件事即日已經傳到成個公司都知,大家都笑到傻咗。姣腦細唔係問題,但可唔可以姣得醒少少同有返少少自知之名呢?姣都要睇時機㗎嘛,大庭廣眾姣腦細,腦細想受都唔得啦,仲要阿姐都喺度,跟本係死梗。而且你仲想姣件老西返嚟著?你估而家玩龍袍加身咩,唔好睇咁多膠劇啦,睇到上晒腦。你唔係諗住你一個小薯仔可以著住腦細件老西,等其他人見到,以為你哋有非比尋常嘅關係,然後就可以作威作福掛?你侮辱自己就算啦,唔好當腦細傻先得㗎。

雖然話十八無醜婦,但後生都唔一定等如索,你返去照下鏡先啦,咁嘅款就諗住釣金龜?畀啲誠意執埶佢先啦好嗎?除咗西面,佢仲係超級無敵懶,做嘢無效率得個拖字,態度差又無交帶,份人粗心大意,做乜錯乜,執手尾都有排你執,成日講大話,有十萬個藉口死都唔認錯,淨係識推落其他人度。點解我咁憎佢?成篇嘢都咁mean?因為阿姐話佢做嘢實在太差,唔敢交嘢畀佢做,唯有交晒畀我。。。

 

P.S. 如果你仲未知邊個係Bibi,歡迎睇返呢篇《其實我真心唔明鬼佬有乜好》

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 162306
Date: 2017-06-18 21:02:09
Generated at: 2022-08-11 18:57:35
Permalink: https://www.vjmedia.com.hk/articles/2017/06/18/162306/喂,唔係個個女人靠姣就上到位㗎!