買避孕套或者食避孕藥係咪真係咁難?

 

事先聲明,呢篇唔係性教育文,只係唔知係咪 DSE 完咗,學生仔女得閒咗咪易咗出事囉。

最近不約而同遇著幾單傻妹豬嘅個案,當中有做援交⋯OK,佢話唔係援交,係 PTGF!不過我心諗 Whatsoever啦;一個就名校出身但從來未拍過拖,無啦啦話入大學前驚比人笑自己無經驗,居然去蘭桂芳同個陌生人 One Night Stand⋯⋯

後者個傻豬都係後悔啫,惟一好彩嘅叫無手尾跟;前者就陰公啲,有咗饀。我唔係話佢有咗饀好慘,我係覺得做佢個饀好慘。

首先,個女仔今年十七歲,未讀完書;經手人(經佢推斷)係一名三十幾歲單身男子。

女仔發現有饀之後,第一時間同個男人講,咁人地梗係唔認數啦:

「點知妳出黎做會唔食藥架啫」
「妳接幾多客我鬼知啊」
「妳話加錢可以中出架」

女仔好嬲咁同我講返當時男方嘅說話,當中仲夾雜好多問候老母嘅說話,此處就不盡錄了。

得罪講句,呢啲對我黎講並唔係情感問題,係生意糾紛;而我聽完女仔嘅經歷之後,可能你會覺得我涼薄,但我忍唔住弱弱咁問咗佢一句:「係囉……咁點解妳唔食藥嘅?」

如果佢係做生意嘅,我問點解男方唔用安全套件事好似唔係幾 Make Sense;同埋如果男嘅唔肯用,女方自己都應該要做啲嘢保障自己吧?

「係因為……藥物敏感?定係食完啲 Hormones 會 Balance 唔到?」
「咩蒙話?」
「呀,荷爾蒙。」
「即係咩?」
我吸一口氣,時間關係我黎唔切同佢上 Bio 堂,「唔緊要,妳介唔介意講,點解妳唔食藥?」

而我,我真係無諗過會聽到以下呢個答案。

「吓,買藥貴囉!」

買…藥…貴。
我忍得好辛苦先無睥大對眼,我望住枱面已經開咗嘅問題牌,呢度都已經幾舊水……

你有錢黎占卜,無錢買避孕藥?

去到呢度,我倒自己米都要講:其實事到如今,佢黎問牌又有咩用呢?唔駛開牌、唔駛公眾投票都知道要落咗佢啦?點養呀?個客本身仲要同屋企關係勁差,唔係旨意屋企養呀?就算好,妳拎綜援養,咁點教育個小朋友呀?個客自己都係小朋友黎咋噃!

「吓…我唔知生唔生好啊,落仔好似好煩同埋好貴。」

你有錢黎占卜,無錢去睇婦科?!

我聽到佢咁講,差啲連個肝都嘔出黎。陰公,我望住個客,我真係睇唔透,到底佢諗緊咩。我將我頭先心入面鬧佢嘅說話……妖,講真,講啲正常人水平嘅說話比佢聽都無用啦,所以我決定反其道而行。

「而家生小朋友出黎,無人幫手照顧,妳就從此無得追尋妳想要嘅生活架啦,溝唔到仔架喇喎,邊有男人想條女帶住個仔架!仲有呀,妳咪話想做空姐嘅,咁更加咪鬼生啦,遲啲到佢升小學妳又要下下飛咗佢,妳會好大壓力架!仲有呀,生完呢,好似話呢,身材會無而家咁好架!咪生啦!」

老老實實,如果我喺條街度,聽到兩個女仔咁樣對話,我應該會暗啞底側目;又,老老實實,其實呢啲客,佢條路點行,關我春事咩,副牌叫佢唔好生,佢最後都選擇生,係佢嘅事﹐又唔駛我照顧嘅。

但係,如果我可以勸嘅時候我無勸,我諗我會怨自己好耐:(

「咁真係唔生啊?好似好麻煩咁,佢又唔肯認頭。我再諗下。」

最後呢個客好似明又好似唔明咁走咗,由佢黎搵我到而家,計落,都差唔多係 Last Minute 要決定去落仔了。唔好同我講咩生命誠好貴、有咗就要生、落仔係做孽;喺你話我之前,你再諗下,一個咁樣嘅女仔,一條友,無學歷無錢,佢生咗出黎,唔通又真係叫做唔造孽咩?

 
續集——PTGF 有咗餡,唔想生又懶得落,可以點?

 

 

關於作者:神婆

神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage

我有回應

則留言

閱讀後覺得好,請多多讚好及分享~:)

其他熱門文章

  • 【塔羅個案】上流社會的分手方式:左手機票,右手支票 by 神婆
    今次要寫嘅個案,老老實實,好戲劇性;同埋故事中牽涉嘅嗰位男士,喺社會上都算係有頭有面,如果開名都幾大鑊,所以,Macy係占卜完之後同我講「我想妳寫我嘅故事出黎」時,我都有啲吃驚。故事好簡單。Macy,二十來歲,鄰家女孩模樣,本來為Patri…
  • 中出即飛 by 堂前燕
    每次扑野之前,總要說一輪甜言蜜語,慢慢地連她都不相信,自己竟然有點相信他了,終於有一次,他中出了她。當初,女孩將他當成是SP,當然除了性愛,他也會盡sugar_daddy的責任給她買名牌和iPhone,但無可否認,對於初經人道的她來說,他的…
  • 不知如何生活下去的偽ABC by 霏子
    「I_will_go_back_to_California_soon.」在屋邨學校畢業的他,刪除了所有舊照,缺席一切敘舊活動,他在California讀high_school,又怎能分身在香港讀中學呢?他說他考上了University_of…
  • 【塔羅個案】個客話自己比鬼跟? by 神婆
    「同學你讀緊書?放緊暑假?有無打機睇世界盃呀?」「有呀,我場場都睇哂!」Michael 有少少激動,試過眼瞓頂唔順瞓著,所以我係咁食杯麵薯片可樂提神,肥咗幾磅。」…
  • 到底中國的外敵在想甚麼? by 蕭少滔
    太遠的不說,光從中古的宋朝說起。大家想想,即使所謂積弱成病的宋國,和遼國打了幾十年仗,其實雙方最後也是相安無事的。而遼國也好、金國也好,都好像吃得太肥太懶,宋國才忽發奇想,才有所謂聯金滅遼、後來又有聯蒙古滅金等等引火自焚的外交政策出台。而一…
歡迎讚好我們的facebook page,免費資訊源源送上。